فۋتبول: «استانا» مەن «قايرات» كوماندالارىنىڭ سۋپەركۋبوكقا تالاسى باستالدى

استانا. قازاقپارات - بۇگىن ەلوردانىڭ «استانا ارەنا» ستاديونىندا قازاقستان فۋتبولىنىڭ جاڭا ماۋسىمى باستالدى.

وندا بىلتىرعى ماۋسىمنىڭ جەڭىمپازى «استانا» مەن كۋبوك يەگەرى الماتىلىق «قايرات» اراسىندا سۋپەركۋبوك ويىنى ءوتىپ جاتىر.

ماتچتىڭ باس تورەشىسى - وزبەكستاندىق قازى راۆشان يرماتوۆ.

ايتا كەتەرلىگى، بۇل وسى ماۋسىمداعى العاشقى ماتچ. كوماندالار اراسىنداعى وزگەرىستەرگە كەلسەك، الماتىلىقتاردا جاڭا ويىنشىلار اراسىندا قاقپاشى اندرەي سيدەلنيكوۆ، «استانا» ساپىندا بىلتىر «قايراتتا» ويناعان دجوردجە دەسپوتوۆيچ پەن اسحات تاعىبەرگەن وينايدى. «قايرات» ءوز تاريحىندا ەل كۋبوگىن 7 مارتە جەڭىپ، سۋپەركۋبوك فينالىنا وسىمەن ەكىنشى رەت شىعىپ وتىر. ايتا كەتەرلىگى، بىلتىرعى جىلى «استانا ارەنادا» «استانا» مەن «قايرات» شىعىپ، پەنالتي سەرياسى بويىنشا ەلوردالىقتار جەڭىسكە جەتكەن بولاتىن.

«استانانىڭ» باس باپكەرى ستانيمير ستويلوۆ باسپا ءسوز ءماسليحاتىندا كومانداسىنىڭ بىلتىر كورسەتكەن فۋتبولدى پاش ەتە الاتىنىن سەنىمدى ايتقان بولاتىن. ونىڭ ءسوزى بويىنشا، «استانا» كومانداسىنىڭ بارلىق ويىنشىلارى جوعارى دايىندىقپەن كەلىپ وتىر.

«استانا» مەن «قايرات» اراسىنداعى بۇل ويىندا جولداستىق ماتچ سەكىلدى بولۋى مۇمكىن ەمەس. ۇلكەن فۋتبول قاقتىعىسى ورىن الادى. ءبىز بۇل سۋپەركۋبوكقا مىقتى دايىندالدىق. فۋتبولشىلار بارلىق كۇشىن سالىپ، ونەرىن كورسەتۋى ءتيىس»، - دەدى س. ستويلوۆ.

اۆتور: قانات مامەتقازى ۇلى