قازاق حالقى الدىندا بورىشتارمىز - امۋرشا بايسالوۆ
قىزىلوردا. قازاقپارات - ەلباسىنىڭ جارلىعىمەن 1 -ناۋرىز العىس ايتۋ كۇنى بولىپ جاريالانعانى بارشاعا ءمالىم.
وسى اتاۋلى كۇنگە وراي قازاق حالقىنا دەگەن ءبىزدىڭ مەسحەتتىك تۇرىكتەر ۇلتى وكىلدەرى اتىنان شىن جۇرەكتەن العىسىمىزدى جەتكىزگىم كەلەدى.
ويتكەنى مەنىڭ اتا-انام 1944 -جىلى 17 -جەلتوقساندا قاپ تاۋىنان وسىندا جەر اۋدارىلىپ كوشىپ كەلىپتى. مىنە، سودان بەرى قازاق حالقىمەن بىرگە تاتۋ-ءتاتتى ءومىر ءسۇرىپ كەلەمىز»، - دەيدى جاڭاقورعان اۋدانىندا تۇراتىن تۇرىك ۇلتىنىڭ وكىلى امۋرشا بايسالوۆ.
«ءبىزدىڭ ءتىرى قالۋىمىز اۋەلى قۇدايدىڭ، ەكىنشى قازاقتاردىڭ باۋىرمالدىعى، جەتىم مەن جەسىرگە، ءبىز سەكىلدى جەر اۋعان حالىق وكىلدەرىنە دوستىق قولىن سوزۋىنىڭ ارقاسى دەر ەدىم» - دەيدى اكەم سەيفو. ونى وسى توپىراقتا تۋعان بىزدەر دە جاقسى سەزىنەمىز. سول ءۇشىن دە قازاق حالقى الدىندا بورىشتارمىز، ولارعا ايتار العىسىمىز دا شەكسىز. مەن دە، بالالارىم دا قازاقتارمەن بىرگە تۋعان باۋىرداي ارالاسامىز. مۇنىڭ ءبارى ەلدىڭ كەمەڭگەر باسشىسى نۇرسۇلتان نازاربايەۆتىڭ ۇستانعان سارابدال ساياساتىنىڭ ارقاسى دەسەم ارتىق ايتقاندىق ەمەس. سوندىقتان ءبىزدى سىرتقا تەپپەگەن، شەتتەتپەگەن جۇزدەگەن ۇلت پەن ۇلىستارعا تورىنەن ورىن بەرگەن نۇرسۇلتان ءابىش ۇلىداي زاڭعار باسشىسى بار قازاق حالقىنا مىڭ العىس ايتقىم كەلەدى»، - دەيدى ا. بايسالوۆ.
اۆتور: ەلجان ەرالى
