عالىمدار پاۆلوداردا كەرىكتەر مەكەن ەتكەنىن ايتتى

استانا. قازاقپارات - قازاقستان ۇلتتىق گەوگرافيالىق قوعامى «تاريحي- مادەني مۇرا، ەتنوگرافيا» تاقىرىپتىق كەڭەسىنىڭ ۆيتسە- پرەزيدەنتى جاكەن تايماعامبەتوۆتىڭ پايىمىنشا، ەجەلگى ەرتىس اۋماعى قازىرگى افريكاداعى ساۆانناعا ۇقساس بولعان.

«وتكەن جىلى ءبىز ارحەولوگيا ينستيتۋتىمەن بىرلەسكەن ەكسپەديتسيانى وتكىزدىك. ولار ەرتىس بويىندا ەجەلگى ادامداردىڭ ءىزىن تابۋعا قىزىعۋشىلىق بىلدىرگەن بولاتىن. بۇرىندارى پاۆلوداردا پالەوزوولوگيالىق قازبا جۇمىستارى جۇرگىزىلگەن بولاتىن، ياعني ەرتىستىڭ جاعاسىنداعى جاردا گيپپاريوندىق فاۋناعا جاتاتىن جانۋارلاردىڭ قاڭقالارى تابىلدى. اتاپ ايتقاندا، 15 ميلليون جىل بۇرىن بۇل اۋماق قازىرگى افريكاعا وتە ۇقساس بولعان ەكەن. وسى جەردە ءۇش اشا تۇياقتى جىلقىلار، كەرىكتەر مەكەن ەتكەن. سونداي-اق بۇل جەردە مامونتتاردىڭ قالدىقتارى بار»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

وسى ورايدا عالىم قازاقستان ۇلتتىق گەوگرافيالىق قوعامى باستاماسىمەن وتكەن ەكسپەديتسيا بيىل دا جالعاساتىنىن جەتكىزدى.

«وتكەن جىلى ەكسپەديتسياعا كولورادو ۋنيۆەرسيتەتىنىڭ، اۆستراليا وقۋ ورنىنىڭ ستۋدەنتتەرى قاتىسقان بولاتىن. نەگىزى، نيەت بىلدىرگەندەر كوپ. قازاقستان شەتەل زەرتتەۋشىلەرىن دە تارتۋدا»، - دەدى ج. تايماعامبەتوۆ.

اۆتور: رۋسلان عابباسوۆ