بيىلدان باستاپ قازاقستان كەدەندىك راسىمدەۋ ورتالىقتارىندا ايەلدەر ۇجىمى عانا قىزمەت ەتەدى

استانا. قازاقپارات - قازاقستاندا كەدەندىك راسىمدەۋ ورتالىقتارىنىڭ ۇجىمى بيىل تولىقتاي ايەلدەردەن جاساقتالماق.

بۇل تۋرالى بۇگىن ق ر قارجى مينيسترلىگى مەملەكەتتىك كىرىستەر كوميتەتى دامۋ جانە جاڭعىرتۋ دەپارتامەنتىنىڭ ديرەكتورى ەرجان ءبىرجانوۆ ءمالىم ەتتى.

«كوميتەتتە «ادەمىلىك الەمدى قۇتقارادى دەگەن جوبا قولعا الىندى. ول بويىنشا ەلدەگى كەدەندىك راسىمدەۋ ورتالىقتارىنىڭ ۇجىمى تەك ايەلدەردەن جاساقتالماق. بۇگىن استانا بويىنشا بارلىق قىزمەتكەرلەر جەكە جانە كاسىبي قاسيەتتەرگە قاتىستى سىناقتان ءوتتى. قازىرگى ۋاقىتتا استاناداعى كەدەندىك راسىمدەۋ ورتالىعى 100 پايىزعا ايەلدەردەن قۇرالىپ وتىر»، - دەدى ول ورتالىق كوممۋنيكاتسيالار قىزمەتىندە وتكەن بريفينگتە.

دەپارتامەنت باسشىسىنىڭ اتاپ كورسەتكەنىندەي، قازاقستاندىق ايەلدەر جەمقورلىققا بارا بەرمەيدى، قۇجاتتارعا دا مۇقيات كەلەدى. وسىعان بايلانىستى اتالعان جوبا قولعا الىندى.

«مۇنداي شارانىڭ جۇزەگە اسىرىلۋىنىڭ ارقاسىندا بيۋدجەتكە تۇسەتىن تۇسىمدەردىڭ كولەمى ارتىپ، مەملەكەتتىك قىزمەتتىڭ ساپاسى ارتتى، ادامداردان تۇسەتىن شاعىمدار دا كەمىدى. اتالعان جوبا رەسپۋبليكاداعى وزگە دە ورتالىقتارعا دا ەنگىزىلەدى. ءبىز جىلدىڭ سوڭىنا قاراي كەدەندىك راسىمدەۋ ورتالىقتارىنىڭ ۇجىمىن تولىقتاي ايەل قاۋىمىنان قۇرايتىن بولامىز»، - دەپ اتاپ ءوتتى ە. ءبىرجانوۆ.

اۆتور: جاسۇلان جولدىبايەۆ