اقمولا وبلىسىندا ەڭ ۇزدىك بالىقشى انىقتالدى - فوتو

كوكشەتاۋ. قازاقپارات - اقمولا وبلىسىندا بالىقشىلار فەستيۆالى ءوتتى.

 وبلىستىق دەنەشىنىقتىرۋ جانە سپورت باسقارماسىنىڭ ۇيىمداستىرۋمەن وتكەن شاراعا اقمولا وبلىسىمەن قاتار، سولتۇستىك قازاقستان وبلىسىنان كەلگەن 122 ادام قاتىستى. ونىڭ 8- ءى ايەلدەر.

سايىستىڭ العاشقى كەزەڭىندە قاتىسۋشىلار جىلدامدىق سىناپ كوردى. ءاربىر قاتىسۋشى 3 مينۋتتىڭ ىشىندە مۇزدى شاماسى كەلگەنشە كوبىرەك ويۋى كەرەك بولدى.

وسى ورايدا يۋري لۋنگا مۇزدى 8 رەت تەسسە، ۆاديم گابدراحيموۆ پەن دەنيس ەيسمان 6 ويىق جاساپ ۇلگەردى.

 ال ەكىنشى كەزەڭدە بارلىق قاتىسۋشىلارعا 2,5 ساعات ۋاقىت بەرىلدى. وسى ۋاقىتتا كىمنىڭ قارماعى كوبىرەك تارتىپ، بالىقتى بارىنشا كوپ اۋلاعان جەڭىمپاز اتاناتىن بولدى. بۇل كەزەڭدە ەڭ كوپ بالىق اۋلاعان ۆيكتور ەۆدوكيموۆ (2,5 ساعاتتا 41 بالىق) بولسا، 40 بالىق ۇستاعان الەكساندرا جۇماعاتوۆ جانە 26 بالىقتى قارماعىنا ىلگەن ەۆگەني سكالسكي ۇزدىك ناتيجە كورسەتتى.

 ەكى كەزەڭنىڭ قورىتىندىسى بويىنشا 47,5 ۇپاي جيناعان يۋريي لۋنگا ءبىرىنشى ورىن، 42 ۇپاي جيناعان الەكساندر جۇماعاتوۆ ەكىنشى جانە 35,5 ۇپاي جيناعان ۆاديم گابدراحيموۆ ءۇشىنشى ورىن يەلەندى.