قازاقستاندىق ارباعا تاڭىلعان وقۋشى اعىلشىن عالىمى ستيۆەن حوكينگپەن كەزدەسەدى
قازىرگى كەزدە ونىڭ اتالعان عالىممەن كەزدەسۋىن ۇيىمداستىرۋ شاراسى ىسكە اسىرىلماق.
ي. مۋستوپۋلو «ۇيلەسىمدىلىك تەورياسىن» ويلاپ تاۋىپ، وقۋشىلار اراسىندا وتەتىن ۇلتتىق يننوۆاتسيالىق جوبالار كونكۋرسىنىڭ ارنايى سىيلىعىنا يە بولدى.
ول ءوزىنىڭ ارمانى جايىندا ق ر ينۆەستيتسيالار جانە دامۋ ءمينيسترى اسەت يسەكەشەۆكە ايتقان بولاتىن.
بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا «تەحنولوگيالىق دامۋ جونىندەگى اگەنتتىك» ا ق باسقارما ءتوراعاسىنىڭ ورىنباسارى جۇماتاي ءسالىموۆ يسااك ءۇشىن ۇلى بريتانياعا ارنايى ساپاردى ۇيىمداستىرۋ جوسپارلانىپ وتىرعانىن جەتكىزدى.
«بۇل اتالىم بويىنشا بىزدە جەكە ساپار قاراستىرىلماعان بولاتىن. الايدا، ءبىز وسى ماسەلەنى پىسىقتاپ جاتىرمىز. بريتاندىق كەڭەس يسااكتى كۇتىپ الاتىندىقتارىن ايتتى. ستيۆەن حوكينگ ەگدە جاستاعى ادام ەكەنى جانە شەتەلدىك ساپارلارى كوپ ەكەنى بەلگىلى. ونىڭ كومانداسى ءبىزدىڭ ۇسىنىسىمىزعا قىزىعۋشىلىق ءبىلدىرىپ، كەزدەسۋ وتكىزۋگە، تالقىلاۋعا كەلىستى. سوندىقتان دا بريتاندىق عىلىم مۇراجايىنا، كەمبريدجگە ساپارلاۋدى جوسپارلادىق. جاقىندا يسااك ۇلى بريتانياعا ساپارلايدى دەپ كۇتىپ وتىرمىز»، - دەدى ج. ءسالىموۆ.
ي. مۋستوپۋلو «ۇيلەسىمدىلىك تەورياسى» جوباسى اياسىندا عارىش كەمەلەرى پايدالاناتىن جاڭا قۋات كوزىن تابۋدى ماقسات ەتىپ وتىر.
اۆتور: رۋسلان عابباسوۆ
