قازاقتىڭ ۇلتتىق اشەكەي بۇيىمدارى الەمنىڭ ءتۇرلى ەلدەرىندە تانىمال بولىپ كەلەدى - فوتو
بۇگىندە الەمنىڭ ءتۇرلى ەلدەرىندەگى ايەلدەر مەن بويجەتكەندەردىڭ قازاقتىڭ ۇلتتىق ناقىشتا جاسالعان زەرگەرلىك بۇيىمدارىنا ەرەكشە نازارى اۋىپ وتىر. بۇل تۋرالى نازىك جاندىلاردىڭ ادەمى وبرازدارىن جاساپ، تولىقتىرۋمەن اينالىساتىن مامانداردىڭ ءبىرى، ديزاينەر ءامينا شوقپاروۆا بايانداپ بەردى.
«قازاقپارات» اگەنتتىگىنىڭ ءتىلشىسى حالىقارالىق ايەلدەر كۇنىنە وراي ءامينا شوقپاروۆاعا ارنايى حابارلاسقان ەدى.
«بۇگىندە قازاقستان نارىعىندا ۇلتتىق اشەكەيلەر وتە كوپ. مەن بۇعان قاتتى قۋانىپ وتىرمىن. ءۇش جىل بۇرىن ۇلتتىق اشەكەيلەردى ساتۋ وتە قيىن بولعان: ادامدار تاڭدانا قاراسا دا، ولاردى كوبىنە كادەسىي رەتىندە ساتىپ الاتىن. كۇندەلىكتى ومىردە تاعىپ جۇرۋگە بولاتىن اشەكەي بۇيىمى رەتىندە سانامايتىن. قازىرگى كەزدە مەن ۇلتتىق اشەكەيلەردى تاعىپ جۇرگەن تالاي جاس قىزدار، ەگدە جاستاعى ايەلدەردى كورىپ ءجۇرمىن»، - دەپ ءبولىستى ءوز كورگەن-بىلگەنىمەن ءامينا شوقپاروۆا.
«ماعان شابىت سىيلايتىن ەڭ باستى نارسە - داستۇرلەر مەن تاريحي فاكتىلەر. ءبىزدىڭ اشەكەيلەر، ءبىرىنشى كەزەكتە، قانداي دا ءبىر ادەمى ديزايننان ەمەس، تاريح پەن قازاق حالقىنىڭ داستۇرلەرىنەن تۋىندايدى. مەنىڭ بارلىق اشەكەيلەرىم جەتەكشىم - تاريح عىلىمدارىنىڭ دوكتورى، 20 جىلدان استام ۋاقىت قازاق ۇلتتىق اشەكەيلەرىن زەرتتەپ كەلە جاتقان شايزادا توقتابايەۆامەن كەلىسىلەدى. مەن ءۇشىن كونە اشەكەيلەردە كورسەتىلگەن ءمان-ماعىنانى ساقتاپ قالۋى وتە ماڭىزدى»، - دەدى ديزاينەر.
«ايەل باقىتى. ءار ادام «باقىت» ءسوزىن ءارتۇرلى تۇسىنەدى، ءبىراق مەن ايەل ادامنىڭ ماحاببات، مەيىرىمگە بولەنۋى - شىنايى باقىتى دەپ سانايمىن. مەنىڭ باقىتىم - ارينە، مەنىڭ وتباسىم: جۇبايىم، بالالارىم. مەن بارلىعىمىز جينالىپ، تۇرمىستىق ماسەلەلەردى، شىعارماشىلىق، جۇمىس شارۋالارىن ورتاعا سالىپ، تالقىلاعاندا باقىتتىمىن»، - دەپ تۇيىندەدى ءسوزىن ءامينا شوقپاروۆا، قازاقستاننىڭ بارلىق ايەلدەرىن كوكتەم مەرەكەسى - 8- ناۋرىزبەن قۇتتىقتاي وتىرىپ.
