باۋىرجان مومىش ۇلىنىڭ باتاسى
ول جولشىباي ءوزىنىڭ تۋعان جەرى - جۋالى اۋدانىندا (جامبىل وبلىسى) 4-5 كۇن ايالدايدى. باتىر اعامىزدىڭ جانىنا وبلىستىڭ، اۋداننىڭ ءبىراز باسشى قىزمەتكەرلەرى ەرىپ جۇرەدى. اۋىل اقساقالدارىمەن بىرگە جاقسى سوزگە جانى قۇمار جاستار دا باۋكەڭنىڭ اڭگىمەسىن تىڭدايدى.
ساپارىنىڭ سوڭعى كۇنى باۋكەڭ جالعىز بالاسى سوعىستا قازا بولعان قاسىرەتتى قاريانىڭ ءبىرىنىڭ ۇيىنەن ءدام- تۇز تاتىپ شىقپاقشى بولادى. قانشا ءۇيدىڭ ءدامىن تاتسا دا، استان كەيىنگى باتا بەرۋدى اۋىل اعالارى اتقارادى. ەندى ەلدەن اتتانار الدىنداعى ءدام- تۇزدىڭ باتاسىن بەرۋدى جۇرت باۋكەڭنەن وتىنەدى. باۋكەڭ ءسال ويلانادى دا، تەبىرەنە ءتۇسىپ، بىلايشا تەرمەلەپ كەتەدى:
ە، جاراتۋشى جاساعان!
تىلەگىمىزدى قابىل ەت،
يمانىمىزدى كامىل ەت،
دوزاقتاعى وتتان ساقتا،
قاڭعىرعان وقتان ساقتا،
پاراقور سوتتان ساقتا.
كىرلى سۋمەن جۋىستان ساقتا،
ىنتىماقسىز تۋىستان ساقتا.
قارا جۇرەك باتىلدان ساقتا،
دايەكسىز ءتىل تاقىلدان ساقتا.
ادالدىقتى ارباعان اقىننان ساقتا،
اشۋ جەڭگەن اقىلدان ساقتا،
قايىرىمسىز جاقىننان ساقتا.
قاتە ىسىنە قينالماس،
كوك دولى قاتىننان ساقتا.
حالىقتى زابىرلەر باستىقتان ساقتا.
جاقىنعا جالا جاباتىن
قانقۇيلى قاستىقتان ساقتا.
سىرتى سۇلۋ، ءىشى كىر،
قادىر بىلمەس پاسىقتان ساقتا.
ءوز پىكىرى تاتىمسىز،
كىسى اقىلىمەن كۇن كورەر،
تاتىمى جوق جاسىقتان ساقتا.
نەسىبە كەسەر كەسىردەن ساقتا،
جولى لاس جەسىردەن ساقتا.
كەۋدەسىن كەرگەن كەلىننەن ساقتا،
مەزگىلسىز كەلگەن ولىمنەن ساقتا.
جالقاۋ بالا نامىسسىز،
وجدانى جوق ۇلدان ساقتا.
تۇنەرە اتقان تاڭنان ساقتا،
جاڭبىرى جوق شاڭنان ساقتا.
اكىمىندە شاپاعات جوق،
ادىلدىكتە شاراپات جوق،
مولداسىندا شاريعات جوق،
بايلارىندا سالاۋات جوق،
كەدەيىندە قاناعات جوق،
ۇلكەنىندە ۇلاعات جوق،
كىشىسىندە ينابات جوق،
ازاماتىندا ار- ۇيات جوق،
كورشىسىندە قوشەمەت جوق،
قارياسىندا باتا جوق،
سوزدەرىندە ءپاتۋا جوق،
قۇر ايقاي، شات- شالەكەي داڭنان ساقتا.
ە، جارتۋشى جاساعان!
ءومىر بەرسەڭ - جايلىعىن بەر،
داۋلەتى مەن بايلىعىن بەر.
ەڭبەگىمىز ءونىستى بولسىن،
قامبامىز جەمىستى بولسىن.
كوسەگەمىز كوركەيىپ،
مىڭعىرعان مال ورىسكە تولسىن.
قاريانى كەمەل، سىپايى عىپ بەر،
اعالاردى رايلى عىپ بەر،
اپالاردى مەيىرلى عىپ بەر،
جەزدەلەردى زەيىندى عىپ بەر،
قۇداعيدى كەڭ پەيىلدى عىپ بەر،
قارىنداستى كورىكتى عىپ بەر،
ىنىلەردى بورىكتى عىپ بەر.
ايەلدى اق نەكەلى عىپ بەر،
بالانى قانى تولىق شەكەلى عىپ بەر.
جيەندەردى جەتەلى عىپ بەر،
كۇيەۋلەردى كوشەلى عىپ بەر،
ەكى ايتپايتىن ەسەلى عىپ بەر،
كەلىندەردى كەلىستى عىپ بەر.
قىزداردى باقىتىمەن
ۇرپاعى كوپ ءورىستى عىپ بەر.
اتتاردى جەلىستى عىپ بەر،
اعاشتاردى جەمىستى عىپ بەر،
توسكەيدە ءتول كوبەيسىن.
جايقالتىپ دالا ەگىستى عىپ بەر،
ءدانى تولىق ءونىستى عىپ بەر.
ۇرپاقتاردى نامىستى عىپ بەر،
تۇلپاردى شابىستى عىپ بەر.
ءيا، جومارت جاساعان!
ايتقانىمنىڭ بارلىعىن،
اعايىندى اقاۋسىز
ونەگەلى ومىرمەن تاتۋ- ءتاتتى،
تابىستى عىپ بەر!
اۋمين!
اللاھۋاكپار!
namys.kz
