قابادان كەلگەن قانداسىمىزدىڭ شاكىرتى قازاقستان چەمپيونى اتاندى - فوتو
بۇگىنگى ستاتيستيكالىق مالىمەتتەرگە سۇيەنسەك، ەلباسى ن. نازاربايەۆتىڭ كوشەلى كوشى-قون ساياساتىنىڭ ارقاسىندا قازىر ەلىمىزگە تابان تىرەگەن قانداستارىمىزدىڭ سانى ميلليوننان اسىپتى.
بۇل قازاقستاننىڭ دەموگرافيالىق وسىمىنە قوسىلعان ولشەۋسىز ۇلەس ەكەنى ايتپاساق تا تۇسىنىكتى. قازىر ەلگە ورالعان قانداستارىمىزدىڭ ىشىندە ءوزى قالاعان كاسىپپەن اينالىسىپ، سان سالانىڭ ۇزدىكتەرى اتانىپ جۇرگەندەرى دە بارشىلىق. «قازاقپىن، ءوز وتانىمدا ءومىر سۇرەيىن، ءوز ەلىمە ۇلەسىمدى قوسايىن، ۇرپاعىم قازاق توپىراعىندا ءوسسىن» دەپ كەلىپ، ەلىنە الاقان جايماي، كەرىسىنشە اتا-جۇرتىما نە بەرەم بەرەم دەپ جۇرگەن باۋىرلارىمىزدى كورگەندە اللاعا شۇكىرلىك ەتەسىڭ، ارينە!
مىنە، سونداي قانداستارىمىزدىڭ ءبىرى - قىتايدىڭ التاي ايماعى قابا اۋدانىنان كەلىپ، بۇگىندە شىعىس قازاقستان وبلىسى كۋرچاتوۆ قالاسى بويىنشا جاسوسپىرىمدەر سپورت مەكتەبىندە گىر سپورتىنان اعا جاتتىقتىرۋشى بولىپ قىزمەت اتقارىپ جاتقان قانداسىمىز نۇرجان جۇماجان ۇلى.
ەلىنە ورالىپ ەلەۋلى ەڭبەك جاساپ جاتقان نۇرجاننىڭ جاقىندا ءوز شاكىرتتەرىمەن بىرگە قوستاناي قالاسىندا وتكەن گىر سپورتىنان قازاقستان چەمپيوناتىنا قاتىسىپ، جۇلدەلى قايتىپ بارا جاتقان جولىنان كەزدەسىپ، سۇحباتتاسقان بولاتىنبىز.
- جۇلدەلەرىڭىز قۇتتى بولسىن!
- راحمەت!
- گىر سپورتىنان قوستانايدا وتكەن قازاقستان بىرىنشىلىگىنە قانشا شاكىرتىڭىز قاتىستى؟
- مەن كۋرچاتوۆ قالاسىنان ءوزىمنىڭ قول استىمدا جاتتىعاتىن 4 بالانى ەرتىپ باردىم. بىرەۋىنىڭ باعى مەن بابى قاتار شاۋىپ، قازاقستان چەمپيونى اتاندى. تاعى ءبىر سپورتشىم ءتورتىنشى ورىنعا تابان تىرەدى. ال قالعان ەكەۋى 6-7-ورىنداردان كورىندى. بۇل ەل بىرىنشىلىگىنىڭ سپورتشىلارىمىز ءۇشىن ماڭىزى ەرەكشە بولدى. چەمپيون اتانعان بالالارعا التىن مەدالمەن بىرگە وسى جازدا لاتۆيا ەلىندە وتەتىن ەۋروپا چەمپيوناتىنا جولداما بەرىلدى.
- ءتورت بالانىڭ بىرەۋى چەمپيون اتانۋى ۇلكەن جەتىستىك ەكەنى بەلگىلى. شاكىرتىڭىز تۋرالى تولىعىراق ايتىپ وتسەڭىز؟
- چەميونىمنىڭ اتى-ءجونى - اقجول جەڭىسحان ۇلى، 73 كەلى سالماقتا سىنعا ءتۇستى. ۇستاز بەن شاكىرتتىڭ بىرلەسە جاساعان ەڭبەگىنىڭ ارقاسىندا بارلىق قارسىلاستارىنان وق بويى وزىق شىعىپ، جەڭىس تۇعىرىنىڭ ەڭ بيىك ساتىسىنا كوتەرىلدى. ەندى جازدا لاتۆياعا بارىپ، ەۋروپا بىرىنشىلىگىنە قاتىساتىن بولادى.
- جالپى، قولاستىڭىزدا قانشا بالا جاتتىعادى؟
- گىر سپورتى ەلىمىزدە كەرەمەتتەي دامىعان سپورت ءتۇرى دەپ ايتا المايمىن. كوپ جاعدايدا مەرەكە مەيرامداردا گىر كوتەرۋدەن جارىستار بولىپ جاتادى. ول جاي اۋەسقويلىق. ال كاسىبي تۇردە ەندى-ەندى دامىپ كەلەدى. سوندىقتان گىر سپورتىنا كەلەتىن بالالاردىڭ سانى اسا كوپ ەمەس. ءبىراق، مەن ءوزىم جۇمىس جاساپ جاتقان شاعىن اۋداندا گىر سپورتىنا دەگەن قىزىعۋشىلىق وتە جاقسى. قازىر قول استىمدا 20 دان استام بالا جاتتىعادى. تەك ۇلدار عانا ەمەس، قىز بالالار دا جاتتىعىپ جاتىر. مەكتەبىمىزدىڭ جۇمىس كەستەسىنە سايكەس بالالار ءۇش اۋىسىم بويىنشا جاتتىعادى.
- بۇعان دەيىن دە جەتىستىكتەرگە قول جەتكىزگەن شاكىرتتەرىڭىز بار بولار؟
- ارينە، وتكەن ايدا عانا 2003-جىلعى ءبىر قىز بالامىز شىعىس قازاقستان وبلىسىندا وتكەن جاسوسپىرىمدەر اراسىنداعى ەل بىرىنشىلىگىندە باس جۇلدەنى جەڭىپ الدى. وتكەن جىلعى شىمكەنت قالاسىندا وتكەن ەل بىرىنشىلىگىندە ەكى شاكىرتىم قورجىنىمىزعا ەكى مادال سالىپ قايتتى.
وندا بۇگىنگى چەمپيون اتانعان اقجول جەڭىسحان ۇلى ءۇشىنشى ورىنعا قول جەتكىزگەن. مىنە، بيىل باس جۇلدەمەن بىرگە لاتۆيادا وتەتىن ەۆروپا بىرىنشىلىگىنىڭ جولداماسىن دا جەڭىپ الىپ وتىر. وسىنداي شاكىرتتەرىمنىڭ ارقاسىندا اۋدانىمىز شىعىس قازاقستان بويىنشا گىر سپورتىنان وسكەمەن قالاسىنان كەيىنگى ەكىنشى ورىندا كەلەدى. بۇل ءبىزدىڭ ەڭبەگىمىزدە ىلگەرىلەۋشىلىكتىڭ بار ەكەنىن كورسەتەدى. ەندى ەۋروپا بىرىنشىلىگىنە دايىندىقتى باستايمىز.
- باپكەرلىكپەن اينالىسۋدىڭ قانداي قيندىقتارى بار؟
- ءوزىڭ قالاعان كاسىپتىڭ قيىندىعىن قۋانىشتى جاقتارى جەڭىپ كەتەدى. العاشىندا ءتىل جاعىنان ازداپ قيىندىقتار بولعانىن جاسىرا المايمىن. سەبەبى، اتا-جۇرتىمىزداعى ءبىلىم ورداسىندا ۇستازدىق ەتىپ، شاكىرت تاربيەلەپ جاتقان سوڭ، «مەن تەك قازاق بالالارىن عانا تاربيەلەيمىن، سولاردى عانا جاتتىقتىرامىن» دەپ ايتا المايسىڭ عوي. ءبىزدىڭ ەلىمىز كوپ ۇلتتى مەملەكەت. قازىردىڭ وزىندە قول استىمدا بىرنەشە ۇلت وكىلدەرىنىڭ بالالارى جاتتىعىپ جۇر. سولاردىڭ ىشىنەن كىم سپورتتى جالىقپاي جالعاستىرپ، مىقتىلىعىن دالەلدەيدى، سونىمەن ارى قاراي جۇمىس ىستەيمىز. مەن باپكەر بولعاندىقتان ەشقاشان، ەشكىمدى ۇلتىنا، رۋىنا بولگەن ەمەسپىن. كىم كەلىپ، سپورتپەن اينالىسام دەسە، ەسىگىمىز اشىق.
- وقۋ ورىندارىڭىزدا سپورتتى ارى قاراي دامىتۋعا قانشالىق مۇمكىندىكتەر قاراستىرىلعان؟ بالالاردى جارىسقا اپارۋ بارىسىندا قانداي قيىندىقتار كەزدەسەدى؟
- وقۋ وردامىزدا بارلىق شارت-جاعداي جاسالعان. جەرگىلىكتى اكىمدىكتەر، مەكتەپ باسشىلىعى - بارلىعى دا ءبىزدىڭ سپورتىمىزدى دامىتۋعا وزىندىك ۇلەستەرىن قوسىپ كەلەدى. ءار جارىسقا بارىپ، جۇلدەلى ورىندارعا ىلىككەندە قۋانىشىمىزدى قۇتتىقتاپ، كەلگەندە گۇل شوقتارىن الىپ، سالتاناتتى تۇردە قارسى الادى. جارىسقا اتتاناردا دا ساتتىلىك تىلەپ، جول شىعىندارىمىزدى كوتەرىپ، شىعارىپ سالادى. بۇدان ارتىق قانداي كومەك بولسىن... ولارعا العىستان باسقا ايتارىمىز جوق.
- ءوزىڭىزدىڭ سپورتتا قانداي جەتىستىكتەرىڭىز بار؟
- ستۋدەنت كەزىمدە ءوزىم دە گىر سپورتىمەن اينالىستىم. شىعىس قازاقستان وبلىسىنىڭ گىر سپورتىنان باس جاتتىقتىرۋشىسى ءادىل ءابدىعالي دەگەن اعانىڭ قول استىندا جاتتىعىپ، اۋداندىق، وبلىستىق جانە ەل بىرىنشىلىكتەرىنە قاتىسىپ، كوپتەگەن جۇلدەلى ورىندارعا يە بولدىم. الايدا، وقۋ بىتىرگەن سوڭ، جۇمىسقا كىرىسىپ كەتتىم. ءبىراق، سپورت مۇعالىمى وقۋشىلارىن جاتتىقتىرا ءجۇرىپ، ءوزى دە جاتتىعادى. سەبەبى، تاربيەلەپ جاتقان شاكىرتتەرىڭ وزىڭە قاراپ وسەدى. سوندىقتان ءالى كۇنگە جاتتىعۋدان قول ۇزگەن ەمەسپىن. ەندىگى ماقساتىم: اتا-جۇرتىما ادال ەڭبەك ەتىپ، شاكىرتتەرىم اراسىنان الەم چەمپيوندارىن شىعارىپ، الەمدىك رەكوردتار جاساۋ. ءبىز ەلىمىز-جەرىمىز دەپ كەلگەن سوڭ ەلگە قىزمەت ەتۋىمىز كەرەك. قانداستارىمىز دا قازاق سپورتىنىڭ گۇلدەنۋىنە ءوز ۇلەستەرىن قوسۋى ءتيىس دەپ ەسەپتەيمىن.
- اڭگىمەڭىزگە كوپ راحمەت!
سۇحباتتاسقان كۇنسۇلتان وتارباي
