وزبەكستان ماقتاارالعا كەرەك كولەمدە سۋ جىبەرۋگە ۋادە بەرىپ وتىر

شىمكەنت. قازاقپارات - سىرداريانىڭ ساعاسىنداعى شارۋالار بيىل سۋدان قيىنشىلىق كورمەيدى.

وزبەكستان تاراپى كەرەك كولەمدە سۋ جىبەرۋگە ۋادە بەرىپ وتىر.

بۇل تۋرالى قازاقستان مەن وزبەكستان اراسىنداعى ەكىجاقتى ىنتىماقتاستىق جونىندەگى بىرلەسكەن ۇكىمەتارالىق كوميسسيانىڭ 15-وتىرىسىندا ءمالىم بولدى.

قوس تاراپ الىس-بەرىس پەن بارىس-كەلىستىڭ جايىن تالقىلادى. بىلتىر جاھاندى دەندەگەن داعدارىستىڭ سالدارىنان ەكى ەل اراسىنداعى ساۋدا اينالىمى %13 عا قۇلدىراعان. الداعى ۋاقىتتا وسى كورسەتكىشتى كەمىتپەۋدىڭ جايى بۇگىنگى جيىنعا وزەك بولدى.

بۇعان دەيىن ماقتاارالدىق ماماندار بيىل قۋاڭشىلىق بولۋى مۇمكىن دەپ قاۋىپتەنگەن بولاتىن. ەگىن ناۋقانى قىزا باستاعاندا دوستىق كانالىنداعى سۋ دەڭگەيى ەداۋىر ازايىپ، تاپشىلىق تۋىندايتىنى تۋرالى دابىل دا قاقتى.

قىرعىزستاننىڭ توقتاعۇل سۋ قويماسىنان باستاۋ الىپ، تاجىكستان، وزبەكستان مەملەكەتتەرى ارقىلى قازاقستانعا كەلەتىن سۋدىڭ مولشەرى ءتيىستى دەڭگەيىنەن تومەندەپ كەتكەن ەدى. قازىرگى تاڭدا دوستىق كانالىمەن سەكۋندىنا 13 مىڭ تەكشە مەتر سۋ اعىپ جاتىر.

مامانداردىڭ ەسەبىنشە، سەكۋندىنا 48 مىڭ تەكشە مەتر سۋ اققاندا عانا وڭىردەگى سۋارمالى جەرلەردى تولىقتاي تىرشىلىك نارىمەن قامتۋعا بولادى. قۇرعاقشىلىقتان قاۋىپتەنگەن قۇزىرلىلار قازىر بەرىسى وبلىس اكىمىنە، ارىسى اۋىل شارۋاشىلىعى مينيسترىنە حات جازىپ، اقىرى كەلىسىمگە كەلدى، دەپ حابارلادى otyrar.kz.