ەرتەڭ مۋزارت توبىنىڭ تەلەجوباسىنا ىرىكتەۋ باستالادى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا جوبا پروديۋسەرى، تانىمال وتاندىق كومپوزيتور رينات گايسين ءمالىم ەتتى.
ونىڭ سوزىنە قاراعاندا، «مۋزارت LIVE» جوباسىنا تەك جىگىتتەر قاتىسا الادى.
«مۋزارت LIVE» جوباسى ءۇش كەزەڭنەن تۇراتىن بولادى. ءبىرىنشى كەزەڭدە - 15 -ناۋرىزدان 15 -ءساۋىر ارالىعىندا ونلاين-كاستينگ وتكىزىلەدى. ەكىنشى كەزەڭ - ول مۋزارت توبىنىڭ قاتىسۋىمەن ايماقتىق ىرىكتەۋ جانە ول 10 -مامىردان 25 -مامىر ارالىعىندا وتەدى. ايماقتىق ىرىكتەۋ استانا، الماتى، اتىراۋ، سەمەي، شىمكەنت قالالارىندا وتكىزىلەدى. ءۇشىنشى كەزەڭ - ىرىكتەلگەن 60 ۇمىتكەردىڭ قاتىسۋىمەن وتەتىن تەلەۆيزيالىق جوبا. ايتا كەتۋ كەرەك، جوباعا تەك جىگىتتەر قاتىسادى جانە جوبا بارىسىندا تەك قازاق تىلىندەگى اندەر ورىندالادى»، - دەپ اتاپ ءوتتى ر. گايسين.
ونىڭ سوزىنە قاراعاندا، ۇلتتىق مۋزىكالىق تەلەجوبانىڭ ІІІ- كەزەڭى ۇمىتكەرلەرگە تەلەتۇسىرىلىمگە قاتىسۋ مۇمكىندىگىن بەرەدى. وندا ۇمىتكەرلەر ستيل، يميدج، رەپەرتۋار، حورەوگرافيا سالاسى بويىنشا ۇيىمداستىرۋ كوميتەتىنەن كەڭەس الادى. اقتىق سىندا بار- جوعى 6 ادام باعىن سىنايدى.
بۇنىڭ الدىندا حابارلاعانىمىزداي، بيىل «قازاقستان» ۇلتتىق تەلەارناسىندا «مۋزارت LIVE» مەگا- جوباسى تۇساۋىن كەسپەك. مۋزىكالىق جوباعا 16 جاستان 25 جاسقا دەيىنگى ارالىقتاعى تالانتتى ەر جىگىتتەر قاتىسا الادى. ۇمىتكەرلەردىڭ مۋزىكالىق ءبىلىمىنىڭ بولۋى شارت ەمەس. سونداي-اق، مۋزىكالىق تالعامى مەن ورىنداۋشىلاردىڭ قۇرامىنا دا (سولو، دۋەت، توپ) ءمان بەرىلمەيدى. ەڭ باستى تالاپ - قاتىسۋشى مەملەكەتتىك تىلدە ءان ايتا بىلۋگە مىندەتتى.
اۆتور: جاسۇلان جولدىبايەۆ
