الاشتىڭ ءاليحانىنا قۇرمەت انكارادان باستالدى

ۇلت كوسەمىنىڭ دۇنيە ەسىگىن اشقان كۇنى - 5-ناۋرىزدىڭ قارساڭىندا، انكارا قالاسىندا القالى جيىن ۇيىمداستىرىلدى. بۇگىن، 4-ناۋرىز كۇنى تۇركيانىڭ تامىرلى وقۋ ورىندارىنىڭ ءبىرى - گازي ۋنيۆەرسيتەتىنىڭ باس عيماراتىندا تاڭعى ساعات 09.30 دا القالى ءماجىلىس شىمىلدىق ءتۇردى. ساۋلەتكەر كەمالەددين زالى قازىر الاش رۋحىمەن اباتتالدى! «الاشتىڭ ءاليحانى» ءاليحان بوكەيحاننىڭ 150 جىلدىق مەرەيتويى جانە تۇركى زيالىلارى» تاقىرىبىن تەمىرقازىق ەتكەن حالىقارالىق كونفەرەنسيادا - تۇتاس تۇركىنىڭ تاۋ تۇلعالارىن تۇگەندەپ ءھام تاعدىرلى تاريحقا تولىمدى تالداۋ جاسالدى. كەلەلى كەڭەس قۇرار باسقوسۋ ياسساۋي ۋنيۆەرسيتەتتى «ونەر» توبىنىڭ كونسەرتىمەن قورىتىندىلانادى. گازي ۋنيۆەرسيتەتىنە قاراستى «تۇركيات» تۇركى الەمىن زەرتتەۋ ورتالىعىنىڭ باستاماسىمەن تۋ كوتەرگەن كەلەلى باس قوسۋ - ۇيىمداستىرۋ ىسىنە يۋنەسكو- نىڭ تۇركيا ۇلتتىق كوميسسياسى مەن ەلىمىزدىڭ تۇركياداعى ەلشىلىگى, حالىقارالىق تۇركى اكادەمياسى ءھام ق. ا. ياسساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ تىزە قوسىپ، باس بىرىكتىرۋىنىڭ ناتيجەسىندە بەس تاراپتى تاتىمدى تىرلىككە اينالدى.

اتاجۇرتتان ءدۇبىرلى جيىنعا الاش تاقىرىبىندا ايشىقتى ەڭبەكتەنىپ جۇرگەن تۇرسىن جۇرتباي، بەيبىت قويشىباي، سۇلتان حان ءجۇسىپ سىندى ساڭلاق عالىمدار قاتىسىپ جاتىر.

 سونىمەن قاتار، بۇگىن انكارا جيىنىندا سۇلتان حان اقق ۇلىنىڭ «ەر جانىبەك» حالىقارالىق قوعامدىق قورى شىعارعان «ءاليحان بوكەيحان» دەپ اتالاتىن( ءۇش تىلدە: قازاق، اعىلشىن، ورىس) كىتابىنىڭ تۇساۋى كەسىلدى.

اكادەميا تاراپىنان دارحان قىدىرالى باستاعان الىمدى ازاماتتار، تۇركيانىڭ ءتورت بۇرىشىنان بەلدى قوناقتار جەتىپ، مارتەبەلى باسقوسۋدىڭ مەرەيىن اسىردى! انادولىداعى عىلىم الامانىنا انكارادان الىس جاتقان اعايىننىڭ كوڭىلى قۇلاپ، جانكۇيەر بولارىن بىلەمىز. الاشتىڭ ايبوزىنىڭ تويى يۋنەسكو كولەمىندە جىل بويى تويلانباق. توي قۋانىشىن ءاردايىم سىزدەرمەن ءبولىسىپ وتىرامىز.

 «الاۋينفورم»