نيۋ-يوركتە ب ۇ ۇ شتاب-پاتەرىندە قازاق اسحاناسىنىڭ فەستيۆالى ءساتتى وتۋدە - فوتو
قازاقستاننان بەس ۇزدىك باس اسپاز نيۋ-يورككە قازاق اسحاناسىنىڭ ءدامدى تاعامدارىن، تاتتىلەرى مەن سۋسىندارىن تانىستىرۋعا باردى. ولار قازاق اسحاناسى مەن ورتالىق ازيا حالىقتارىنىڭ تاعامدارىن دايىنداۋعا ماماندانعان استاناداعى جوعارى دەڭگەيدەگى مەيرامحانالاردىڭ اس ءمازىرىن ۇسىنادى.
فەستيۆالدىڭ اشىلۋىنا ب ۇ ۇ باس اسسامبلەياسىنىڭ پرەزيدەنتى موگەنس ليۋككەتوفتا، ب ۇ ۇ كوميتەتتەرىنىڭ باسشىلىعى، ۇيىم حاتشىلىعىنىڭ قىزمەتكەرلەرى، ب ۇ ۇ مۇشە ەلدەردىڭ تۇراقتى وكىلدەرى قاتىستى.
اشىلۋ بارىسىندا قوناقتارعا ۇلتتىق اسحانا تاعامدارىنان باسقا قازاق مادەنيەتى، ونەرى، تۇرمىس ءمانى ت. ب. داستۇرلەرىمەن تانىسۋ مۇمكىندىگى بولدى.
كەشتە قازاق اۆتورلارىنىڭ، كومپوزيتورلارىنىڭ مۋزىكالىق تۋىندىلارى مەن اندەرى ورىندالدى.
شارا قوناقتارىن قارسى العان ب ۇ ۇ جانىنداعى قازاقستاننىڭ تۇراقتى وكىلى قايرات ءابدىراحمانوۆ قاتىسۋشىلاردى قازاق حالقىنىڭ مادەنيەتى مەن داستۇرلەرىنە قىزىعۋشىلىق تانىتقاندارى ءۇشىن العىس ايتتى.
قازاقستانىڭ تاعام مادەنيەتى عاسىرلار بويى قالىپتاستى. ۇلى دالانىڭ، ونداعى حالىقتىڭ ءدامدى، تاعامدىق ەرەكشەلىكتەرى ۇسىنىلۋدا. بۇل ەجەلگى جىبەك جولى ەلدەرى تۇرعىندارىنىڭ گاسترونوميالىق اس مازىرىنە باي كوشپەندىلەردىڭ تاعام مادەنيەتىنىڭ كورىنىسى.
فەستيۆال اپتا بويى ب ۇ ۇ- دا قوناقتار قابىلدايدى. كۇندەلىكتى اس مازىرىنە - سالقىن تاعام رەتىندە ەت، بالىق، ءتۇرلى سالاتتار، قارىن، ىستىق تاعام - ەت، قۋىرداق، قوي ەتى، پالاۋ، مانتى، باۋىرساق، سامسا، سۋسىندار - ايران، قىمىز، شۇبات جانە ت. ب. ۇسىنىلدى. دەسەرتكە جەنت، قوسپا، چاك-چاك، قۇرت، ىرىمشىك ت. ب. بولدى.
استىڭ ءدامىن تاتقان قوناقتار تاعامدارعا جوعارى باعا بەرۋدە.
فەستيۆال ب ۇ ۇ ۇلكەن دەلەگاتسيا زالىندا وتۋدە. ول ادام باسىنا 30 دوللار تولەممەن شۆەد ۇستەلى فورماتىندا ۇيىمداستىرىلعان. ب ۇ ۇ- داعى اسحانا ءۇشىن باعا جوعارى بولسا دا، مۇندا كەلۋشىلەر سانى جەتىپ اسادى. ءۇش كۇندە قازاق اسحاناسىنان 700 دەن استام ادام ءدام تاتتى.
