الماتىنىڭ اكىمى قىزمەتتىك كولىگىن تاستاپ، ۆەلوسيپەد مىنەتىنىن ايتتى
الماتى. قازاقپارات - الماتى قالاسىنىڭ اكىمى باۋىرجان بايبەك استىنداعى اۆتوكولىكتەن باس تارتاتىن بولدى. الماتىنىڭ ەكولوگيالىق احۋالىنا الاڭداعان اكىم كەشە ءوزىنىڭ ەسەپ بەرۋ جيىنىندا استىنداعى ماشيناسىن تاستاپ، ۆەلوسيپەدكە ءمىنۋدى ويلاپ جۇرگەنىن مالىمدەدى.
بۇل تۋرالى ك ت ك ارناسى حابارلادى.
«اكىمدىكتىڭ 86 قىزمەتكەرى ۆەلوسيپەدكە وتىرادى. ءوزىم دە وتىرام. بارلىق كولىكتى گازعا اۋىستىرامىز» - دەدى اكىم.
شەنەۋنىك وسىلايشا ابدەن لاستانعان اۋانى از دا بولسا تۇتىننەن تازارتپاقشى. ويتكەنى، اۋاداعى كومىرقىشقىل گازىنىڭ 80 پايىزى كەپتەلىستەگى كولىكتەردەن شىعادى ەكەن. وسىلايشا توسىننان جاڭا دجيپى مەن قىزمەتتىك «مەرسەدەسىنە» مىنۋدەن باس تارتقان بايبەك باسقالاردى دا كولىكتەن ءتۇسىپ، جاياۋ جۇرۋگە شاقىردى. سوندا تۇراق ماسەلەسىنە باس قاتىرىپ جاتپايمىز دەيدى اكىم. كەيىنگى كەزدەرى قالادا كولىكتەردىڭ تىم كوبەيىپ كەتكەنىن العا تارتقان ول كىلەڭ شەتەلدىك قىمبات ماشينالاردى تىزگىندەگەن ستۋدەنتتەرگە دە شۇيلىكتى. سەبەبى، وقۋ ورنىنا باس- باسىنا بىرەۋدەن ءمىنىپ كەلەتىندەردىڭ تەمىر تۇلپارلارى توڭىرەككە سىيماي، وقۋ ورنىنىڭ الدىنا دەيىن كولىكتەرىن تىرەپ قوياتىن بولعان. بۇل جايتقا الاڭداعان باسشى ستۋدەنتتەردى جاياۋ نەمەسە ۆەلوسيپەدپەن جۇرۋگە شاقىردى.
