الماتى وبلىسىندا تۇرعىن ءۇيدىڭ توبەسىنە اسپاننان بەلگىسىز زات قۇلادى
جارىلماعان بولىگى اۋلادا ۇزاق جاتىپ، كەيىننەن ول جەرگە ساپەرلار مەن پوليتسيانىڭ جەدەل ارەكەت ەتۋ توبى جەتكەن دەپ حابارلايدى 31- ارنا.
بويلارىن ۇرەي بيلەگەن ءۇي يەلەرى ويدا جوقتا اسپاننان تۇسكەن زاتتىڭ نە ەكەنىن اڭعارماعان. ءۇيدىڭ شاتىرىن تەسىپ، اۋلاعا تۇسكەن زاتتىڭ ناقتى قانداي بۇيىم ەكەنىن قاراپايىم تۇرعىندار تۇگىل پوليتسەيلەر مەن اسكەريلەر دە بىلە الماي جاتىر.
الماتى ىرگەسىندەگى كوكساي اۋىلى قالادان 5 اق شاقىرىم جەردە. جاقىن ماڭدا ەشقانداي اسكەري ءبولىم نەمەسە پوليگون جوق. اياق استى اۋەدەن ۇشىپ كەلىپ، اۋلاعا تۇسكەن زات توتەنشە جاعدايلار قىزمەتى مەن پوليتسەيلەر كەلگەنشە 4 ساعات جاتقان. ءتۇسىرۋ توبى وقيعا ورنىنا جەتكەندە قۇقىق قورعاۋشىلار مەن اسكەريلەر زەڭبىرەككە ۇقساس زاتتى الىپ كەتىپتى. ءبىراق ونىڭ قۇلاعانىن كوزبەن كورگەندەر ۇرەي قۇشاعىنان ەندى ارىلىپتى.
«مىنا جاقتان ۇشىپ كەلدى قىزىل شوق بولىپ. اينالىپ-اينالىپ كەلدى. اينالعانىن ءبىر كوردىك، سىرتقا شىعىپ ۇلگەرەم دەگەنشە كورشى ءۇيدىڭ شاتىرىنىڭ شەتىنە ءتيدى دە «باح» ەتىپ اتىلدى. جارىلدى. جارىلعاننان كەيىن جۇگىرىپ كەلدىك، كەلسەك كادىمگى اسكەري بىردەڭە جاتىر»، - دەيدى كۋاگەر عالىمجان تىلەكبايەۆ.
كۋاگەرلەردىڭ سوزىنشە، اسپاننان زۋلاپ كەلگەن بەلگىسىز زات شاتىردىڭ ءبىر بۇرىشىن جۇلىپ جەرگە تۇسكەننەن كەيىن دە ءبىراز ۋاقىت تۇتانىپ جانىپ جاتقان. ءۇي يەلەرىنىڭ ايتۋىنشا ءدال وسى ۋاقىتتا، قۇداي ساقتاپ، اۋلادا ەشكىم بولماعان. ءدال وسى ۋاقىتتا ۇيدە بولعان ءۇي يەسى دە سىرتقا ۇمتىلىپتى. اۋلانىڭ ءدال وسى بولىگىندە كۇندە بالالار ويناپ جۇرەدى ەكەن. بىردەن پوليتسياعا حابار بەرگەن تۇرعىن ولاردىڭ كەلۋىن ءتورت ساعاتقا جۋىق كۇتىپتى.
«نەمەرەمنىڭ بىرەۋى دالادا جۇرگەن. قۇداي ساقتاپ، ارعى جاقتا بولىپتى. جاقسى نارسە ەمەس بۇل. ارى تۇسسە نە بولار ەدى؟ وت شىعىپ تۇرعىن ول كەزدە»، - دەيدى ءۇي يەسى ءۋاليحان تالىپبەك.
بەيبىت كۇندە اسپاننان تۇسكەن قاۋىپتى زاتتىڭ نە ەكەنى قازىر انىقتالۋدا. كوزبەن كورگەندەر اسكەري جاراققا ۇقساتىپتى. ال ءۇي يەلەرى مەن جاقىن ماڭدا بولعاندار امان قالعاندارىنا قۋانىپ، ەستەرىن جيعان. جۇرتتى ۇرەيلەندىرگەن زاتتىڭ قايدان كەلگەنى جاقىن كۇندەرى بەلگىلى بولماق.
