سەمەيدە «گازەل» اۆتوكولىكتەرى قۇراستىرىلىپ جاتىر
بۇعان دەيىن كورەيدىڭ Daewoo اۆتوبۋستارىن، رەسەيدىڭ «ۋرال» جۇك كولىكتەرىن جانە «بەلارۋس» تراكتورلارىن شىعارىپ كەلگەن «سەماز» كاسىپورنى بيىل 300 «گازەلدى» تۇتىنۋشىعا ۇسىنۋدى جوسپارلاپ وتىر.
جاڭا جەلىنىڭ ىسكە قوسىلۋىمەن جۇمىس ورىندارى دا كوبەيە تۇسپەكشى. جاڭا كولىككە تاپسىرىستار قازىردىڭ وزىندە كوپ ءتۇسىپ جاتىر. تەمىر تۇلپاردىڭ ۇزىندىعى - 6 مەتر، بيىكتىگى 3 مەترگە جۋىق، 120 اتتىڭ كۇشى بار.
قازاقستاندىق «گازەلدىڭ» ءوز ەرەكشەلىگى بار. جەرگىلىكتى قۇراستىرۋشىلار جولاۋشىلاردىڭ ءمىنىپ-تۇسۋىنە ىڭعايلى بولۋى ءۇشىن اۆتوبۋسقا ەكىنشى ەسىك جاساماقشى. بولاشاقتا بىرتىندەپ قوسالقى بولشەكتەر مەن كولىكتىڭ قاڭقاسىن دا وزىمىزدە جاساپ، قازاقستاندىق مازمۇنعا دەن قويىلادى.
بۇل زاۋىتتا قازىر 400 ادام ەڭبەك ەتىپ ءجۇر، جاڭا وندىرىستىك جەلىگە تاعى 50 ادام جۇمىسقا تۇرماق. بيىل شىعىس قازاقستان وبلىسىنىڭ اكىمدىگى وسكەمەن جانە سەمەي قالالارىنداعى اۆتوبۋس پاركتەرىنە وتاندىق ءونىم الۋدى جوسپارلاپ وتىر. ءار قالاعا 100 اۆتوبۋستان الىنباقشى. تابيعي گازبەن جۇرەتىن ەكولوگيالىق تازا 35 Daewoo اۆتوبۋسى قازىردىڭ وزىندە الماتى قالاسىنا جونەلتىلۋگە دايىن تۇر، دەپ جازادى 24.kz.
