ءجازيرا جاپپارقۇل: ريوعا مايا مانەزا ەكەمىزدىڭ قايسىمىزدى اپاراتىن باپكەرلەر شەشەدى
بۋىنى بەكي قويماعان قىز ەرەسەكتەر باسەكەسىنە العاش قوسىلعاندا-اق قارىمدىلىعىن بايقاتتى. 2010- جىلى سينگاپۋردە وتكەن جاسوسپىرىمدەردىڭ وليمپياداسىنان التىن مەدالمەن ورالعان ءجازيرا 2014-جىلى الماتىدا، بىلتىر ا ق ش- تا وتكەن الەم چەمپيوناتتارىندا كۇمىس جۇلدە ولجالادى.
قازاق سپورتىنىڭ تاريحىندا الەم چەمپيوناتىنىڭ مەدالىن يەلەنگەن قازاق قىزى جوق ەدى بىزدە. ءجازيرانىڭ ەكى كۇمىسى ويسىراعان ولقى تۇسىمىزدى بۇتىندەپ بەردى. «ەندىگى ارمانىم - ريو-دە-جانەيرو جازعى وليمپياداسىنىڭ التىن مەدالىن ەلىمە الىپ بەرۋ. قازاق بالاسى دا وليمپيادا چەمپيونى اتانۋعا قاقىسى بار ەكەنىن دالەلدەگىم كەلەدى» دەگەن جازيرامەن جاتتىعۋ اراسىندا از-كەم تىلدەستىك. جاسوسپىرىمدەر مەن جاستار اراسىنداعى الەم چەمپيوناتىنىڭ التىن مەدالىن يەلەنگەن ءجازيرانىڭ جاسى قازىر 22 دە.
- ءجازيرا، بىلتىرعى جىل دا ەلىمىزدىڭ سپورتى ءۇشىن تابىستان قىسقان جوق. قوي جىلىندا جۇلدە جاۋدىرعان ساڭلاقتىڭ ءبىرى ءوزىڭسىڭ. ا ق ش- تاعى الەم چەمپيوناتىنان كۇمىس جۇلدەمەن ورالدىڭ.
- 2014-جىلى الماتىدا وتكەن الەم چەمپيوناتىنىڭ كۇمىس مەدالى بۇيىردى. جاسىراتىنى جوق، كۇمىس مەدال كەۋدەمدە جارقىراعاندا ەرەكشە تولقىدىم. بىلتىرعى تابىسىمدى دا قومسىنبايمىن. ءبىراق مەنىڭ ارمانىم - اۋىر اتلەتيكادان وليمپيادا چەمپيونى اتانۋ. ءازىر تەك جاتتىعۋدى عانا ويلاپ ءجۇرمىز. ءبىرەر كۇندە الماتى وبلىسىنىڭ تەكەلى قالاسىندا وقۋ-جاتتىعۋ جيىنىن باستايمىز.
- اۋىر اتلەتيكادان حالىقارالىق فەدەراتسيانىڭ دوپينگ داۋىنا ءبىزدىڭ دە اتلەتتەرىمىز ىلىكتى.
- بۇل ءالى شەگىنە جەتكەن ءىس ەمەس. اقيقاتى زەرتتەۋدەن كەيىن بەلگىلى بولادى. سپورتشى دا ادام، ونىڭ دا اعزاسى شارشايدى، كۇيزەلىسكە ۇشىرايدى، سىرقاتقا شالدىعادى. مىسالى تۇماۋراتىپ، سۋىق تيسە، ءدارى-دارمەك ىشۋى مۇمكىن. راس، كەيبىر ءدارىنىڭ قۇرامىنداعى زات گورمونولدىق وزگەرىسكە ۇشىراتۋى مۇمكىن. ءبىزدىڭ قاسىمىزدا ۇنەمى دارىگەرلەر جۇرەدى. «مىنا ءدارىنى ىشۋگە بولمايدى، مىناعان رۇقسات» دەپ كەڭەستەرىن ايتادى.
- 69 كەلى سالماقتا سىنعا ءتۇسىپ جۇرگەنىڭە بىرنەشە جىل بولدى. كەيبىر سپورتشىلار جىل وزعان سايىن قورعاسىنداي اۋىرلاپ، وزگە سالماققا اۋىسىپ كەتەدى. ماسەلەن، لوندون وليمپياداسىنىڭ چەمپيونى سولتۇستىك كورەيالىق ليم دجون سيم 69 كەلىدەن 75 كەلىگە اۋىستى.
- مەنىڭ سالماعىم ەرتەرەكتە 69 كەلىگە تولمايتىن. مەنىڭ سالماعىم جاتتىعۋدان تىس كەزدىڭ وزىندە 71 كەلىدەن اسپايدى. اۋىر اتلەتيكادا سالماعىڭدى 2 كەلىگە دەيىن جەڭىلدەتۋ اسا قيىنعا سوقپايدى. ال 6-7 كەلىدەن ارتىق سالماق تاستاساڭ، ارينە، قالجىرايسىڭ. 2010-جىلى سينگاپۋردە وتكەن جاسوسپىرىمدەردىڭ وليمپياداسىنا قاتىساردا عانا سەگىز كەلىدەن ارىلدىم. ال ەرەسەكتەر ساپىنا قوسىلعان سوڭ دا ءۇش جىلداي سالماعىم 69 كەلىگە تولعان جوق. سوندىقتان دا مەن سالماق ماسەلەسىنە وزگەلەر سەكىلدى باس قاتىرمايمىن.
- حيۋستونداعى الەم چەمپيوناتىنا ازىرلىك قالاي ءوتتى؟ ا ق ش- تاعى الەم چەمپيوناتىندا الماتىدا كوتەرگەن زىلتەمىردى ەڭسەرە المادىڭ.
- دايىندىق ويلاعانىمىزداي بولدى. 2014-جىلى الماتىداعى الەم چەمپيوناتىندا جۇلقي كوتەرۋدە 118 كەلىنى، سەرپي كوتەرۋ سىنىندا 144 كەلىنى ەڭسەردىم. ا ق ش- قا اتتاناردا بۇرىنعى ناتيجەدەن 4-5 كەلىگە ارتىق كوتەرىپ ازىرلەندىك. جاتتىعۋداعى جەتىستىگىڭدى سايىس كەزىندە كورسەتە الماي قالاسىڭ. مىسالى ءبىز جاتتىعۋدا جۇلقىپ 120 كەلىنى، سەرپىپ، 152 كەلىنى كوتەرىپ ءجۇرمىز. ءبىراق جارىسقا شىققانداعى كوڭىل-كۇي مەن سەزىمىڭ تىپتەن بولەك.
- حيۋيۋستونداعى الەم چەمپيوناتىندا قازاق ەلىنىڭ قۇراماسى كوماندالىق ەسەپتە ۇزدىك ۇشتىككە ەنىپ، ريو-دە-جانەيرو جازعى وليمپياداسىنا تولىق قۇرامدا قاتىسۋعا مۇمكىندىك الدى. دەگەنمەن دە 69 كەلىدە كىمنىڭ قاتىساتىنى بەلگىسىز. بۇل سالماقتا الەم چەمپيوناتىندا 9-ورىن العان مايا مانەزا دا بار.
- ريو-دە-جانەيرو جازعى وليمپياداسىنا قاي سپورتشىنىڭ باراتىنىن باپكەرلەر شەشەدى. وليمپيادانىڭ جولداماسى ۇلەستىرىلگەن سايىستاردا قاي سپورتشى جوعارى ناتيجەگە قول جەتكىزەدى سوعان سەنىم ارتۋ - باپكەردىڭ شارۋاسى. ال ءبىزدىڭ ماقسات - جاراقاتتانباي، جاتتىعۋدا دا، جارىستا دا جوعارى ناتيجە كورسەتۋ.
- وتباسىڭدا جەتى قىزدىڭ كەنجەسى ەكەنسىڭ. اتا-اناڭ، اپكەلەرىڭ سپورتتى تاڭداۋىڭا قارسى بولعان جوق پا؟
- وتباسىمىزداعى جەتى قىزدىڭ ءسۇت كەنجەسى بولعاندىقتان، ەركەلەپ ءوستىم. اۋىر اتلەتيكا ۇيىرمەسىنە بارماقشى بولعانىمدا اتا-انام دا، اپكەلەرىم دە بىردەن قۇپتاي قويعان جوق. بالا كەزىمنەن ۇل سەكىلدى قيمىلداپ، جىلدام بولعانىمدى بىلگەندىكتەن شىعار، مەسەلىمدى قايتارمادى. زىلدەي تەمىردى كوتەرە بەرگەندىكتەن قىز بالا بالا كوتەرە الماي قالادى دەپ توپشىلايدى. العاشىندا وسى جاعىن ويلاپ قارسى بولعان اتا-انام دا، اپكەلەرىم دە قازىر مەنىڭ جانكۇيەرلەرىم. جارىسقا شىعارىپ سالىپ، ساپارىمنان جەڭىس تىلەپ وتىرادى.
سۇحباتتاسقان ن. كوشەك
«جاس الاش»
