دۋبايداعى نوسەر قالا تىرشىلىگىن تۇنشىقتىردى

ءابۋ- دابي. قازاقپارات - سارسەنبىدە بىرىككەن اراب امىرلىگىندەگى الەۋمەتتىك جەلى پايدالانۋشىلارى ءابۋ-دابي مەن دۋبايدا بولعان سەل مەن نوسەر جايلى بەينە ماتەريالدار جاريالادى، دەپ حابارلادى ب ا ءا- داعى «قازاقپارات» ءتىلشىسى.

ناقتىراق ايتقاندا، بىرىككەن اراب امىرلىگىندەگى نوسەردەن جولداردا كەپتەلىس بولىپ، كوپتەگەن كومپانيالار ءوز كەڭسەلەرى مەن ساۋدا الاڭدارىن جابۋعا ءماجبۇر بولدى.

7 -ناۋرىزدا اراب امىرلىگىندە باستالعان نوسەردەن ءالى كۇنگە دەيىن كوپتەگەن كومپانيالار مەن مەملەكەتتىك مەكەمەلەر، كەڭسەلەر جۇمىس ىستەمەي تۇر.

9 -ناۋرىزدا ءوز كەڭسەلەرىنىڭ ۋاقىتشا جابىلعانى تۋرالى امىرلىكتىڭ ساۋدا- ونەركاسىپ پالاتاسى دا رەسمي جاريالادى.

«Etihad» اۋە كومپانياسىنىڭ بىرنەشە كەڭسەسى جۇمىسىن توقتاتتى.

دۋبايداعى ءىرى  «Ibn Batuta Mall» ساۋدا ورتالىعىنىڭ كەلۋشىلەرى الەۋمەتتىك جەلى ارقىلى پاركينگتى سۋ باسىپ، ساۋدا زالىنا دەيىن جەتكەنىن حابارلادى.

9 -ناۋرىزدا كۇندىزگى ساعات ەكىدە دۋبايدا Global Village جارمەڭكەسى جابىلعانىن حابارلادى. ب ا ءا امىرلىگى اۋقىمى بويىنشا اۋا رايىنىڭ قولايسىزدىعىنا بايلانىستى امىرلىكتىڭ بارلىق اۋماعىندا اۆتوتۇراق تەگىن بولادى. ءبىلىم بەرۋ باسقارماسى دا بەيسەنبى، 10 -ناۋرىزدا مەكتەپتەر مەن ءبىلىم بەرۋ مەكەمەلەرى جابىق بولاتىنىن مالىمدەدى.

بولجام بويىنشا ب ا ءا- دە نوسەر 2-3 كۇنگە سوزىلادى.