ون وليمپياداعا قاتىسقان قازاق جۋرناليست جانكۇيەرلەردەن كەشىرىم سۇراۋعا دايىن

استانا. قازاقپارات - شىمكەنتتەگى وبلىستىق كەشەندى جوعارى سپورت شەبەرلىگى مەكتەبىندە تانىمال سپورت جۋرناليسى، جازۋشى نەسىپ ءجۇنىسباي ۇلىنىڭ «وليمپيادانىڭ التىن جولى» اتتى كىتابىنىڭ تانىستىرىلىمى ءوتتى.

سپورت مەكتەپتەرىنىڭ باسشىلارى مەن جاتتىقتىرۋشىلار، سپورتشىلار جانە ب ا ق وكىلدەرى قاتىسقان جۇزدەسۋدى وبلىستىق دەنەشىنىقتىرۋ جانە سپورت باسقارماسى باسشىسىنىڭ ورىنباسارى ايتماحامەتالى بەرداشيەۆ جۇرگىزىپ وتىردى. اسەرلى باس قوسۋدا جازۋشى كىتاپتارىنىڭ جازىلۋ تاريحىمەن، وليمپيادا ويىندارىنداعى قىزىقتى وقيعالارىمەن ءبولىستى.

- تاۋەلسىزدىك العان 25 جىل ىشىندە وليمپيادا ويىندارىنا ەلىمىزدەن 150 دەي جۋرناليست بارىپتى. ءبىراق ولاردىڭ اراسىندا ارنايى كىتاپ جازعاندارى از. جوق دەسە دە بولادى.

مەن بارعان جەرىمنەن ءبىر چەمودان قاعاز، مالىمەت الىپ قايتامىن. بار بايلىعىم - سول. كورگەنىڭدى وزىڭمەن بىرگە الا كەتپەي، بولىسكەن دۇرىس قوي. سوندىقتان 1992-جىلدان بەرى «وليمپيسكي مارشرۋت» كىتابىن جازا باستادىم.

وسى ۋاقىتقا دەيىن وليمپيادا ويىندارىنا ون رەت قاتىستىم. ءبارىن قاعازعا ءتۇسىردىم. بۇل ۇرپاق ءۇشىن كەرەك سپورت شەجىرەسى. اراسىندا ويلارىمدى اشىق ايتتىم. ءالى دە ايتا بەرەمىن. ويتكەنى، ءبىز ۇستازىمىز سەيداحمەت بەردىقۇلوۆتان ۇلگى الدىق.

«لەنينشىل جاستا» ىستەيتىن كەزىم. بىردە سەيداعاڭ مەنى شاقىرىپ الىپ، «سەن نە، كەشەگى «سوۆەتسكي سپورتتى» وقىماعانسىڭ با؟» دەدى. «وقىدىم». «وقىساڭ، نەگە بالعىمبايەۆ دەگەن سپورتشى تۋرالى جازبايسىڭ؟». «اعا، ول 133-ورىن العان عوي. جۇلدەدەن وتە الىس» دەي بەرگەنىمدە، «بولا بەرسىن. حالىقارالىق جارىسقا ءبىر قازاق قاتىسىپ كەلدى. ول ازاماتتى جۇرت ءبىلسىن. وقىسىن. سپورتقا كەلسىن» دەدى.

سەيداعاڭ ۇلتىمىزدان مىقتى سپورتشىلار شىقسا، بالاشا قۋاناتىن. نامىستى ەدى. مىنەكي، ءبىز وسىنداي تاربيە الىپ وسكەنبىز. سوچي وليمپياداسىندا التىنشى ورىن العان جانبوتا الدابەرگەنوۆانى دا كىتابىما كىرگىزدىم. سەبەبى، ول ازىرشە، قىسقى سپورت تۇرلەرىنەن قازاق قىزدارى اراسىنداعى ەڭ مىقتى سپورتشى. بەيجىيڭ وليمپياداسىنان قايتىپ بارا جاتقانىمىزدا اۋەجايعا كەلسەك، ءبىز مىنەتىن ۇشاق كومانديرى مەن ەكيپاجى جوق.

سويتسەك، ولاردىڭ ءبارى كەشە عانا چەمپيون اتانعان بوكسشى باقىت سارسەكبايەۆپەن سۋرەتكە ءتۇسىپ ءجۇر. ال، قازاقتىڭ مىقتى بالۋانى ابىلسەيىت ايحانوۆتى تەمىرحان دوسمۇحامبەتوۆ لوندون وليمپياداسىنا اپاردى.

كەزىندە ساياساتتىڭ كەسىرىنەن وليمپياداعا بارا الماعان اعامىز 70 تەن اسقان سوڭ دودانى تاماشالاپ، كوزىنە جاس العانى دا ەسىمدە. مۇنداي وقيعالار كوپ. ءبارىن قامتۋعا تىرىستىم. بۇگىن ەل سپورتىندا عانا ەمەس، تاريحىمىزدا وزىندىك ورنى بار وڭتۇستىك قازاقستان وبلىسىنا كەلىپ وتىرعانىما قۋانىشتىمىن. مۇندا ەلگە ەلەۋلى سپورتشىلار وتە كوپ. ولاردىڭ ءبىرازى تۋرالى وسى كىتاپتارىمنان وقي الاسىزدار، - دەدى نەساعاڭ.

جيىندا وبلىستىق كەشەندى جوعارى سپورت شەبەرلىگى مەكتەبىنىڭ ديرەكتورى ءارى جازۋشىنىڭ دوسى بالعاباي ەلشيەۆ اۆتوردىڭ ەڭبەگىن جوعارى باعالاي كەلە، نەساعاڭنىڭ ريو-دە-جانەيرو وليمپياداسى تۋرالى كىتابىنىڭ تۇساۋكەسەرىن شىمكەنتتە وتكىزۋگە شاقىردى.

وتىرارلىق سپورت ارداگەرى ءتورادىل تۇرابايەۆ پەن «ەگەمەن قازاقستان» گازەتىنىڭ وبلىسىمىزداعى مەنشىكتى ءتىلشىسى باقتيار تايجان دا سپورت جۋرناليسىنىڭ شەبەرلىگى مەن ەڭبەكقورلىعىن جوعارى باعالادى.

ال، بەلگىلى تاەكۆوندوشى، ءبىر سپورت مەكتەبىن باسقارىپ وتىرعان شاديار قوندىبايەۆ «توقسانىنشى جىلدارى نەسىپ اعانىڭ مۇستافا وزتۇرىك تۋرالى ماقالاسىن وقىدىم. ول كەزدە رەسەيدە تۇراتىنمىن. ءسويتىپ اعامىزعا حابارلاسىپ، مۇستافا ساڭلاقپەن تانىستىق. تاەكۆوندونى مەڭگەرىپ، ءبىر-ەكى اي ىشىندە رەسەي چەمپيونى اتاندىم. مۇستافا ۇستازىمىزدىڭ ءتالىمىن الىپ، ەلگە ورالدىق. قىسقاسى، مەنىڭ شىمكەنتكە كەلۋىمە نەسىپ اعانىڭ سول ءبىر ماقالاسى تۇرتكى بولعان» دەدى.

- جۋىردا مادەنيەت جانە سپورت ءمينيسترى ارىستان مۇحامەدي ۇلىنا كىتابىمدى سىيلادىم. ول وتە جىلى پىكىرىن ءبىلدىردى. ءبىراق كىتاپ مۇقاباسىنىڭ سىرتىنداعى «لوندون وليمپياداسىنداعى جەتىستىكتى تاياۋ ارادا قايتالاي المايمىز» دەگەن پىكىرىمدى وقىپ، «نەگە ولاي دەپ جازاسىز؟» دەپ رەنجىپ قالدى. ياعني بۇل كىتاپ مينيسترگە وي سالدى. ارينە، ەگەر سپورتشىلارىمىز لوندونداعى ناتيجەدەن دە جوعارى جەتىستىككە جەتىپ جاتسا، بارشا جانكۇيەرلەردەن كەشىرىم سۇراۋعا دايىنمىن. سولاي بولۋىنا تىلەكتەسپىن، - دەدى نەسىپ ءجۇنىسباي ۇلى.

ءبىر قىزىعى، بيىل ريو-دە-جانەيرو وليمپياداسىنا باراتىن 11 جۋرناليستىڭ اراسىندا بۇل جۋرناليستىڭ اتى-ءجونى جوق ەكەن. جۇزدەسۋگە قاتىسقان وڭتۇستىك قازاقستان وبلىسىنىڭ وقىرماندارى مەن سپورتشىلارى قازاق سپورتىنا ەڭبەگى سىڭگەن نەسىپ ءجۇنىسباي ۇلى مەملەكەت اتىنان وليمپياداعا بارۋى ءتيىس دەگەن ويلارىن ايتتى. كىتاپ اۆتورىنان قولتاڭبا الىپ، شىعارماشىلىق تابىس تىلەدى.

okg.kz