قىتايدا زەينەتكە شىعۋ جاسى ۇلعايتىلماق
بۇگىندە بۇل ەلدە ەر- ازاماتتار - 60، ال ايەلدەر جۇمىس ىستەگەن سالاسىنا قاراي 50-55 جاسىندا قۇرمەتتى دەمالىسىنا شىعادى. ازىرگە جاڭا زەينەت جاسىنا قانشا جىل قوسىلاتىنى بەلگىسىز. بەلگىلىسى - بيلىك وسىنىڭ ارقاسىندا ءۇش نەگىزگى ماسەلەنى شەشپەكشى. ولار: جۇمىس كۇشىنىڭ جەتىسپەۋشىلىگى، زەينەتاقى قورىنا تۇسەتىن سالماق جانە ەكونوميكا دامۋىن قالىپتى ۇستاۋ.
قىتايدىڭ ەڭبەك رەسۋرستارى جانە الەۋمەتتىك قامتاماسىز ەتۋ مينيسترلىگىنىڭ زەرتتەۋشىسى تسزين ۆەيگاننىڭ مالىمەتى بويىنشا، 2015 -جىلى 16-60 جاس ارالىعىنداعى قىتاي تۇرعىندارىنىڭ سانى 5 ميلليون ادامعا دەيىن قىسقارعان. 80- جىلدارى ەنگىزىلگەن «ءبىر وتباسىعا - ءبىر بالا» ساياساتى جۇرگىزىلگەندىكتەن، ەڭبەككە قابىلەتتى جاستار سانى دا وسىنشا كەمىپتى. بۇگىندە قىتايدا جاسى 60 تى ەڭسەرگەن ازاماتتار سانى 200 ميلليوننان اسادى. بۇل ەل تۇرعىندارىنىڭ %16 ى ەكەن.
جاعدايدى رەتتەمەسە، 2050 -جىلعا قاراي اتالمىش كورسەتكىش ەكى ەسە وسپەك. جەرگىلىكتى اقپارات قۇرالدارى بۇل جوسپار بەسجىلدىق وتپەلى كەزەڭنەن كەيىن، 2020 -جىلعا قاراي ىسكە اسۋى مۇمكىن دەپ جازادى. ال تۇرعىندار بولسا اتالمىش جاڭالىقتى ءارقالاي قابىلداۋدا.
