تۇرعىن ءۇي قۇرىلىسىنا قاتىساتىن ۇلەسكەرلەردىڭ تاۋەكەلدەرى بارىنشا ازايتىلادى

استانا. قازاقپارات - تۇرعىن ءۇي قۇرىلىسىنا قاتىساتىن ۇلەسكەرلەردىڭ تاۋەكەلدەرى بارىنشا ازايتىلادى. بۇل تۋرالى بۇگىن سەناتتىڭ جالپى وتىرىسىندا «تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭ جوباسىن تالقىلاۋ بارىسىندا ءمالىم بولدى.

  قۇجات ۇلەسكەرلەردىڭ قۇقىقتارى مەن مۇددەلەرىن قورعاۋعا، ۇلەستىك تۇرعىن ءۇي قۇرىلىسىنا قاتىسۋشىلاردىڭ قارىم- قاتىناسىن رەتتەۋگە باعىتتالعان.

«قۇجات جالپى العاندا تۇرعىن ءۇي قۇرىلىسى سالاسىنا حالىقتىڭ قاراجاتىن تارتۋ ارقىلى ۇلەسكەرلەردىڭ تاۋەكەلدەرىن بارىنشا ازايتۋعا باعىتتالادى. بۇل رەتتە تۇرعىن ءۇي قۇرىلىسىنىڭ ۇلەستىك قاتىسۋىنا جاڭا تاسىلدەر بەلگىلەنەدى. بىرىنشىدەن، تۇرعىن ءۇي قۇرىلىسىنا ۇلەستىك قاتىسۋ بويىنشا كەپىلدىكتەر بەرۋ كوزدەلەدى. ەكىنشىدەن، ەكىنشى دەڭگەيلى بانكتەر ارقىلى جوبانى قارجىلاندىرۋى، ۇشىنشىدەن، تۇرعىن ءۇي قاڭقاسىن قۇرىلىس سالۋشىنىڭ جەكە قاراجاتىنا تۇرعىزۋ»، - دەدى ۇلتتىق ەكونوميكا ۆيتسە- ءمينيسترى مارات قۇساينوۆ.

ونىڭ ايتۋىنشا، ءبىرىنشى ءتاسىل بويىنشا قۇرىلىس سالۋشى ۋاكىلەتتى كومپانيا قۇرادى. سوسىن ونىڭ جارعىلىق كاپيتالىنا جەر ۋچاسكەسىن، جوبالاۋ، سمەتالىق حاتتامانى، قاراجات نەمەسە جوبالىق قۇنىنان 10-15 پايىزدىق كولەمدە اياقتالماعان قۇرىلىستى كىرگىزەدى.

 «بۇل رەتتە قۇرىلىس سالۋشىدا رەسپۋبليكالىق ماڭىزى بار قالالار مەن استانادا كەمىندە 18 مىڭ شارشى مەتر، وڭىرلەردە 9 مىڭ شارشى مەتر تۇرعىن ۇيلەر سالۋ جانە كەمىندە ءۇش جىل عيماراتتى سالۋ تاجىريبەسى بولۋى كەرەك. سوڭعى ەكى قارجى جىلىنداعى قىزمەتى دە شىعىنسىز بولۋى شارت. بۇدان باسقا، قارىزدىق جانە مەنشىكتى كاپيتالدا اراقاتىستىلىعى جەتى پايىزدان اسپاۋى كەرەك»، - دەدى م. قۇسايىنوۆ.

اۆتور: قانات مامەتقازى ۇلى