الەمنىڭ ءۇش دۇركىن چەمپيونى اتانعان ايگىلى سپورتشى ءۇش التىن مەدالىن ءباسساۋداعا قويدى

استانا. قازاقپارات - برازيليا قۇراماسى قۇرامىندا ءجۇرىپ الەمنىڭ ءۇش دۇركىن چەمپيونى اتانعان ايگىلى فۋتبولشى پەلە ەكى مىڭعا جۋىق جەكە زاتىن اۋكتسيونعا قويدى.

بۇل تۋرالى Reuters- كە سىلتەمە جاساپ «ر-سپورت» حابارلادى.

اۋكتسيون لوتتارىنىڭ ىشىندە - الەم چەمپيوناتتارىنىڭ ءۇش التىن مەدالى جانە جيۋل ريمە سىيلىعىنىڭ كوشىرمەسى بار. سونداي-اق پەلەنىڭ جاسوسپىرىم كەزىندە شۇلىقتاردى وراپ جاساپ العان فۋتبول دوبى دا ساتىلادى.

«جانكۇيەرلەرىم مەن كوللەكتسيا جيناۋشىلاردا دا مەنىڭ تاريحىمنىڭ بولشەگى بولسىن دەپ شەشتىم. ولار بۇل ارتەفاكتتاردى باعالاپ، مەنىڭ تاريحىمدى بالالارىمەن جانە بولاشاق ۇرپاقتارىمەن بولىسەدى دەپ ۇمىتتەنەمىن»، - دەدى پەلە.

اۋكتسيون 7- جانە 9- ماۋسىم ارالىعىندا لوندوندا وتەدى. الىنعان قاراجاتتىڭ ءبىر بولىگى برازيليالىق كۋريتيبا قالاسىنداعى بالالار اۋرۋحاناسىنا بەرىلەدى.

جيۋل ريمە سىيلىعىنىڭ كوشىرمەسى 400 مىڭ دوللاردان ءبىر ميلليونعا، الەم چەمپيوناتتارىنىڭ ءۇش التىن مەدالى 200 مىڭ دوللارعا، ال پەلە سوققان 1000- گولدىڭ دوبى 40-60 مىڭ دوللارعا ساتىلادى دەپ كۇتىلۋدە، دەپ حابارلادى Vesti.kz.