يران ينۆەستورلارى اقتوبە وبىلىسىندا ەگىن ەكپەك

اقتوبە. قازاقپارات - اقتوبە وبلىسىنىڭ اكىمى بەردىبەك ساپاربايەۆ پەن يراندىق «دجاحاد-ە-سابز» كومپانياسى ديرەكتورلار كەڭەسىنىڭ ءتوراعاسى حاميدي ەسفاحاني موجتاۆا اليريزا اراسىندا اۋىل شارۋاشىلىعى سالاسىندا ىنتىماقتاستىق تۋرالى كەلىسىم جاسالدى.

جيىندا ءسوز باستاعان ايماق باسشىسىنىڭ ايتۋىنشا، ارپا، ءبيداي ەكسپورتى - اقتوبە وبلىسى مەن يران اراسىنداعى نەگىزى تاۋار اينالىمى.

يرانداعى ءىرى اۋىل شارۋاشىلىعى كومپانياسىنىڭ باسشىسى حاميدي ەسفاحاني موجتاۆا اليريزا اقتوبە وبلىسىندا كوكونىس سالاسىنا ينۆەستيتسيا سالۋعا نيەتتى ەكەنىن ءبىلدىردى. وسى ماقسات ءۇشىن شەتەلدىك قوناق ءداندى-داقىلدار ەگۋگە 100 مىڭ گەكتار جەر سۇراي كەلگەن.

سونىمەن قاتار، يراندىق تاراپ، ءداندى-داقىلدار ەگۋمەن اينالىسىپ قانا قويماي، ايماقتا ەگىس دالاسىنىڭ ونىمدىلىگىن ارتتىرۋ بويىنشا جۇمىس جۇرگىزۋگە ءازىر ەكەنىن دە جەتكىزدى.

- ايماقتا كارتوپ، كوكونىس، ارپا، ءبيداي ەگۋگە جارامدى 1,2 ميلليون گەكتار جەر بار. ءبىز ساۋدا-ەكونوميكالىق بايلانىس، ەكسپورت كولەمىن ارتتىرۋ ماقساتىندا يراندىق جانە اقتوبەلىك بيزنەس-قاۋىمداستىقتىڭ تىعىز ىنتىماقتاسۋىنا قىزىعۋشىلىق تانىتىپ وتىرمىز. سوندىقتان، قاجەت بولعان قولداۋدى كورسەتۋگە دايىنبىز، - دەدى شەتەلدىك قوناقپەن كەزدەسۋدە ايماق باسشىسى ب. ساپاربايەۆ.

جيىن بارىسىندا بيىل يراندىق كومپانياعا 10 مىڭ گەكتار جەر بولىنەتىنى بەلگىلى بولدى. شەتەلدىكتەردىڭ اۋىل شارۋاشىلىق جۇمىستارى جەرگىلىكتى اگرارشىلارمەن بىرىگىپ جۇرگىزىلەتىن بولادى. يراندىق كومپانيا سۇراعان 100 مىڭ گەكتار جەردى ءبولۋ 2017-جىلى جۇزەگە اسۋى مۇمكىن، دەلىنگەن «اقتوبە-اقپارات» اقپاراتتىق ورتالىعى حابارلاماسىندا.