دەنساۋلىق: تۇز نەگە زيان؟
استانا. قازاقارات - قازىر كەيبىر ادامدار سالاۋاتتى ءومىر ءسۇرۋ ءۇشىن تەمەكىدەن، ءسپيرتتى ىشىمدىكتەردەن، گازدى سۋسىنداردان، قۋىرىلعان ەتتەن باس تارتقان. ءبىراق شامادان ارتىق تۇز بۇلاردان دا زياندىراق، دەپ جازادى massaget.kz پورتالى.
دۇنيەجۇزىلىك دەنساۋلىق ساقتاۋ ۇيىمى (د د س ۇ) الەمدە كەڭ ەتەك الىپ بارا جاتقان جۇقپالى ەمەس اۋرۋلاردىڭ تەمەكىدەن كەيىنگى سەبەپشىسى ءارى ەڭ قاۋىپتىسى - تۇز دەپ مالىمدەدى.
5 مىڭ جىل بۇرىن كۇنىنە جارتى گرامم تۇزبەن ءومىر سۇرۋگە ۇيرەنگەن ادامنىڭ تۇزدى قولدانۋى سوڭعى داۋىرلەردە بىردەن ارتتى.
قازىر تۇزدىڭ تاۋلىكتىك تۇتىنىلۋى ورتا ەسەپپەن 8 گراممعا كوتەرىلدى.
ونىڭ باستى سەبەپتەرىنىڭ ءبىرى - دايىن تاماقتاردىڭ پايدا بولۋى.
جاپونيادا 50 -جىل بۇرىن قولدانىلاتىن تۇز مولشەرى كۇنىنە 18 گرامم بولعان. سول سەبەپتى سال (پاراليچ) اۋرۋىنا شالدىققانداردىڭ سانى وتە كوپ بولدى. كەيىن ۇكىمەت تۇزدىڭ تۇتىنىلۋىن ازايتقاننان كەيىن ونىڭ تاۋلىكتىك مولشەرى 4 گراممعا ءتۇستى. ال سال اۋرۋىمەن اۋىراتىندار 80 پايىزعا ازايعان. تۇز قولدانىلىمى 2 گرامم ازايتىلعاندا، 4 جىلدا جۇرەك اۋرۋىمەن اۋرۋ قاۋپى 25 پايىزعا ازايعان.
