الماتى زووباعى «ءىز- ءتۇزسىز جوعالعان» ىلبىستەردى ءولتىرىپ العانىن مويىندادى

ەلىمىزدەگى قار بارىسىنىڭ سانى بەيرەسمي دەرەكتەر بويىنشا 200-گە دە جەتپەيدى ەكەن. ال، سوڭعى 8 جىلدا الماتى زووباعى ءدال وسىنداي 6 جىرتقىشتى ءولتىرىپ العان دەپ حابارلايدى Skifnews.kz.

الماتىداعى حايۋاناتتار باعىندا بۇعان دەيىن بولعان ىلبىستەردىڭ ءىز- ءتۇسسىز جوعالىپ كەتكەندىگى تۋرالى اقپارات وسىدان بىرنەشە كۇن بۇرىن الەۋمەتتىك جەلىلەردە تاراعان ەدى. ينتەرنەت قولدانۋشىلارى اڭداردىڭ ساتىلىپ كەتۋى مۇمكىن دەگەن پىكىرلەرىن دە ايتقان بولاتىن. الايدا، زووباق وكىلدەرى بۇل پىكىردى تەرىسكە شىعاردى. Zakon.kz پورتالىنا سۇحبات بەرگەن مەكەمە ديرەكتورىنىڭ ورىنباسارى اعىباي اجىبايەۆتىڭ ايتۋىنشا، قار بارىستارى كەسەلدىڭ سالدارىنان ءولىپ قالعان.

«ولار ەشقايدا جوعالعان جوق، ەشكىمگە ساتىلعان دا جوق. بارلىعى اۋرۋدىڭ سالدارىنان ءتۇرلى ۋاقىتتاردا ءولىپ قالدى»، - دەيدى الماتى زووباعى ديرەكتورىنىڭ ورىنباسارى.

ونىڭ ايتۋىنشا، وسى كۇنگە دەيىن ورتالىققا 6 ءىلبىس جاپونيا، پولشا، فرانسيا جانە قىرعىزستاننان سىيعا تارتىلعان. ماسەلەن جاپونيادان كەلگەن مايا ەسىمدى بارىس 2009 - جىلى وكپە قابىنۋىنان، پولشادان اكەلىنگەن ارتوس 2008 - جىلى وزگە اۋرۋدان مەرتىككەن.

«فرانسيادان اكەلىنگەن اريلان ەسىمدى ۇرعاشى بارىس 2013 - جىلى ءولدى. ءبىزدىڭ زووباقتا ءۇش جىل ءومىر ءسۇردى. تۇقىمىن كوبەيتۋ ءۇشىن قولدان كەلگەنىن جاساپ كوردىك، ءبىراق ناتيجەسىز. ال، 2012 - جىلى قىرعىزستاننان ليدەر مەن پيرات ەسىمدى ەركەك بارىستار اكەلىندى. 2014 - جىلى ەكەۋى دە مەرتىكتى: ءبىرى قاراشادا ەكىنشىسى شىلدەدە»، - دەيدى ءاجىباي.

زووباقتا سونداي- اق، سنەجاننا ەسىمدى ۇرعاشى ءىلبىستىڭ بولعانى دا بەلگىلى. الايدا، ول دا ۇزاق ءومىر سۇرمەگەن. جەرگىلىكتى مامانداردىڭ ايتۋىنشا، جىرتقىشتاردىڭ بۇلايشا قىرىلىپ قالۋىنا ءومىر ءسۇرۋ ورتاسى كەسىرىن تيگىزگەن ەكەن.

«قار بارىستارىن ۇستاۋعا ارنالعان ورىن ءساتسىز تاڭدالعان. بىرىنشىدەن، بۇل جەر وزەنگە جاقىن، ياعني ۇنەمى دىمقىل بولىپ تۇرادى. ەكىنشىدەن، اعاشتاردىڭ كوپتىگىنەن ۇنەمى كولەڭكە، كۇن تۇسپەيدى. ونىڭ ۇستىنە، جىرتقىشتار جاتقان قورشاۋدى كۇندەلىكتى زالالسىزداندىرىپ وتىرۋ مۇمكىن ەمەس»، - دەپ اتاپ ءوتتى مەكەمە ديرەكتورىنىڭ ورىنباسارى.

اعىباي اجىبايەۆ بارىستارعا قولايسىز جاعدايدى مەكەمەنىڭ بۇرىنعى باسشىلارى جاسادى دەگەندى ايتىپ وتىر. حايۋاناتتار باعىنىڭ باسشىلىق قۇرامى 2010 - جىلى اۋىسقان. ال، ىلبىستەرگە ارنالعان قورشاۋلار وعان دەيىن سالىندى دەيدى ول.

وسىلايشا، اينالدىرعان 8 جىلدىڭ ىشىندە الماتى زووباعىنىڭ ماماندارى 6 بىردەي قار بارىسىن ءولتىرىپ العان. قازىر مۇندا اتالعان اڭنىڭ بىردە- ءبىرى جوق. باسشىلارى بولسا بيىل جاڭا قورشاۋلار سالعاننان كەيىن عانا تاۋ جىرتقىشىن الدىرتامىز دەپ وتىر.