ەلوردالىق بەس وقۋشى حالىقارالىق كونكۋرستا ءبىرىنشى ورىن الدى

استانا. قازاقپارات - الماتىدا ءو. جولداسبەكوۆ اتىنداعى ماتەماتيكا جانە مەحانيكادان وقۋشىلاردىڭ زەرتتەۋ جۇمىستارىنىڭ Ⅵحالىقارالىق كونكۋرسى اياقتالدى.

بايقاۋ ناتيجەسى بويىنشا ەلوردالىق 5 وقۋشى ءبىرىنشى، 8 وقۋشى ەكىنشى جانە بەسەۋى ءۇشىنشى ورىن الدى، دەپ حابارلادى قالالىق اكىمدىكتىڭ باسپا ءسوز قىزمەتىنەن.

حالىقارالىق ءبىلىم دوداسىندا № 66 -مەكتەپ- ليتسەيىنىڭ، «كوگىلدىر جەلكەن»، دارىندى بالالارعا ارنالعان قازاق-تۇرىك ليتسەي-ينتەرناتىنىڭ، «ميراس» حالىقارالىق مەكتەبىنىڭ، № 17, № 75, № 51, № 4 - مەكتەپ- گيمنازيالارىنىڭ جانە ت. ب. مەكتەپتەردەن 22 وقۋشى باق سىناستى. دارىندى بالالار الدىمەن قالالىق ىرىكتەۋ كەزەڭىندە ءوز جوبالارىن ۇسىندى. سودان كەيىن ءو. جولداسبەكوۆ اتىنداعى جىل سايىنعى كونكۋرستا جۇلدەلى ورىندارعا تالاستى.

كونكۋرستىڭ باستى مىندەتى - وقۋشىلار اراسىندا زەرتتەۋ قىزمەتىن ۇيىمداستىرۋ جۇيەسىن جەتىلدىرۋ، سونداي- اق ماتەماتيكا عىلىمدارى سالاسىنداعى زەرتتەۋلەرگە قىزىعۋشىلىق پەن قابىلەتتىلىك تانىتاتىن وقۋشىلاردى انىقتاۋ.

- تۋرنير حالىقارالىق دەڭگەيدە وتكىزىلەدى، وعان قازاقستاننىڭ 16 وڭىرىنەن، استانا مەن الماتى قالالارىنان، ازەربايجان مەن قىرعىزستان ەلدەرىنەن كەلگەن جوعارى سىنىپ وقۋشىلارى قاتىسادى. ۇزدىك وقۋشىلار الدىمەن زەرتتەۋ جۇمىستارىن وبلىستىق جانە قالالىق دەڭگەيدە تانىستىرادى، سودان كەيىن مىقتىلارى كونكۋرسقا قاتىسادى، - دەدى «استانا دارىنى» رەسپۋبليكالىق عىلىمي- پراكتيكالىق ورتالىعىنىڭ ادىسكەرى راش ەرماعانبەتوۆا.

تۋرنير قورىتىندىسى بويىنشا كونكۋرس جەڭىمپازدارىنا ديپلومدار تابىستالدى.