قازاقستاننىڭ ەڭبەك سىڭىرگەن قايراتكەرى ماعيرا قوجاحمەتوۆانىڭ مەرەيتويىنا ارنالعان كەش وتەدى

 ماعيرا قوجاحمەتوۆا 1946 - جىلى كوكشەتاۋ وبلىسى، زەرەندى اۋدانىنا قاراستى قوشقارباي اۋلىندا دۇنيەگە كەلگەن. العاشىندا كوكشەتاۋ كىتاپحانا تەحنيكۋمىن بىتىرسە، 1969 -جىلى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن.

رەسپۋبليكالىق «لەنينشىل جاس» (قازىرگى «جاس الاش» ) گازەتىندە 1981 - جىلعا دەيىن قىزمەت ىستەگەن. 1981-1992 ج ج. «قازاقستان ايەلدەرى» جۋرنالىندا، 1992-1994 ج ج. «دەنساۋلىق» جۋرنالىندا، 1994-1996 ج ج. «اي»، 1996 - جىلدان «اق جەلكەن» جۋرنالىندا قىزمەت ەتكەن. 2002 - جىلدان باستاپ بالالارعا ارنالعان «بالبۇلاق» جۋرنالىن، 2005 - جىلدان بەرى كوپشىلىككە ارنالعان مەديتسينالىق، تانىمدىق «دەرتكە داۋا» گازەتىن شىعارىپ كەلەدى.

«كۇننىڭ التىن سىنىعى»، «الەم- اۋەن»، «جىلى شىراي»، «ادام قۇپيا»، «جانتاسىلىم»، «جاپادان جالعىز» كىتاپتارىنىڭ، كوپتەگەن تانىمدىق ماتەريالداردىڭ، شىعارماشىلىق پورترەتتەردىڭ اۆتورى. 2006 - جىلى شىققان قازاقستاننىڭ حالىق جازۋشىسى، اقىن ءماريام حاكىمجانوۆانىڭ Ⅲتومدىق شىعارمالار جيناعىن قۇراستىرعان.

 1982 - جىلى قازاق ك س ر جوعارعى كەڭەسى ءتورالقاسىنىڭ قۇرمەت گراموتاسىمەن، 2006 - جىلى «ەرەن ەڭبەگى ءۇشىن» مەدالىمەن ماراپاتتالعان. حالىقارالىق «الاش» ادەبي سىيلىعىنىڭ لاۋرەاتى (2008). 2015 - جىلى «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىن الدى.