بيىل جارىققا شىعاتىن بەس وتاندىق فيلم

استانا. قازاقپارات - سوڭعى كەزدە قازاقستاندا قىسقامەتراجدى، دەرەكتى جانە كوركەم فيلمدەر كوپتەپ ءتۇسىرىلدى.

ولاردىڭ ءبىرازى جاقىندا كورەرمەنگە جول تارتادى. نازارلارىڭىزعا 2016 -جىلى جارىققا شىعاتىن ەڭ قىزىق دەگەن فيلمدەردىڭ ءتىزىمىن ۇسىنىپ وتىرمىز.

«جارالى پەرىشتە»

ەمير ءبايعازيننىڭ «جارالى پەرىشتەسى» -  جاسوسپىرىمدەردىڭ باسىنان وتەتىن قيىندىقتار تۋرالى تريلوگيانىڭ ەكىنشى ءبولىمى. بۇل جوباعا قازاقستاننان بولەك، فرانسيا، شۆەيساريا، گوللانديا، گەرمانيا جانە بىرىككەن اراب امىرلىكتەرىنىڭ ماماندارى اتسالىسقان. فيلم فين سۋرەتشىسى حۋگو سيمبەرگتىڭ ايگىلى كارتيناسىمەن اتتاس. مۇندا ءتورت كەيىپكەردىڭ دەمالىس كەزىندە باسىنان كەشكەن وقيعالارى باياندالادى.

«جارالى پەرىشتە» 16 -اقپان كۇنى بەرليندە العاش رەت كورەرمەن نازارىنا ۇسىنىلدى.

«قاراتاس اۋىلىنداعى وبا»

ءادىلحان ەرجانوۆ - وتاندىق كينو سالاسىنا وزىندىك جاڭالىعىمەن كەلگەن جاس رەجيسسەر، «پارتيزاندىق كينونىڭ» وكىلى. ەرجانوۆ ازعانتاي بيۋدجەتپەن سالماعى اۋىر الەۋمەتتىك فيلمدەر تۇسىرەدى. ونىڭ «ۇكىلى كامشات» اتتى تراگيكومەدياسىنىڭ الەمدىك پرەمەراسى اتىشۋلى كانن فەستيۆالىندە وتكەن بولاتىن.

«قاراتاس اۋىلىنداعى وبادا» جاس اكىم شالعايداعى وبا جايلاعان اۋىلعا جۇمىسقا كەلەدى. جەرگىلىكتى بيلىك وكىلدەرى اۋىلدى جايلاعان وبانى جوققا شىعارىپ، ونى جاي عانا تۇماۋعا تەڭەيدى.

«سابينا كەلىن - 2»

تاياۋدا كورەرمەندەر اۋىلعا ويلاماعان جەردەن كەلىن بولىپ تۇسكەن سابينانىڭ باسىنان وتكەن قىزىقتى وقيعالارىمەن قايتا قاۋىشادى. ءفيلمنىڭ العاشقى ءبولىمى 2014 -جىلدىڭ كۇزىندە جارىققا شىققان بولاتىن. سول كەزدە 300 مىڭ دوللارعا تۇسىرىلگەن كارتينا پروكاتتان 800 مىڭ دوللاردان استام قاراجات جيناعان ەدى. ال، ەكىنشى ءبولىمنىڭ بىرنەشە ساحناسى الماتىدا ءتۇسىرىلدى. ءتۇسىرىلىم جۇمىستارىنىڭ قالعان بولىگى دەگەرەس اۋىلىندا وتكەن.

«توقال»

ءفيلمنىڭ ءتۇسىرىلىم جۇمىستارى الماتى مەن لوس- انجەلەستە ءوتتى. مۇندا وتباسىلىق قۇندىلىقتار مەن ۇرپاقتار ساباقتاستىعى ءسوز بولادى. الەۋمەتتىك كارتينادا تەك قازاقستانعا عانا ەمەس، الەمنىڭ كوپتەگەن ەلدەرىنە ورتاق پروبلەما ايتىلادى.

- توقال التىن تورعا قامالعا توتىقۇس پا، الدە؟ نەلىكتەن، ەر ازاماتتار وزدەرىنىڭ الەۋمەتتىك جاعدايى جاقسارا باستاعاننان- اق، كوڭىلدەستەرىمەن قارىم- قاتىناسىن زاڭداستىرۋعا بەل بۋادى؟ ولاردىڭ نەكەلى جارلارى وتباسىن ساقتاپ قالۋ ءۇشىن نە ىستەيدى؟

وسى ۋاقىتقا دەيىن جۇرت ماعان «توقال تاقىرىبىنا كينو ارناساڭ، ەلدىڭ بەدەلىنە نۇقسان كەلتىرەسىڭ» دەپ كەلدى. الايدا، مەن گولليۆۋدتا ون جىلدان بەرى ىستەپ جۇرگەندىكتەن، مىقتى كارتينالارعا وسىنداي وتكىر تاقىرىپتار قاجەت ەكەنىن بىلەمىن، - دەيدى ءفيلمنىڭ پروديۋسەرى گاۋھار نۇرتاس.

«جاڭعاق اعاشى»

قازاقستاندىق رەجيسسەر ەرجان نۇرمۇحامبەتوۆتىڭ بۇل تۋىندىسىنىڭ الەمدىك پرەمەراسى پۋسان فەستيۆالىندە ءوتتى. سول فەستيۆالدە بايقاۋعا قاتىسقان «جاڭعاق اعاشى» «جاڭا اعىستار» اتالىمىندا جەڭىسكە جەتتى. فيلمدە قاراپايىم وتباسىنىڭ حيكاياسى باياندالادى.

- «جاڭعاق اعاشىن» كومەديا دەۋگە كەلمەس. بۇل - ساتيرا. كارتينانىڭ سيۋجەتى وتە قاراپايىم. كۇندەلىكتى ءومىر اعىمى كينووندىرىس تىلىندە بەرىلدى. فيلم كورەرمەندى ءاردايىم اينالاسىنداعىلارعا مەيىرىممەن قاراۋعا شاقىرادى، - دەيدى رەجيسسەر.

سەناري بويىنشا، «جاڭعاق اعاشىندا» باستى كەيىپكەرلەر جوق. دەگەنمەن، مۇندا بىرنەشە سيۋجەت قاتار ءوربيدى. ەرجان نۇرمۇحامبەتوۆ فيلمدە اۋىلدىڭ اتموسفەراسىن بەرۋگە تىرىسقان.

erkindik.kz