قازاقستاندىق ۆەلوسپورتشى «پاريج -نيتستسا» كوپ كۇندىگىندە بەسىنشى كەزەڭنىڭ جەڭىمپازى اتاندى

استانا. قازاقپارات - «استانا» كومانداسىنىڭ مۇشەسى الەكسەي لۋتسەنكو «پاريج - نيتستسا» كوپ كۇندىگىندە بەسىنشى كەزەڭنىڭ جەڭىمپازى اتاندى.

بەسىنشى كەزەڭدە سپورتشىلار 198 شاقىرىمدى ءجۇرىپ ءوتتى. مارەگە 28 شاقىرىم قالعاندا، الدا كەتىپ بارا جاتقان انتۋان ديۋشەندى قۋىپ جەتكەن ا. لۋتسەنكو سودان كەيىن ەشكىمگە دەس بەرمەي، مارە سىزىعىن جەكە دارا قيدى.

«پاريج -نيتستسا» كوپ كۇندىگىندە جالپى ەسەپتە قازاقستاندىق ۆەلوسپورتشى ەكىنشى ورىندا كەلەدى.

جيىرما ءۇش جاستاعى ا. لۋتسەنكو سولتۇستىك قازاقستان وبلىسىندا تۋىپ-وسكەن. 2013-جىلى 23 جاسقا دەيىنگىلەر اراسىندا توپتىق باسەكەدە الەم چەمپيونى اتانعان. سول جىلى «استانا» كومانداسىنىڭ قۇرامىنا الىنعان الەكسەي سونداي-اق ازيادا چەمپيونى اتانىپ، ەكى مارتە «الماتى تۋرى» جارىسىن ۇتقان.

ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ باسپا ءسوز حاتشىسى باقىتبەك ءحاميتتىڭ حابارلاۋىنشا، بۇل - ا. لۋتسەنكونىڭ ازىرگە ەڭ جارقىن جەڭىسى. ول ريو-دە-جانەيرودا وتەتىن وليمپيادا ويىندارىندا ەل نامىسىن قورعايدى.

اۆتور: ەلجان ەرالى