قازاقستاندا سۇلۋلىق بايقاۋلارىنىڭ جەڭىمپازدارى اتانعان ارۋلار - فوتو
2013-جىلدىڭ جەلتوقسان ايىندا «قازاقستان ارۋى» اتاعىن 24 جاستاعى الماتىلىق ايداي يسايەۆا جەڭىپ العان بولاتىن. ءبىر جىلدان كەيىن ول «الەم ارۋى-2014» بايقاۋىنا دا قاتىستى. قازىر، ايداي تۇرمىستا، ءبىر ۇلى بار. بولاشاقتا ءسان بيزنەسىندەگى جۇمىسى مەن دارىگەرلىك قىزمەتىن جالعاستىرعىسى كەلەدى.
ايداي يسايەۆادان كەيىن «قازاقستان ارۋى-2014» بايقاۋىن الماتىلىق رەگينا ۆاندىشيەۆا جەڭىپ الدى. التىن تاجگە يە بولعان ول، كەلەسى جىلى «الەم ارۋى-2015» بايقاۋىنا قاتىستى. رەگينا سپورتپەن بەلسەنە شۇعىلدانادى. قازىر ول - جەڭىل اتلەتيكا بويىنشا سپورت شەبەرلىگىنە كانديدات.
وتكەن جىلى رەگينا ۆاندىشيەۆا «قازاقستان ارۋى-2015» بايقاۋىنىڭ التىن ءتاجىن اقتاۋ قالاسىنىڭ ارۋى ءاليا مەرگەنبايەۆانىڭ باسىنا كيگىزدى. 17 جاستاعى ارۋ بايقاۋ كەزەڭدەرىنىڭ بىرىندە سۇيىكتى كىتابى تۋرالى سۇراققا: «كىتاپ وقىمايمىن»، - دەپ جاۋاپ بەرىپ، كوپشىلىكتى تاڭ قالدىرعان بولاتىن.
بىرەۋلەر ونى ايىپتاسا، ەندى بىرەۋلەر شىن جاۋاپ بەرگەنى ءۇشىن ريزا دا بولىستى. دەگەنمەن، ءسال كەيىنىرەك، ءاليا ءوزىنىڭ بەرگەن جاۋابىن كوپشىلىكتىڭ دۇرىس تۇسىنبەگەندىگىن، كىتاپ وقيتىندىعىن، ءبىراق تەك ءوز سالاسى، ياعني «قوناق ءۇي بيزنەسى» ماماندىعى بويىنشا وقيتىندىعىن، ال باسقا كىتاپتاردى وقۋعا ۋاقىتى جوقتىعىن ايتىپ اقتالدى.
ال «كوكتەم ارۋى-2016» بايقاۋىندا ماڭعىستاۋ ونەر كوللەدجىنىڭ ستۋدەنتى ادەماي اشىقبايەۆانىڭ باعى جاندى. بۇل بايقاۋعا قالاداعى جوعارى جانە ورتا ءبىلىم مەكەمەلەرىنەن 12 بويجەتكەن قاتىسقان بولاتىن. «سالەمدەسۋ» اتتى ءبىرىنشى كەزەڭدە بايقاۋعا قاتىسۋشىلار وزدەرى تۋرالى قىسقاشا بايانداۋعا ءتيىس بولدى. «دەفيلە» اتتى ەكىنشى كەزەڭدە بويجەتكەندەر قازاقشا كيىم ۇلگىسىن كورسەتتى. «سۇراقتار مەن جاۋاپتار» اتتى ءۇشىنشى كەزەڭدە قاتىسۋشىلار قازاقتىڭ سالت-داستۇرلەرى جانە ەل تاۋەلسىزدىگىنە قاتىستى سۇراقتارعا جاۋاپ بەردى. ال «تالانتتار بايقاۋى» اتتى ءتورتىنشى كەزەڭدە ولار وزدەرىنىڭ ءان، ءبي جانە اقىندىق شەبەرلىگىن تانىتتى.
«قازۇۋ ارۋى-2015» اتاعىن حيميا جانە حيميا تەحنولوگياسى فاكۋلتەتىنىڭ 3- كۋرس ستۋدەنتى ايسۇلۋ بايسەڭگىروۆا جەڭىپ الدى.
بايقاۋ اياسىندا وتكەن دارىندىلار بايقاۋىندا ايسۇلۋ ۇلى وتان سوعىسىنا قاتىسقان ءوزىنىڭ اتاسى تۋرالى قويىلىم كورسەتتى. ءسويتىپ، كورەرمەندەر مەن قازىلار القاسىنىڭ ىستىق ىقىلاسىنا بولەنگەنى بەلگىلى.
ال استانالىق ورتا مەكتەپتىڭ 11- سىنىپ وقۋشىسى الەنا لىساك «حان شاتىرى ارۋى-2015» اتاعىن جەڭىپ الدى. سونداي-اق، وعان جۇلدە رەتىندە 10 مىڭ دوللار تابىس ەتىلدى. بويجەتكەن بۇل اقشانى ۋنيۆەرسيتەتتەگى وقۋىنا جۇمسايتىندىعىن ايتتى.
ال يننوۆاتسيالىق گۋمانيتارلىق ۋنيۆەرسيتەتتىڭ ستۋدەنتى كاميلا تەمىروۆا «استانا ارۋى-2015» بايقاۋىندا جەڭىمپاز اتاندى.
پاۆلودار قالاسىنداعى 20№ مەكتەپ-ليتسەيدىڭ 16 جاستاعى وقۋشىسى سوفيا شاريكوۆا «پاۆلودار ارۋى-2015» بايقاۋىنىڭ ەڭ جاس قاتىسۋشىسى بولعان ەدى. الايدا، ءوزىنىڭ ءبىلىمدارلىعى جانە تابيعي بولمىسىمەن قازىلار القاسىنىڭ ريزاشىلىعىنا بولەنىپ، باسىنا التىن ءتاج كيدى.
«شىمكەنت ارۋى-2015» بايقاۋىن 18 جاستاعى اقمولدىر ءابدىراحمانوۆانىڭ جەڭىپ العانىن بىلەسىزدەر. وعان جۇلدە رەتىندە 100 مىڭ تەڭگەنىڭ سەرتيفيكاتى تابىس ەتىلدى. وسىلايشا، اقمولدىر شىمكەنت قالاسى اتىنان «قازاقستان ارۋى-2015» بايقاۋىنا قاتىسۋ قۇقىعىنا يە بولدى.
«پەتروپاۆل ارۋى-2015» بايقاۋىندا سولتۇستىك قازاقستان مەملەكەتتىك ۋنيۆەرسيتەتىنىڭ ستۋدەنتى، بولاشاق قارجىگەر الينا حليەۆوۆا ۇزدىك دەپ تانىلدى.
ءارى قاراي كەتتىك، «كوكشەتاۋ ارۋى-2015» بايقاۋى «كوكشەتاۋ» سارايىندا ءوتتى. وعان 12 بويجەتكەن قاتىستى. بايقاۋ قورىتىندىسى بويىنشا ش. ءۋاليحانوۆ اتىنداعى كوكشەتەۋ مەملەكەتتىك ۋنيۆەرسيتەتىنىڭ 21 جاستاعى ستۋدەنتى جاننا حايرۋللينا كوكشەتاۋ قالاسىنىڭ اقىلىنا كوركى ساي ەڭ سۇلۋ ارۋى اتاندى.
ال «ورال ارۋى-2015» بايقاۋىن 18 جاستاعى ۆەرونيكا زلاتا جەڭىپ الدى. قازىلار القاسى ونىڭ بىلىمدىلىگىن، سىمباتتىلىعىن جانە كوپشىلىك الدىندا ءوزىن ۇستاي ءبىلۋ قابىلەتىن جوعارى باعالادى.
«الماتى ارۋى-2015» بايقاۋىندا قازاقتىڭ سپورت جانە تۋريزم اكادەمياسىنىڭ تۇلەگى، 20 جاستاعى ارۋ رەگينا ۆالتەر جەڭىمپاز اتاندى.
ال «تالدىقورعان ارۋى-2015» بايقاۋىن ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ ستۋدەنتى ايدانا قانايبايەۆا جەڭىپ الدى.
«قوستاناي ارۋى-2015» بايقاۋىنىڭ التىن ءتاجىن قوستاناي پەداگوگيكالىق كوللەدجىنىڭ 19 جاستاعى ستۋدەنتى كسەنيا برۋما كيدى. 18 جاستاعى رەناتا نۇرعازينا بولسا، «قاراعاندى ارۋى-2015» بايقاۋىنىڭ جەڭىمپازى اتاندى.
اۆتور: ايبوتا جاپپاربەرگەن
