ۆيزاسىز رەجىمدى ەنگىزۋگە بايلانىستى قازاقستاننان وڭتۇستىك كورەياعا زاڭسىز وتكەندەر سانى ارتتى

 استانا. قازاقپارات - قازاقستان مەن وڭتۇستىك كورەيا اراسىندا ۆيزاسىز رەجىمنىڭ ەنگىزىلۋىنە بايلانىستى زاڭسىز پايدا تابۋدى كوزدەگەن قازاقستاندىقتار سانى ارتتى.

 بۇل تۋرالى «قازاقپارات» اگەنتتىگىنە سىرتقى ىستەر مينيستىرلىگىنىڭ باسپا ءسوز قىزمەتىنىڭ باسشىسى ءانۋار جايناقوۆ حابارلادى.

«ۆيزاسىز رەجىم ەنگىزىلگەن كەزدە كورەياعا زاڭسىز پايدا تابۋ ءۇشىن بارعان ازاماتتار سانى كوبەيگەن. ءبىزدىڭ ەلشىلىكتىڭ دەرەكتەرىنە سايكەس ولاردىڭ كوبى - ەلدىڭ وڭتۇستىك وڭىرلەرىنىڭ تۇرعىندارى، نەگىزىنەن ەتنيكالىق وزبەكتەر»، - دەپ اتاپ ءوتتى ءا. جايناقوۆ.

وسىعان بايلانىستى كورەي بيلىگى ەلگە شەتەلدىكتەردىڭ، ونىڭ ىشىندە قر ازاماتتارىنىڭ وتۋىنە باقىلاۋدى كۇشەيتتى.

 «ءا. جايناقوۆتىڭ ايتۋىنشا، وڭتۇستىك كورەياعا بەت العان ءار رەيستە 5-10 قازاقستاندىق بولعان. ولار كوبىنە ساپار ماقساتى جايلى دايەكسىز نەمەسە تولىق ەمەس اقپارات بەرگەن.

كورەي تاراپىنىڭ دەرەكتەرىنشە، كورەيادە تىركەلگەن 6900 قازاقستان ازاماتىنىڭ 1580- ءى زاڭسىز ميگرانت بولىپ تابىلادى».

ەسكە سالساق، بۇدان بۇرىن 10-نان استام قازاقستاندىق تۋريستەردى ءۇش كۇن سەۋل اۋەجايىنىڭ جەرتولەسىندە ۇستاعان. قازىر ولار ەلگە قايتارىلدى.

«كەز كەلگەن ەگەمەندى مەملەكەت شەتەل ازاماتتارىنا ءوز اۋماعىنا كىرۋگە رۇقسات بەرۋ تۋرالى شەشىمدى دەربەس قابىلداۋعا قۇقىلى جانە ءوز ەلىنە وتكىزبەۋ سەبەبىن تۇسىندىرۋگە مىندەتتى ەمەس»، - دەپ قوستى ق ر س ءى م باسپا ءسوز قىزمەتىنىڭ باسشىسى.

سوندىقتان، ۆەدومستۆو شەتەلگە شىعاتىن ازاماتتاردان شەكارالىق باقىلاۋدان ءوتۋ ءتارتىبىن الدىن الا زەردەلەپ، ساپارىنىڭ ماقساتى مەن سيپاتى تۋرالى تولىق، دايەكتى اقپارات بەرۋىن سۇرايدى.

«سونداي- اق وسىنداي جاعدايعا تاپ بولعان ق ر ازاماتتارى ولارعا سول ەلدە قازاقستان كونسۋلىمەن بايلانىسۋ مۇمكىندىگىن دەرەۋ ۇيىمداستىرۋدى تالاپ ەتە الاتىنىن ەسكەرتەمىز»، - دەپ ءسوزىن تۇيىندەدى ول.