قازاقستاندىق بلوگەر تانىمال پروديۋسەر ەسەنتايەۆاعا سالەمدەمە جولدادى

استانا. قازاقپارات - قازاقستاندىق جۋرناليست ءارى بلوگەر بەرىك سۇلتان قازاق سپورتشىلارىنىڭ تەك ءتۇرلى جارىستاردا جەتىستىككە جەتىپ، ەل مەرەيىن اسقاقتاتقان سوڭ عانا جۇرتشىلىق قوشەمەتىنە بولەنەتىنىنە قىنجىلىس ءبىلدىردى.

ءتىپتى جەڭىستەن سوڭ تەك بىرنەشە اي عانا ەل ماقتاپ، كەيىن ۇمىت قالدىرىپ جۇرەتىنىن ەسكە سالدى. ول ءوز سوزىندە ءۇندىستاننىڭ داڭقتى بوكسشىسىن مىسالعا كەلتىرگەن.

«مەري كوم 1983 -جىلى تۋعان ءۇندىستاننىڭ داڭقتى بوكسشىسى. بوكس سۇيەر قاۋىم ءۇشىن تۇلعاعا اينالعان دارا سپورتشى. مەري حالىقارالىق دودالاردىڭ جەڭىمپازى، الەمنىڭ 5 دۇركىن چەمپيونى. لوندون وليمپياداسىنىڭ قولا جۇلدەگەرى...

بيىل ريو وليمپياداسىندا توپ جارىپ، ءۇندىستانعا التىن مەدال سىيلاۋ باستى ماقساتى ەكەن. حوش، مەرريعا ساتتىلىك تىلەيمىز. ارمانىنا جەتسىن.

ايتايىن دەگەنىم، 2014 -جىلى ءۇندىستان ءوزىنىڭ تۋىن جەلبىرەتىپ، ءانۇرانىن ويناتىپ جۇرگەن مەري كومنىڭ ءومىر جولى، سپورتتاعى جەتىستىگى تۋرالى كوركەم فيلم ءتۇسىردى. كينونى كورىپ شىقتىم. وتە كەرەمەت، اسەرلى تۋىندى بولىپتى. ۇندىلەردىڭ ۇلتجاندىلىعى مەن سپورتشىلارىنا دەگەن قولداۋىن وسى كينودان-اق بىلە بەرسە بولاتىن شىعار. تۋىن جەلبىرەتىپ جۇرگەن سپورتشىسىن ناسيحاتتادى. تانىمالدىعىن ارتتىردى. جاستارىنىڭ سپورتقا قىزىعۋشىلىعىن وياتتى. ەڭ باستىسى، ءمەريدى كوزى تىرىسىندە قۇرمەتتەدى. ريو وليمپياداسىندا التىن الۋعا دەگەن قۇشتارلىعىن ەكى ەسەگە ۇلعايتتى. كەرەمەت ەمەس پە؟!» - دەدى بلوگەر. بۇدان سوڭ ول جاس ۇرپاققا ۇلگى ەتىپ، ولاردىڭ سپورتقا دەگەن قىزىعۋشىلىعىن ارتتىرۋعا بولاتىن فيلمدەردى نەگە بىزگە دە تۇسىرمەسكە دەگەن وي مازالايتىنىن جاسىرماعان.

«كۇشتى، ءيا؟ ! ال بىزدە شە؟! ءبىزدىڭ ەلىمىزدە كينو تۇسىرۋگە لايىق سپورتشىلار بار ما؟! بۇل تاقىرىپتا قوياتىن سۇراق كوپ. سول سياقتى جاۋاپتىڭ دا ءتۇر-ءتۇرىن ەستۋگە بولادى. بەكزات ساتتارحانوۆ تۋرالى كينو ءتۇسىرىلىپ جاتىر دەپ ەدى. قازىر تىم-تىرىس. ەرماحان ىبرايىموۆ، جاقسىلىق ۇشكەمپىروۆ، داۋلەت تۇرلىحانوۆ، باقتيار ارتايەۆ، قانات يسلام، گەنادي گالوۆكين، سەرىك قوناقبايەۆ ايتا بەرسەڭ كوپ. وسىلاردىڭ ءارقايسىنىڭ التىنعا جەتۋ جولىنداعى كۇرەسى تۋرالى كەرەمەت كينو تۇسىرۋگە بولادى. سول كينو ارقىلى ۇرپاقتى تاربيەلەۋگە بولادى. سول كينو ارقىلى جاستاردى ىشىمدىكتەن، ناشاقورلىقتان ساقتاندىرۋعا بولادى. سول كينو ارقىلى ۇلتجاندىلىقتى وياتۋعا بولادى.

وكىنىشكە قاراي ءبىز قازىر سپورتشىلاردى تەك كليپقا عانا ءتۇسىرىپ ءجۇرمىز. جەڭىسپەن كەلگەندە جاڭالىقتان ايتىپ، 1-2 توك- شوۋدان كورسەتىپ، مەكتەپ وقۋشىلارىمەن كەزدەستىرىپ قويامىز. وسىمەن ناسيحاتى ءبىتتى. كەلەسى جارىستان التىن الىپ كەلگەنشە ول تۋرالى ەستىمەيمىز» دەگەن جۋرناليست قازاق باتىرى بەكزات ساتتارحانوۆ تۋرالى فيلم تۇسىرىلسە، ونى كورۋگە بارمايتىن قازاقتىڭ بولمايتىنىن، قانات يسلام تۋرالى كينونى كورەرمەن ىزدەپ كورەتىنىن العا تارتقان. سونىمەن قاتار كينونى بيزنەس رەتىندە الىپ قاراساق، كەتكەن شىعىن ەكى ەسە ەتىپ قايتاتىنىنا كۇمان كەلتىرمەگەن.

«ءبىز ۇندىلەر قۇرلى جوقپىز با؟ ولار وليمپيادانىڭ قولا جۇلدەگەرلەرىنە كينو ءتۇسىرىپ جاتىر. بىزدە وليمپيادادان التىن العان سپورتشىلار قانشاما؟! ەلىمىزدىڭ كوك تۋىن جەلبىرەتىپ جۇرگەن باتىرلار تۋرالى ءوزىمىز ءبىر كينو تۇسىرە المايمىز با؟ ولاردى ءبىز دارىپتەمەسەك، بولليۆۋد كەلىپ بەكزات تۋرالى، ا ق ش كەلىپ قانات تۋرالى، فرانسۋزدار جاقسىلىق تۋرالى كينو ءتۇسىرىپ بەرمەيدى عوي. ونداي كينو ءتۇسىرۋ ءۇشىن ويدان وقيعا قۇراستىرۋدىڭ دا كەرەگى جوق. ءبىزدىڭ سپورتشىلاردىڭ ءومىرى دايىن كينو. شىركىن-اي، قازاق سپورتشىلارى تۋرالى كينو ءتۇسىرۋدى بىرەۋ قولعا السا ەكەن؟! بايان حانىم، بۇل جوبا ءسىزدىڭ قولىڭىزدان كەلەدى دەپ ويلايمىن. بيىل نە كەلەسى جىلى جوبانى قولعا الساڭىز، قۋانار ەدىك!» - دەپ ويىن تۇيىندەگەن بلوگەرتانىمال پروديۋسەر بايان ەسەنتايەۆاعا وسىلايشا سالەمدەمە جولدادى.