ريودا لوندونداعى جەتىستىكتى قايتالاي الامىز با؟
ءتورتجىلدىق دودانىڭ ءدۇبىرى جاقىنداعان سايىن اركىمنىڭ كوڭىلىندە «برازيليا تورىندە لوندونداعى جەتىستىكتى قايتالاي الامىز با؟» دەگەن ساۋالدىڭ جۇرگەنى انىق.
قازاقستان سپورتشىلارى قازىرگە دەيىن، XXXI جازعى وليمپيادا ويىندارىنا 46 جولداما الىپ ۇلگەردى.
ءالى الداعى ۋاقىتتا كوپتەگەن جولدامالار ساراپقا سالىناتىن «بايگەلەردە» بۇل كورسەتكىشتى ەسەلەي تۇسەدى دەگەن سەنىمدەمىز. سەبەبى، بۇعان دەيىنگى وليمپيادا ويىندارىنا ەلىمىزدەن ەڭ كەمىندە توقسان سپورتشىدان كەم بارعان كەزى بولعان جوق.
تاۋەلسىزدىك العان جىلداردان بەرگى باستى دوداعا قاتىسقان سپورتشىلارىمىزدىڭ سانىنا كوز جۇگىرتسەك، ءار ءتورت جىل سايىن سپورتشىلار مەن جولدامالار سانى بىرتىندەپ ءوسىپ وتىرعانىن بايقاۋعا بولادى. سوڭعى لوندون وليمپياداسى كەزىندە ەل نامىسىن سپورتتىڭ 20 تۇرىنەن 115 سپورتشى قورعادى. بيىل دا جولدامالار سانىن وسى كورسەتكىشكە جەتكىزۋ كوزدەلىپ وتىر.
الايدا، بىزگە ەڭ ماڭىزدىسى جولدامالار سانى ەمەس، سپورتشىلاردىڭ ساپاسى ەكەنىن باستى نازاردا ۇستاۋدى ۇمىتپاعانىمىز ابزال. لوندون وليمپياداسىنان بەرى ءتورت جىل وتسە دە سول كەزدەگى قازاقستان سپورتشىلارىنىڭ جارقىن جەڭىسى ءالى دە كوز الدىمىزدا.
تاريحىمىزدا بۇرىن سوڭدى بولماعان جەتىستىككە جەتكەن ەلىمىزدىڭ سپورتشىلارى 200 مەملەكەتتىڭ اراسىندا 12-ورىن العاندا قاي قازاق بوركىن اسپانعا اتپادى؟! سودان بەرى ءبىراز ۋاقىت ءوتتى.
ەندى بيىلعى ريو وليمپياداسىندا كىمدەردىڭ باعى جانىپ، جاسىنداي جارقىرايتىنى ازىرگە بەيمالىم. دەسە دە، برازيليا تورىندە قازاق ەلىنىڭ نامىسىن ابىرويمەن قورعاپ، جەڭىس تۇعىرىنىڭ بيىك ساتىلارىنا كوتەرىلەتىن ۇل-قىزدارى شىعاتىنىنا سەنىمدى.
سەبەبى، ءبىزدىڭ ەلىمىز تاۋەلسىزدىك العان كەزدەن بەرى بەس وليمپيا ويىندارىنا قاتىسىپ، بارلىعىنان جۇلدەسىز قايتىپ كورگەن ەمەس. ۇكىلەپ قوسقان ساڭلاقتارىمىز ءۇمىتتى اقتاپ، ءانۇرانىمىزدى اسقاقتاتىپ، كوك بايراعىمىزدى جەلبىرەتتى.
قازىر ساناپ وتىرساق، سپورتشىلارىمىز تەك جازعى ءتورت جىلدا ءبىر كەلەتىن وليمپيادا ويىندارىندا 52 مەدال، ونىڭ ىشىندە 16 التىن، 17 كۇمىس جانە 19 قولا جۇلدەگە يە بولدى. بۇل بيىل تاۋەلسىزدىك العانىنا 25 جىل تولۋىن ەندى تويلاعالى وتىرعان جاس مەملەكەتىمىز ءۇشىن وڭاي جەتىستىك ەمەس.
ەندى، مىنە، ءتورت جىلدى تاعى دا ارتقا تاستاپ، ريو وليمپياداسىن قارسى العالى وتىرمىز. بيىل سپورتشىلارىمىزعا قويىلاتىن تالاپ تا، مىندەت تە اۋىر ەكەنى بەلگىلى. سەبەبى، لوندونداعى قول جەتكىزگەن بيىك جەتىستىكتەرىمىزدى قولدان بەرمەي العا ۇمتىلۋ باستى نازاردا بولماق.
سول ءۇشىن بۇگىن تاۋەلسىزدىك العاننان بەرگى قازاق سپورتشىلارى قاتىسقان بەس وليمپيادا ويىندارىنىڭ تاريحىنا قايتا ءبىر كوز جۇگىرتىپ، كوماندالىك ەسەپتە، قاي جىلى نەشىنشى ورىنداردى يەلەنگەنى جانە كىمدەردىڭ قانداي سپورت تۇرلەرىنەن قانداي مادالعا قول جەتكىزگەنىن جاريالاۋدى ءجون كورىپ وتىرمىز.
اتلانتا وليمپياداسى
سپورتشى سانى - 94.
سپورت ءتۇرى - 15.
مەدال سانى - 11.
كوماندالىق ەسەپ - 24.
التىن: ۆاسيلي جيروۆ (بوكس، 81 كەلى)، الەكساندر پارىگين (بەسسايىس)، يۋري مەلنيچەنكو (گرەك-ريم كۇرەسى، 57 كەلى)؛
كۇمىس: بولات ءجۇمادىلوۆ (بوكس، 51 كەلى)، اناتولي حراپاتىي (اۋىر اتلەتيكا، 99 كەلى)، سەرگەي بەلياەيەۆ (نىسانا كوزدەۋ، 2 دۇركىن)؛
قولا: بولات نيازىمبەتوۆ (بوكس، 63,5 كەلى)، ەرماحان يبرايىموۆ (بوكس، 71 كەلى)، ماۋلەن مامىروۆ (ەركىن كۇرەس، 52 كەلى)، ۆلاديمير ۆوحميانين (نىسانا كوزدەۋ).
سيدنەي وليمپياداسى
سپورتشى سانى - 130.
سپورت ءتۇرى - 18.
مەدال سانى - 7.
كوماندالىق ەسەپ - 22.
التىن: بەكزات ساتتارحانوۆ (بوكس، 57 كەلى)، ەرماحان يبرايىموۆ (بوكس، 71 كەلى)، ولگا شيشيگينا (جەڭىل اتلەتيكا)؛
كۇمىس: بولات ءجۇمادىلوۆ (بوكس، 51 كەلى)، مۇحتارحان دىلدابەكوۆ (بوكس، 91+ كەلى)، يسلام بايرامۋكوۆ (ەركىن كۇرەس، 97 كەلى)، الەكساندر ۆينوكۋروۆ (ۆەلوسپورت).
افينى وليمپياداسى
سپورتشى سانى - 114.
سپورت ءتۇرى - 18.
مەدال سانى - 8.
كوماندالىق ەسەپ - 40.
التىن: باقتيار ارتايەۆ (بوكس، 69 كەلى)؛
كۇمىس: گەننادي گولوۆكين (بوكس، 75 كەلى)، گەورگي تسۋرتسۋميا (گرەك-ريم كۇرەس، 120 كەلى)، گەننادي لاليەۆ (ەركىن كۇرەس، 74 كەلى)، سەرگەي فيليمونوۆ (اۋىر اتلەتيكا، 77 كەلى)؛
قولا: سەرىك ەلەۋوۆ (بوكس، 60 كەلى)، مكحيتار مانۋكيان (گرەك-ريم كۇرەس، 66 كەلى)، دميتري كارپوۆ (جەڭىل اتلەتيكا).
بەيجىڭ وليمپياداسى
سپورتشى سانى - 129.
سپورت ءتۇرى - 20.
مەدال سانى - 13.
كوماندالىق ەسەپ - 29.
التىن: باقىت سارسەكبايەۆ (بوكس، 69 كەلى)، يليا يلين (اۋىر اتلەتيكا، 94 كەلى)؛
كۇمىس: اسقات جىتكەيەۆ (دزيۋدو، 100 كەلى)، تايمۋراز تيگيەۆ (ەركىن كۇرەس، 96 كەلى)، يرينا نەكراسوۆا (اۋىر اتلەتيكا، 63 كەلى)، اننا ۆاجەنينا (اۋىر اتلەتيكا، 75 كەلى)؛
قولا: ەركەبۇلان شىناليەۆ (بوكس، 81 كەلى)، نۇرباقىت تەڭىزبايەۆ (گرەك-ريم كۇرەسى، 60 كەلى)، اسەت مامبەتوۆ (گرەك-ريم كۇرەسى، 96 كەلى)، ارمان شىلمانوۆ (تاەكۆوندو، 80 كەلى)، ماريد مۋتاليموۆ (ەركىن كۇرەس، 120 كەلى)، ەلەنا شالىگينا (ايەلدەر كۇرەس، 63 كەلى)، ماريا گراباۆەتسكايا (اۋىر اتلەتيكا، 75+ كەلى).
لوندون وليمپياداسى
سپورتشى سانى - 115.
سپورت ءتۇرى - 20.
مەدال سانى - 13.
كوماندالىق ەسەپ - 12.
التىن: سەرىك ساپيەۆ (بوكس، 69 كەلى)، يليا يلين (اۋىر اتلەتيكا، 94 كەلى)، الەكساندر ۆينوكۋروۆ (ۆەلوسپورت)، ولگا رىپاكوۆا (جەڭىل اتلەتيكا)، ءزۇلفيا چينشانلو (اۋىر اتلەتيكا، 53 كەلى)، مايا مانەزا (اۋىر اتلەتيكا، 63 كەلى)، سۆەتلانا پودوبەدوۆا (اۋىر اتلەتيكا، 75 كەلى)؛
كۇمىس: ادىلبەك نيازىمبەتوۆ (بوكس، 81 كەلى)؛
قولا: اقجۇرەك تاڭاتاروۆ (ەركىن كۇرەس، 66 كەلى)، يۆان دىچكو (بوكس، 91+ كەلى)، مارينا ۆولنوۆا (ايەلدەر بوكسى، 75 كەلى)، گۇزەل مانيۋروۆا (ايەلدەر كۇرەسى، 72 كەلى)، دانيال گادجيەۆ (گرەك-ريم كۇرەسى، 84 كەلى).
كۇنسۇلتان وتارباي
