قازاقستانداعى تانىمال ايەلدەر وزدەرىنىڭ جاقىندارىنان قانداي سىيلىق كۇتپەك؟

استانا. قازاقپارات - قازاقستانداعى تانىمال ايەلدەر، قوعام قايراتكەرلەرى قازاقپارات تىلشىسىنە وزدەرىنىڭ تۋىستارى مەن جاقىندارىنان قانداي سىيلىق كۇتەتىنىن ايتىپ بەردى.

ەلوردا اكىمىنىڭ بۇرىنعى ورىنباسارى، استانا قالاسى «ەسىل» اۋدانىنىڭ اكىمى سابيلا مۇستافينا نەمەرەلەرى تابىستايتىن سىيلىقتار ەرەكشە ىستىق ەكەنىن ءسوز ەتتى.

«مەن نەگىزى تاسباقالاردى جاقسى كورەمىن. كۇيەۋىم 8 -ناۋرىزدا ءاردايىم ماعان تاسباقا سىيعا تارتۋعا تىرىسادى. نەمەرەلەرىم ءتۇرلى تاقىرىپتاردا سالعان سۋرەتتەرىن سىيعا تارتادى. ۇلىم ءقازىر شەت ەلدە بولعاندىقتان، سول كۇنى «سكايپ» جەلىسى ارقىلى قۇتتىقتايدى. ال ارىپتەس ەر ازاماتتار گۇل سىيلايدى»، - دەدى اۋدان اكىمى.

ال ق ر پارلامەنت ءماجىلىسىنىڭ ءتورتىنشى جانە بەسىنشى شاقىرىلىمىنىڭ دەپۋتاتى گۇلجان قاراقۇسوۆا ءاردايىم اينالاڭداعى قورشاعان ادامداردىڭ نازارىندا بولعان ماڭىزدى ەكەنىن جەتكىزدى.

«گۇل سىيلاۋدىڭ ءوزى ۇلكەن سىيلىق دەپ باعالايمىن. باستىسى - ءوزىڭنىڭ جانىنداعى ادامداردىڭ نازارىندا بولۋ ەڭ ۇلكەن سىيلىق بولىپ تابىلادى. قازىر ماعان گۇل سىيلاپ، قۇتتىقتاۋلار ايتىپ جاتىر جانە وسى ىزگى نيەتتەردى مەن وتە جوعارى بالاپ تۇرمىن. ەگەر دە ايتىلعان تىلەكتەر شىن جۇرەكتەن جەتكىزىلسە، بۇدان باسقا سىيلىق كەرەك ەمەس»، - دەيدى گ. قاراقۇسوۆا.

بۇدان بولەك،  «Expo & Women» (حالىقارالىق ايەلدەر ۇيىمى) پرەزيديۋمنىڭ ءتورايىمى، «جاسىل ەكونوميكا ءۇشىن جانە G-GLOBAL -دى دامىتۋ»   كواليتسياسى باسقارماسىنىڭ ءتورايىمى سالتانات راحىمبەكوۆا دا سىيلىق رەتىندە گۇلدەردى قالايتىنىن اتاپ ءوتتى.

«مەن گۇلدەردى وتە جاقسى كورەمىن. سەبەبى، سىيعا گۇل العان كەزدە ادامداردىڭ ساعان دەگەن سىيلاستىعىن بايقايسىڭ. وسى ورايدا ماعان توسىن سىي جاساعاندى ۇناتامىن. گۇلشوقتاردىڭ ۇلكەن نەمەسە كىشكەنتاي بولۋى ماڭىزدى ەمەس، ەڭ باستىسى جاقىندارىڭنىڭ نازارىندا بولۋ. سونىمەن قاتار سىيلىقتى تابىستاعان ادامنىڭ كوز جانارىنا ەرەكشە ءمان بەرەمىن. ياعني، ادامداردىڭ قانداي پەيىلمەن ساعان گۇل سىيلاپ جاتقانىن كورۋ كەرەك. ارينە، وتە ۇلكەن سىيلىق - ول جاقىندارىڭنىڭ نازارى، ال سىيلىق ەكىنشى كەزەكتە»، - دەدى ول.

اۆتور: رۋسلان عابباسوۆ