مۇحتار شاحانوۆتىڭ پرەمەر- مينيسترگە قىمىز بەرۋى - راحىمجان وتاربايەۆتىڭ ەستەلىگىنەن

ءبىر كۇنى سول كەزدەگى پرەمەر- مينيستر س. تەرەشەنكو رەسمي ىسساپارمەن كەلەتىن بولدى. قىرعىز جاعى قام جاسادى. ءبىز دە شاپقىلاپ ءجۇرمىز.

قازاق ۇكىمەتى باسشىسى ۆەرتولەتپەن قوردايعا كەپ قوندى. ونى قىرعىز پرەمەر- ءمينيسترى اباس جۇماعۇلوۆ كۇتىپ الدى. ال، ءبىز كەشىگىپ قالىپپىز. كەشىگەتىن سەبەبىمىز - مۇحاڭ: «سەرگەي الەكساندروۆيچ قىمىزدى جاقسى كورەدى. شىمكەنتتە وسكەن. قازاقشا سۋداي اعىپ تۇر. اكەسىن دە جاقسى تانيمىن. بۇل دەگەن بار عوي، ءتىپتى تۋعان ىنىمدەي»، - دەپ اڭگىمە وربىتەدى. بىشكەككە ىرگەلەس اۋىلدان باپتى، سارى قىمىزدى الدىرسىن. ءسويتىپ ىرعالىپ جۇرگەندە ال، كەشىكپەي كور!

انداعايلاپ شاۋىپ قوردايعا جەتەيىك. جەتسەك، ەكى ەلدىڭ پرەمەر- مينيسترلەرى جۇزدەسىپ، ءبىر قىدىرۋ اڭگىمە ايتىسىپ، ەلشىنى توسىپ قالىپتى. پروتوكول بويىنشا ەلشى ولاردى توسىپ الۋى قاجەت. ءبارى كەرىسىنشە.

تەرەشەنكو مۇحاڭا سىزدانىپ قارادى. وزگەسى دە سالقىنداۋ امانداستى. ساساتىن مۇحاڭ با: - قازىر قىمىز ىشەمىز. بال تاتىپ تۇر. ارنايى الىپ كەلدىم، - دەسىن قازاق جاعى ءوزىن كورشى ەلگە بيە بايلاپ، قىمىز اشىت دەپ جىبەرگەندەي.

- قۇي، راحىمجان، تەزدەت!

جۇرگىزۋشى بيسەن ەكەۋمىز ماشينانىڭ ارتقى قاقپاعىن اشىپ جىبەرسەك، كوزىڭ جاماندىق كورمەسىن... بەس ليترىك پلاستيكالىق ىدىستىڭ تىعىنى اتىلىپ كەتىپتى دە، بۇكىل قىمىز توگىلىپتى. بەتىندە ءشوپ- شالام، ماي- ماي شۇبەرەك، قيقىم ءجۇزىپ ءجۇر. مۇحاڭ بولسا، قۇي دا قۇي دەپ جاندى الىپ بارادى. اباس جۇماعۇلوۆ پاراساتتى، سابىرلى ادام.

- و، كانە، ىشەيىك. اسىل ءدام عوي، - دەپ قويادى.

جالما- جان بەتىندەگى قوقىمدى سىپىرىپ، اسىل ءدامدى كەسەمەن كوسىپ الىپ ءبىر- بىرلەپ ۇسىنايىن. توگىلگەن قىمىز تەسىك تاۋىپ تامشىلاپ جەرگە دە اعىپ جاتىر. ءتىپتى جوعارى مارتەبەلى مەيمانداردىڭ بىرەۋىنىڭ تاماعىنا قيقىم كەتىپ قالا ما، دەپ تە جانىم شىعىپ بارادى.

- ىشىڭىزدەر. قىمىز جەتەدى. اكەل، ىدىستى، ءوز قولىممەن قۇيامىن. تاعى ءبىر- ءبىر كەسەدەن، - دەپ مۇحاڭ كۇمپىلدەپ قويار ەمەس. جارىلىپ كەتە جازدادىم.

- اعا، ادامدى ولتىرەيىن دەمەسەڭ قويشى ەندى. ءبىتتى. قۇرىعاندا قىمىز قۇرسىن! - دەدىم بۋلىعىپ.

- وي، يديوت، - دەپ مۇحاڭ ەشتەڭە تۇسىنبەسە دە ىڭعايعا كونە بەردى.

- تارتتىق ەندەشە بىشكەككە!

ءاي، مۇحام- اي، وت پەن سۋعا قاتار سالدىڭ- اۋ، تالاي.

راحىمجان وتاربايەۆتىڭ ەستەلىگىنەن