مىسىر قازاقستاننىڭ ەلورداسىن كوشىرۋ تاجىريبەسىنە قىزىعۋشىلىق تانىتتى - فوتو

استانا. قازاقپارات - ەلوردا اكىمى ادىلبەك جاقسىبەكوۆ تۇرعىن ءۇي ىستەرى، كوممۋنالدىق شارۋاشىلىق جانە قالالىق دامۋ ءمينيسترى مۇستافا مادبۋلي باستاعان مىسىراراب رەسپۋبليكاسىنىڭ دەلەگاتسياسىمەن كەزدەستى.

شەتەلدىك قوناقتاردىڭ ەلورداعا كەلۋىنىڭ نەگىزگى ماقساتى - قازاقستاننىڭ ەلوردانى اۋىستىرۋ بويىنشا تاجىريبەسىن قابىلداۋ، دەپ جازادى قالانىڭ رەسمي سايتى.

تۋرا ءبىر جىل بۇرىن مينيستر م. مادبۋلي شارم ەش-شەيحتە ەكونوميكالىق دامۋ جانە ينۆەستيتسيالار جونىندەگى حالىقارالىق كونفەرەنسيادا بارشا الەمگە كايردەن شىعىسقا قاراي ورنالاسقان مىسىردىڭ جاڭا استاناسىن سالۋ تۋرالى جوسپاردى تانىستىرعان بولاتىن. قالا حالقىنىڭ كوپتىگى ەل استاناسىن اۋىستىرۋعا سەپتىگىن تيگىزىپ وتىر. جاڭا استانا كايردىڭ جالعاسى رەتىندە قايتادان سالىنادى. كەزدەسۋدە مىسىردا تۇرعىن ءۇي ىستەرى، كوممۋنالدىق شارۋاشىلىق جانە قالالىق دامۋ مينيسترلىگى مەن قورعانىس جانە اسكەري ونەركاسىپ مينيسترلىگى ەلوردانى اۋىستىرۋ بويىنشا ۋاكىلەتتى ورگاندار بولىپ تابىلاتىنى اتاپ ءوتىلدى.

مىسىردىڭ تۇرعىن ءۇي ىستەرى، كوممۋنالدىق شارۋاشىلىق جانە قالالىق دامۋ ءمينيسترى از ۋاقىتتىڭ ىشىندە ەۋرازيالىق ءوڭىردىڭ ورتالىعىنا اينالعان قازاقستاندىق ەلوردانى اۋىستىرۋ تاجىريبەسىنە مۇددەلىلىك تانىتتى.

«ەكى ەل اراسىندا دوستىق قارىم- قاتىناس ورناعان، پرەزيدەنتىمىزدىڭ ايتۋىمەن مۇندا استانامەن تانىسۋ ءۇشىن كەلدىك»، - دەدى م. مادبۋلي. شەتەلدىك قوناق مىسىرلىق تاراپتىڭ ەلوردانى اۋىستىرۋدىڭ باستاپقى كەزەڭىندە وسى پروتسەسستەردى ۇيىمداستىرۋدى باسقارۋدىڭ قالاي وتكەنىنە قىزىعۋشىلىق تانىتىپ وتىرعانىن اتاپ ءوتتى.

ءا. جاقسىبەكوۆ قازاقستاننىڭ جاڭا ەلورداسىن سالۋ تۋرالى شەشىمدى مەملەكەت باسشىسى قابىلداعانىن جەتكىزدى. قايتا قۇرىلۋ كەزىندە قابىلدانعان شەشىمگە وبەكتيۆتى ەكونوميكالىق جانە باسقا دا فاكتورلار دا ىقپال ەتتى. استانا قىسقا ۋاقىتتىڭ ىشىندە ەكونوميكالىق جانە الەۋمەتتىك تۇراقتى، گۇلدەنگەن دەموكراتيالىق مەملەكەتتىڭ زاماناۋي قازاقستاننىڭ جاڭا كەلبەتىنە اينالۋى جوسپارلانىپ، ول جۇزەگە استى.

«العاشقى كۇننەن باستاپ قۇرىلىستىڭ جوعارى قارقىنى بەلگىلەنىپ، العا ءبىرقاتار مىندەتتەر قويىلدى. بۇگىندە استانا ۇلتتىق يدەيانىڭ كورىنىسىنە، قازاقستان تاريحىنداعى جاڭا ءداۋىردىڭ سيمۆولىنا اينالدى»، - دەدى قالا باسشىسى. بۇل رەتتە ول ەلوردانىڭ ءوز تاجىريبەسىمەن قۋانا بولىسەتىنىن اتاپ ءوتتى.

كەشە، 13 -ناۋرىزدا شەتەلدىك دەلەگاتسيا استانانىڭ ماڭىزدى جەرلەرىن ارالاپ، جالعاسىپ جاتقان قۇرىلىستىڭ اۋقىمىمەن تانىستى.

مىسىر قورعانىس جانە اسكەري ونەركاسىپ ءمينيسترىنىڭ ورىنباسارى، قارۋلى كۇشتەردى ينجەنەرلىك باسقارۋدىڭ باستىعى كامەل ابدەلحادي فاراگ ۋازير استانادان شابىت العاندارىن ايتتى.

«قۇرىلىس سالاسىندا 38 جىلعا جۋىق ۋاقىتتان بەرى ەڭبەك ەتىپ كەلەمىن، سوندىقتان استانانى سالۋعا جوعارى بىلىكتى ماماندار، قۇرىلىسشىلار، ساۋلەتشىلەر تارتىلعانىن ايتا الامىن. بىزبەن بولىسكەلى وتىرعان تاجىريبەلەرىڭىزدى جاڭا استانامىزدىڭ قۇرىلىسىندا پايدالاناتىن بولامىز»، - دەدى مىسىر قورعانىس جانە اسكەري ونەركاسىپ ۆيتسە- ءمينيسترى.

ءا. جاقسىبەكوۆتىڭ اتاپ وتۋىنشە، استانانىڭ قالا قۇرىلىسى ساياساتى بىرنەشە كەزەڭنەن تۇرادى، ولاردى جۇزەگە اسىرۋعا بىرتىندەپ بارشا الەمنەن ۇزدىك ماماندار تارتىلدى. مىسالى، قالانىڭ باس جوسپارىنىڭ يادروسىن سالعان بەلگىلى جاپون ساۋلەتشىسى كيسە كۋروكاۆو.

كەزدەسۋ بارىسىندا قالا قوناقتارى ەلوردانىڭ 18 جىلدىڭ ىشىندەگى دامۋ ۇردىسىمەن تانىسىپ، قۇرىلىس جوسپارلارىن جانە يندۋستريالدى الەۋەتتى ىسكە اسىرۋدى، اباتتاندىرۋ، كوگالداندىرۋ جانە قالانىڭ تىنىس- تىرشىلىگىنە يننوۆاتسيالىق تەحنولوگيالاردى ەنگىزۋ ماسەلەلەرىن تالقىلادى. الداعى ۋاقىتتا وتەتىن ەكسپو-2017 حالىقارالىق مامانداندىرىلعان كورمەسىنە ەرەكشە نازار اۋدارىلدى.

مىسىر ءمينيسترى استانا قالاسىنىڭ اكىمدىگىنە قوناقجايلىلىعى مەن قازاقستاننىڭ جاس استاناسىنىڭ قالىپتاسۋىمەن تانىسۋعا مۇمكىندىك بەرگەنى ءۇشىن العىسىن ءبىلدىردى.

كەزدەسۋدەن كەيىن مىسىرلىق دەلەگاتسيا «استانا باس جوسپار» ع ز ج ي- ىندا بولدى. استانا قالاسى اكىمىنىڭ ءبىرىنشى ورىنباسارى سەرگەي حوروشۋن شەتەلدىك قوناقتاردى قالانىڭ دامۋىمەن ەگجەي- تەگجەيلى تانىستىردى. سونداي-اق، شەتەلدىك قوناقتار قالاداعى تىرشىلىكتى قامتاماسىز ەتۋ مەكەمەلەرى مەن ەكسپو كورمە كەشەنىنىڭ وبەكتىلەرىن تاماشالايدى.