استانا پوليتسەيلەرى ءۇشىنشى قاباتتان قۇلاپ كەتۋ قاۋپى تۋىنداعان ەكى ءبۇلدىرشىندى قۇتقارىپ قالدى
استانا. قازاقپارات - استانادا قالالىق ءى ءى د جەرگىلىكتى پوليتسيا قىزمەتى جول- پاترۋلدىك پوليتسيا پولكىنىڭ قىزمەتكەرلەرى پوليتسيا اعا سەرجانتى قايرات تىلتايەۆ پەن پوليتسيا سەرجانتى سەرىك قايداروۆ جاتاقحانانىڭ ءۇشىنشى قاباتىنان تەرەزەدەن قۇلاپ كەتۋ قاۋپى تونگەن ءۇش- ءتورت جاستاعى بالالاردى امان الىپ قالدى.
استانا ءى ءى د باسپا ءسوز قىزمەتىندە حابارلاعانداي، 19 -اقپاندا ساعات 16 لاردا پاترۋلدەۋ كەزىندە پوليتسەيلەر ءۇشىنشى قاباتتىڭ تار ەرنەۋىندە كەلە جاتقان ەكى بالانى بايقاپ قالادى. بالالاردىڭ كەز كەلگەن ساتتە قۇلاپ كەتۋى مۇمكىن ەكەندىگىن كورگەن پوليتسەيلەردىڭ ءبىرى تەرەزە استىندا قالىپ، ولاردى ىشكە كىرۋگە ۇگىتتەگەن. ءساتىن سالعاندا ولار ايتقانعا كونگەن. وسى كەزدە ۋاقىت جوعالتپاي ەكىنشى پوليتسەي جاتاقحانا عيماراتىنا كوتەرىلدى.
ارتىنشا، پوليتسيا قىزمەتكەرلەرى بالالاردىڭ اتا-اناسىمەن جانە جاتاقحانا تۇرعىندارىمەن بۇلدىرشىندەردى قاراۋسىز قالدىرماۋ جايىندا اڭگىمەلەستى.
بۇدان باسقا، ولار قاۋىپسىزدىك تەحنيكاسى تۋرالى نۇسقاما جۇرگىزدى. جاتاقحانا اكىمشىلىگى كەلەشەكتە وسىنداي كەلەڭسىز جاعدايلاردى بولدىرماس ءۇشىن تەرەزەلەردى ارنايى قورعانىس جابدىقتارىمەن نىعايتتى.
