سىر ساقتاۋ - كىسىلىكتىڭ بەلگىسى
استانا. قازاقپارات - سىر - قارسى توتەپ بەرۋگە كەلمەيتىن كۇش قاينارى، سويتە تۇرا تالقاندالمايتىن جاساققا ۇقسايدى.
سىر - ار-ۇيات دەگەن ءسوز. مەيلى وزىنىكى، مەيلى باسقاعا ءتان بولسىن، كىم ونى ساقتاسا، ار-ۇياتىن ساقتاعان بولىپ ەسەپتەلەدى. ونى جۇرتقا جاريالاۋشى ءوز قادىر-قاسيەتىن اياققا تاپتاعان بولىپ سانالادى.
ۇندەمەۋ - دانالىقتىڭ ءبىر بەلگىسى، ءبىراق ونداي ادام تىم از جانە ولاردىڭ بار- جوعى سەزىلمەيدى.
ادامنىڭ سىر بولىسەتىن كىسىسى باسقا بىرەۋدىڭ ار-وجدانىن سىيلاي بىلەتىن ءارى ونىڭ نامىسىن تاپتاتپايتىن اسا سەنىمدى ءارى قۇپيانى ساقتاۋدا دا ءوز ار- نامىسىن قورعاشتايتىنداي وتە قىراعى، بايىپتى بولۋى كەرەك. سەنىمسىز كىسىلەرگە امانات تاپسىرىلماۋى، ار -ۇياتى جوق ادامدارعا سىر ايتىلماۋى كەرەك.
سىر ساقتاۋ ءارى باسقالاردىڭ سىرىن قۇرمەتتەۋ- تولىعىمەن ەرىك- جىگەرگە جانە اقىل- ويعا قاتىستى ادامي قاسيەت. جىگەرسىز ادامنان سىر ساقتاۋدى كۇتۋ ابەستىك بولسا، ىستەگەن ءىسى مەن ايتقان ءسوزىنىڭ سوڭى نەگە ۇرىندىرارىن توپشىلاي المايتىن اڭعال ادامنان دا سىر ساقتاۋدى كۇتۋ بەكەرشىلىك.
سىرىن جۇرتقا جايىپ سالعان ادامعا تاعى سىر ايتۋ - ول الگى ادامنىڭ اقىلسىزدىعى مەن سىرلاس تاڭداۋداعى السىزدىگىن كورسەتەدى. جۇرەگىندە يمانى بەرىك جانە كوزى اشىق، كوكىرەگى وياۋ ادام ەكىنشى مارتە الدانبايدى.
ادام بىرەۋگە بىرنارسەنى ءتۇسىندىرۋى قاجەت بولعان جاعدايدا ونى ءتۇسىندىرۋى ءتيىس، الايدا بارىنشا ساق بولۋى كەرەك. كەز كەلگەن جەردە، ەلدىڭ كوزىنشە جۇرەگىندەگى سىرلاردى اقتارىپ جۇرەتىندەر ءبىر كۇنى وزدەرىن دە، ءارى ءومىر سۇرگەن قوعامىن دا وسى ارەكەتىمەن كوزسىز ولىمگە جەتەلەيتىنىن ەشقاشان ەستەن شىعارماۋى كەرەك.
