قازاقستاندا يتتەر تولقۇجاتپەن جۇرۋگە مىندەتتەلدى

استانا. قازاقپارات - قازاقستاندا يتتەردى تولقۇجاتپەن جۇرۋگە مىندەتتەيتىن جاڭا زاڭ، ءتىپتى استانادا ىسكە اسىرىلا باستادى.

ەندى استانادا ءيتىن قىدىرتۋعا الىپ شىققاندار مىندەتتى تۇردە ونىڭ قۇجاتى مەن سانيتارلىق كىتاپشاسىن دا بىرگە الىپ ءجۇرۋى ءتيىس دەپ حابارلايدى ك ت ك ارناسى.

11- ناۋرىز كۇنى تابيعاتتى قورعاۋ پوليتسەيلەرى جۇرتقا وسى ەرەجەلەردى ءتۇسىندىرىپ، ونى ەلەمەگەندەرگە ايىپپۇل سالدى. وسىعان دەيىن تۇمىلدىرىق پەن قارعىباۋى بولسا ءيتتى ەمىن-ەركىن الىپ جۇرۋگە كەدەرگى قويىلمايتىن. ال جاڭا ەرەجە ءيت اسىراۋشىلاردى ءبىراز ابىگەرگە سالاتىن ءتۇرى بار.

ويتكەنى، قۇجات پەن اۋىرمايتىنى تۋرالى مەديتسينالىق انىقتامادان بولەك، ءتورت اياقتىلاردان قالعان قوقىستى ەندى يەسى تازالاپ جۇرۋگە مىندەتتى. ءارى ءيتىن قوعامدىق ورىندا سەرۋەندەتۋ ءۇشىن ول مىندەتتى تۇردە ۇيرەتىلگەن جانە ءسوز ۇعاتىن بولۋى كەرەك.

بۇدان بولەك، قارعىباۋعا بايلانعان ءجىپ ءبىر جارىم مەتردەن اسپاۋى ءتيىس. بۇل تالاپ ساقتالماسا جاپپاي ايىپپۇل سالىنادى.

«ەسكەرتۋ نەمەسە 3 ايلىق ەسەپتىك كورسەتكىش بويىنشا ايىپپۇل سالىنادى. ال ەگەر ءيت ادام ومىرىنە قاۋىپ ءتوندىرىپ، تىستەپ العان جاعدايدا 10 ايلىق، ياعني 20 مىڭ تەڭگە ايىپپۇل سالىنادى»، - دەيدى استانا قالالىق ءى ءى د تابيعاتتى قورعاۋ ءبولىمىنىڭ ينسپەكتورى اسان قادىروۆ.