08:48, 10 - ناۋرىز 2016 | GMT +5
قازاقستاننىڭ ءتورت بىردەي تەننيسشىسى ينديان-ۋەللس تۋرنيرىنە قاتىسادى
استانا. قازاقپارات - قازاقستاننىڭ ءتورت بىردەي تەننيسشىسى ينديان-ۋەللس (ا ق ش) تۋرنيرىنە قاتىسادى.
Championat.com سايتىنىڭ حابارلاۋىنشا، قازاقستاننىڭ ءبىرىنشى راكەتكاسى يۋليا پۋتينتسيەۆا العاشقى اينالىمدا قىتايلىق پەن شۋايمەن كۇش سىناسادى.
ياروسلاۆا شۆەدوۆا چەحيالىق كريستينا پليشكوۆامەن، زارينا دياس امەريكالىق دجەيمي لوبپەن كورتقا شىعادى. كوپتەن مۇنداي ءىرى جارىسقا قاتىسپاعان گالينا ۆوسكوبويەۆا ۇلى بريتانيالىق حيتەر ۋوتسونمەن شەبەرلىك بايقاسادى.
بۇل تۋرنيردە سەرەنا ۋيليامس، انجەليكا كەربەر، وسى جارىستىڭ وتكەن جىلعى جەڭىمپازى سيمونا حالەپ، گاربينە مۋگۋرۋسا، اگنەشكا رادۆانسكا، پەترا كۆيتوۆا سىندى الەمنىڭ ماڭدايالدى تەننيسشىلەرى باق سىنايدى.
ايتا كەتەيىك، ەكى اپتاعا سوزىلاتىن تۋرنيردىڭ جۇلدە قورى 6134605 ا ق ش دوللارىن قۇرايدى.
اۆتور: ەلجان ەرالى
