ورالدا اقىن د. مۇشتانوۆانىڭ «ادامنىڭ جانى ءبىر جۇمباق...» اتتى كەشى ءوتتى - فوتو
اتالمىش ورتالىق پەن قازاقستان جازۋشىلار وداعى ب ق و فيليالى بىرلەسىپ ۇيىمداستىرعان كەش بارىسىندا اقىننىڭ ولەڭدەرى وقىلىپ، سوزدەرىنە جازىلعان اندەر ورىندالدى. تۋعان كۇنى قارساڭىندا وتكەن كەشتە داريعا مۇشتانوۆا وزىنە تىلەكتەس جىر سۇيەم قاۋىممەن سىرلاسىپ، كوكەيكەستى ويلارىمەن ءبولىستى. ءتۇرلى ساۋالدارىنا جاۋاپ بەردى.
بەلگىلى اقىن، قازاقستان جازۋشىلار وداعى ب ق و فيليالىنىڭ ءتورايىمى اقۇشتاپ باقتىگەرەيەۆا ونەردەگى ءسىڭلىسىن تارتىمدى كەشىمەن قۇتتىقتاپ، شىنايى لەبىزىن جەتكىزدى. وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى داۋلەتكەرەي قۇسايىنوۆ ەستەلىك سىيلىق تابىس ەتتى.
كەزىندە رەسپۋبليكالىق اقىندار ايتىسىنا قاتىسىپ، تالاي رەت توپ جارىپ، جۇلدە العان داريعا مۇشتانوۆا جازبا ولەڭدەر جازۋمەن دە اينالىسىپ كەلەدى. ول - بىرنەشە جىر جيناقتارىنىڭ اۆتورى. سوڭعى ون بەس جىل بويى رەسپۋبليكاداعى ۇزدىك مەكتەپتەردىڭ بىرىنە اينالعان تەرەكتى اۋدانى پودستەپنىي اۋىلىنداعى «ءۇمىت» تىلدەر گيمنازياسىنا باسشىلىق ەتىپ كەلە جاتقان د. مۇشتانوۆا - ق ر ءبىلىم بەرۋ سالاسىنىڭ ۇزدىگى، «ەرەن ەڭبەگى ءۇشىن» مەدالى مەن ىبىراي التىنسارين بەلگىسىنىڭ يەگەرى.
ايتا كەتەيىك، قادىر مىرزا ءالي اتىنداعى مادەنيەت جانە ونەر ورتالىعىندا بۇعان دەيىن اقىندار، قازاقستان جازۋشىلار وداعىنىڭ مۇشەلەرى اقۇشتاپ باقتىگەرەيەۆا مەن عايساعالي سەيتاقتىڭ ادەبي- مۋزىكالىق كەشتەرى وتكەن بولاتىن. مۇنداي شارالار جىل بويى جالعاسىن تاپپاق.
اۆتور: ەلجان ەرالى
