اقشا قۇيىلار سالاسىن ءوزى ىزدەيدى - ت. بەكمامبەتوۆ
قازاقپارات وسى سۇحباتتىڭ ىقشامدالعان نۇسقاسىن وقىرمان نازارىنا ۇسىنادى.
«الەمدىك نارىققا شىعۋ ءۇشىن كوپ جۇمىس ىستەۋ قاجەت»
- ءسىز قىركۇيەك ايىندا ءوزىڭىزدىڭ «حاردكور» اتتى اتىس- شابىس جانرىنداعى ءفيلمىڭىزدىڭ الەمدىك ديستريبۋتسيالاۋ قۇقىعىن امەريكاندىق STX Entertainment ستۋدياسىنا رەسەيلىك كينو ءۇشىن تەڭدەسسىز سوماعا، 10 ميلليون دوللارعا ساتتىڭىز. مۇنان بولەك، ولار فيلمدى ىلگەرىلەتۋ ءۇشىن تاعى 20 ميلليون دوللار قۇيادى. مۇنداي ناتيجەگە قالاي قول جەتكىزە الدىڭىز؟
- ءيا، مەنىڭشە، مۇنداي كەلىسىم بۇعان دەيىن بولعان ەمەس. STX ءبىزدىڭ شىعىندارىمىزدى جابۋعا جەتكىلىكتى سومانى تولەدى. فيلممەن ءالى دە جۇمىستار جۇرگىزىلىپ جاتىر جانە ول ازىرشە پروكاتقا (ا ق ش- تاعى كورسەتىلىمى 2016 -جىلدىڭ 8 -ساۋىرىنە جوسپارلانعان) شىقپايدى، شىعىستار جالعاسۋ ۇستىندە. ولار سياقتى ءبىز دە فيلمنىڭ الەمدىك كورسەتىلىمى بارىنشا تابىستى بولادى دەپ ۇمىتتەنىپ وتىرمىز.
مەن ءۇشىن تورونتودا وتكەن فيلمنىڭ پرەمەراسى («حاردكوردىڭ» الەمدىك تۇساۋكەسەرى 2015 -جىلدىڭ 12 قىركۇيەگىندە ءوتتى) بارىنشا ماڭىزدى بولدى. يليا (فيلمنىڭ رەجيسسەرى نايشۋللەر) ەكەۋىمىز تاكسيمەن كينوتەاترگە كەتىپ بارا جاتقانىمىزدا كەزەكتە تۇرعان حالىقتىڭ قاراقۇرىم ەكەندىگىن كوردىك. كەزەك بۇكىل ءبىر قالا ورامىن الىپ، كينوتەاتردىڭ الدىنا دەيىن جەتىپ جاتتى.
- فيلمنىڭ بيۋدجەتى قانشا؟
- جوعارىدا اتاپ وتكەنىمدەي STX- پەن جاسالعان كەلىسىمشارت سوماسى بارلىق مىندەتتەمەلەر مەن فيلم بيۋدجەتىنىڭ ءبىر بولىگىن جابۋعا جەتكىلىكتى بولدى. نەگىزىنەن «حاردكورگە» تۇسكەن ادامداردىڭ باسىم بولىگى اقشا ءۇشىن جۇمىس ىستەگەن جوق. ويتكەنى، بۇل يليانىڭ العاشقى ءفيلمى جانە Bazelevs Production مەن يليانىڭ كومانداسى يدەيا ءۇشىن جۇمىس ىستەدى.
- «حاردكور» سىندى رەسەيلىك كينولاردىڭ شەتەلدە كورسەتىلۋى جانە ساتىپ الىنۋى ءۇشىن نە ىستەۋ كەرەك؟
- مەن كەز كەلگەن فيلمنىڭ ەڭ الدىمەن ءوز ەلىندە كورسەتىلگەنى دۇرىس ەكەندىگىنە سەنىمدىمىن. دەگەنمەن، فرانتسياداعى، قىتايداعى، امەريكاداعى جانە رەسەيدەگى جاستار ءبىر- بىرىنە قاتتى ۇقسايدى. امەريكادا ءوز كورەرمەنىن تاپقان تۋىندى رەسەيدە دە ءوز كورەرمەنىن ەركىن تابا الادى. ال الەمدىك نارىققا شىعۋ ءۇشىن كوپ جۇمىس ىستەۋ قاجەت.
- قيىن ساياسي احۋال باتىستا ءسىزدىڭ جۇمىستارىڭىزعا اسەر ەتتى مە؟
- جوق، ەشقانداي اسەرى بولعان ەمەس. قۇدايعا شۇكىر، امەريكادا ادامدار سىرتقى ساياساتقا قاتتى قىزىعۋشىلىق تانىتا بەرمەيدى.
«رەسەي كينوسىنا مەملەكەتتىك قولداۋ 2-3 فۋتبولشىنىڭ قۇنىنا تەڭ»
- ءسىز بىردە رەسەيدىڭ امەريكادان ايىرماشىلىعى ءىس جۇزىندە كينو يندۋسترياسىنىڭ جوقتىعىندا، دەگەن ەدىڭىز. ال ونىڭ پايدا بولۋى ءۇشىن نە ىستەۋ قاجەت؟
- ەڭ بىرىنشىدەن، حالىقارالىق ساناتتاعى يدەيالار قاجەت. ەكىنشىدەن، ەرىك- جىگەر مەن كوپ اقشا، مول جۇيەلى تۇردە قارجى كەرەك. تاۋەكەلگە بارىپ ءبىر جاقسى فيلم تۇسىرۋگە جۇمسالعان قارجى يندۋستريا قالىپتاستىرۋعا سەپتىگىن تيگىزە المايدى. ۇزاقمەرزىمدى ينۆەستيتسيا قاجەت.
رەسەي كينوسىنىڭ تاعدىرىنا، كينەماتوگرافيانى قولداۋ بيۋدجەتىنە ارنالعان كەزدەسۋدە تانىمال ساياساتكەرلەردىڭ ءبىرى تالقىلانىپ جاتقان ماسەلەنىڭ قۇنى ەكى فۋتبولشىنىڭ قۇنىمەن تەڭەسەتىندىگىن ايتقان ەدى. رەسەي كينوسىمەن بارلىق مەملەكەتتىك قولداۋدىڭ كولەمى رەسەيلىك كلۋبتار شاقىراتىن 2-3 شەتەلدىك فۋتبولشىنىڭ قۇنىمەن عانا تەڭ. كينودا مۇنان ءبىرشاما مول قارجى بولۋى ءتيىس. ال ول تولىق ورىندالعان كەزدە كينو يندۋسترياعا اينالىپ، تەك ءوز نارىعىندا عانا ەمەس، سونىمەن بىرگە «وزگەنىڭ الاڭىندا» دا تابىستى ويىن ورنەگىن جۇرگىزە الار ەدى.
- فيلمدەرىڭىزگە اقشانى قايدان الاسىز؟
- باستاپقىدا بىزدەرگە «ءبىرىنشى ارنامەن» ىنتىماقتاستىق زور دەمەۋ بولدى. «شولعىنشى» جانە «تاعدىر تالكەگى» فيلمدەرىنە ءبىزدىڭ نەگىزگى ينۆەستور ءار سەرىكتەس بولدى. ءسال كەيىنىرەك كينو قورى زور كومەك بەردى. كينو قورى باستاپقىدا «ەلكي» (2010-2014 -جىلدارى «ەلكي»، «ەلكي 2»، «ەلكي 3» جانە «ەلكي 1914» ) فيلمدەرىن، ودان كەيىن «گوركو!» (2013-2014 جىلدارى - «گوركو!» جانە «گوركو! 2» ) فيلمدەرىن تۇسىرۋگە جاردەم بەردى. ءبىز بۇل فيلمدەردى تۇسىرۋگە ەمەس، ولاردى ىلگەرىلەتۋ ءۇشىن مول قارجى جۇمسادىق. ەگەردە كينو قورى بولماعان جاعدايدا ءبىز مۇنى جاساي المايتىن ەدىك: فيلمدى ىلگەرىلەتۋ ءۇشىن قاجەتتى ينۆەستيتسيا ءبىزدىڭ مۇمكىنشىگىمىزبەن مۇلدەم قيىسپايتىن. «ەلكي» حالىقتىڭ سۇيىكتى تۋىندىلارىنا اينالىپ، ءبىزدىڭ كاسىپورنىمىزدىڭ تىرەگى بولدى. تۇسكەن كىرىستى كەلەسى ءفيلمدى قارجىلاندىرۋعا سالدىق. وسىلايشا وستىك.
- ءبىر فيلمنەن تۇسكەن تابىس كەلسى تۋىندىنىڭ بۇكىل بيۋدجەتىنە جەتكىلىكتى بولا ما؟
- ءار ۋاقىتتا دا ءارقيلى بولىپ كەلەدى. جالپى، بارلىق ماسەلە اقشادا ەمەس. ءبىز جوبانى قولعا العان كەزىمىزدە تەك اقشا عانا ەمەس، ەڭ الدىمەن سەرىكتەس ىزدەيمىز. اقشا - بۇل ينۆەستيتسيا ەلەمەنتتەرىنىڭ ءبىرى عانا. تەلەارنالارمەن جۇمىس بارىسىندا بىزدەر ءۇشن ينۆەستيتسيا ەمەس، سەرىكتەستىك بارىنشا ماڭىزدى.
«ەلكيدىڭ» ءۇشىنشى فيلمىمەن جۇمىس ىستەۋ بارىسىندا انتون زلاتوپولسكي (ۆ گ ت ر ك باس ديرەكتورىنىڭ ءبىرىنشى ورىنباسارى) ۆ گ ت ر ك- نىڭ تىلشىلەر جەلىسى ارقىلى بىزدەرگە فيلمنىڭ اۋقىمدى اكسياسىن - جاڭا جىلدى جاز ايىندا ۋفادا، پەرمدە، الماتىدا، كالينينگرادتا، ماگنيتوگورسكىدە، يركۋتسكىدە، سانكت- پەتەربوردا، ۆلاديكاۆكاز بەن ەكاتەريبۋرگتە قارسى الۋدى ۇيىمداستىردى. بۇل فيلمدى ىلگەرىلەتۋدىڭ بىرەگەي تەتىگىنە اينالدى. اقشانى بانكتەن دە تابۋعا بولادى. ال سەرىكتەستىك قارىم- قاتىناس پەن كينو بولاشاعىنا دەگەن سەنىمدى ساتىپ الا المايسىڭ.
بۇگىندە ءبىز عالامتوردىڭ قارقىندى دامۋىنا كۋامىز. الەۋمەتتىك جەلىلەرمەن، عالامتور رەسۋرستارمەن سەرىكتەستىكتىڭ ماڭىزى ارتىپ كەلەدى. بۇگىندە ءبىز RuTube جانە «ۆكونتاكتە» - مەن جۇمىس ىستەۋدەمىز. ولار ءبىزدىڭ «نا ەكرانە» رەاليتي- شوۋىنداعى سەرىكتەستەرىمىز.
- داعدارىس جۇمىستارىڭىزعا قالاي اسەر ەتۋدە؟ ويتكەنى، تەلەارنالاردىڭ تابىستارى تومەندەدى. ەندىگى ۋاقىتتا ولار فيلمگە بۇرىنعىداي قارجى سالا المايدى عوي.
- رەسەيدەگى تابىسىمىز ايتارلىقتاي تومەندەدى. كەمىندە 2 ەسە، ءتىپتى ودان دا كوپ قىسقارۋى مۇمكىن. دەگەنمەن ءبىز «حاردكور» مەن «ون - دراكون» فيلمدەرىنىڭ حالىقارالىق كورسەتىلىمى تابىستى بولادى دەپ ءۇمىت ارتامىز. ال بۇل بىزدەرگە جاعدايدى تەڭەستىرۋگە سەپتىگىن تيگىزەدى.
- جوبانىڭ ءوز شىعىنىن وتەۋ تۇرعىسىنان الىپ قاراعاندا، ءسىز ەڭ تابىستى پروديۋسەر ءارى رەجيسسەرسىز. شىعارماشىلىق پەن كوممەرتسيالىق تاريحتى قالاي ۇشتاستىرا الاسىز؟
- مەن بيزنەسمەن ەمەسپىن. ءبىزدىڭ كومپانيامىز دا بيزنەس كاسىپورىنى ەمەس. 20 جىلدان بەرى جۇمىس ىستەپ تۇرعان Bazelevs Production كومپانياسىندا بيزنەسمەندەر ەمەس شىعارماشىلىق ادامدارى قىزمەت ەتەدى. ولار ىنتالاندىراتىن ەڭ باستى كۇش - بۇل شىعارماشىلىق. ادەتتە بيزنەسمەندەر بۇل پروتسەسكە تەك قىزمەت قانا كورسەتەدى. ەگەر تالانتتى ادامدار بولسا، ولاردىڭ ىمىراسىز باستامالارى بولسا وندا اقشانىڭ وزدىگىنەن تابىلاتىندىعىنا سەنىمىم مول. اقشا قۇيىلار سالاسىن ءوزى ىزدەيدى.
اۆتور: مارلان جيەمباي
