تاريحي تەلەحيكايادا قىتايلار قازاق دومبىراسىن يەمدەنىپ الدى - فوتو

كوپ بولىمنەن تۇراتىن فيلمدە ب. ز. د 1 - عاسىر داۋىرىندەگى قىتاي حان ديناستياسىمەن قازاق تاريحىنداعى ءۇيسىن تايپاسى اراسىنداعى تاريحي بايلانىس بەينەلەنگەن.

تەلەحيكايانىڭ 21- بولىمىندە باستاپقى مينۋتتارىندا ءۇيسىن ەلىنىڭ پاتشاسى ياعني كۇنبيى ەلجاۋدىڭ الدىندا جاڭا تۇسكەن قالىڭدىعى حان ديناستياسىنىڭ حانشاسى جيە يۋي قىتايدىڭ ۇلتتىق اسپابىمەن ءان ايتادى. جاقسىلاپ قاراساق، قالىڭدىقتىڭ قولىنداعى مۋزىكالىق اسپاپ قازاقستاننىڭ مەملەكەتتىك تۋىنداعى كۇننىڭ سۋرەتى ءارى ويۋى سالىنعان قازاقتىڭ كادىمگى دومبىراسى. ونى كەيىپكەر «قىتايدىڭ ۇلتتىق اسپابى «پيپا» دەپ تانىستىرادى.

بۇل كورىنىس تەز ارادا ەلدەگى تانىمال Sina Weibo (تۋيتەردىڭ بالاماسى) جانە WeChat الەۋمەتتىك جەلىسىندە كەڭىنەن تالقىلانىپ، قىتايداعى قانداستارىمىزدىڭ نارازىلىعىن تۋدىردى. نارازىلىقتىڭ ورشۋىنە بايلانىستى، تاريحي كينونى ءتۇسىرۋشى توپ Sina Weibo كەلتەبلوگىنىڭ رەسمي پاراقشاسىندا قازاق حالقىنان كەشىرىم سۇراعان جازباسىن ورنالاستىردى.

قىتايدىڭ تاريحي دەرەكتەرىندە «پيپا» كوشپەندى ۇلتتار اراسىندا كەڭ تارالعان مۋزىكالىق اسپاپ رەتىندە جازىلادى. قىتايدىڭ تاڭ ديناستياسى داۋىرىنە دەيىن كوشپەندىلەردىڭ شەرتپەلى مۋزىكالىق اسپاپتىڭ بارلىعىن قىتاي حالقى «پيپ» دەپ اتاپ كەلگەن.

ەسكە سالا كەتسەك، 42 بولىمنەن تۇراتىن تاريحي تەلەحيكايا «جيە يۋي حانىشايىم» قىتايدىڭ ۇلتتىق تەلەارناسى «قىتاي ورتالىق تەلەارناسىندا» (CCTV)  كورسەتىلۋدە.