قىرعىزستان بيلىگى شەنەۋنىكتەردىڭ ۇلان-اسىر توي جاساۋىنا تىيىم سالماق

قازىر اتالعان جوبا دەپۋتاتتاردىڭ قاراۋىندا جاتىر. بيلىكتىڭ مۇنداي قادامعا بارۋىنا سوڭعى كەزدە مەملەكەتتىك قىزمەتكەرلەر جاساعان سالتاناتتى شارالار توڭىرەگىندە سۇراقتاردىڭ كوبەيىپ كەتۋى تۇرتكى بولعان.

قاي قىرعىز بولسا دا، قالتاسىنداعى سوڭعى اقشاسىن شاشىپ نەمەسە قارىزعا بەلشەدەن باتىپ ۇلان-اسىر توي جاساعانعا قۇمار. ءتىپتى شەنەۋنىكتەردىڭ تويى بىرنەشە كۇنگە سوزىلعان مەرەكەگە اينالادى. وسىنداي قىمبات شارالاردى قىسقارتۋ ءۇشىن پارلامەنت دەپۋتاتتارى ءتيىستى زاڭنامانى قولعا الدى.

ەندى دەپۋتاتتار شەنەۋنىكتەردى قوناعى 150 ادامنان اسپايتىن، ءبىر كۇندە بىتەتىن قاراپايىم توي وتكىزۋگە مىندەتتەمەك. ال قىدىرۋ كەزىندەگى سالتاناتتى شەرۋدە 5 كولىكتەن كوپ بولماۋ كەرەك. مۇنداي شەكتەۋلەر تۋعان كۇن، ءتىپتى جەرلەۋ راسىمىنە دە قاتىستى بولماق. بۇل مەملەكەتتىك قىزمەتتەگىلەرگە عانا قاتىستى بولسا دا، قاراپايىم حالىق قازىردەن باستاپ الاڭداپ وتىر.

جاڭا زاڭدى سىناۋشىلار قۇجات قابىلدانسا دا، وعان مويىنۇسىناتىن ەشكىم بولمايدى دەپ وتىر. سەبەبى تويعا كەلگەن قوناقتاردىڭ سانىن ەسەپتەپ وتىراتىن ورگان جوق، ونىڭ ۇستىنە زاڭ شيكى ءارى جۇيەسىز.