قازاقستاندىقتار اراب امىرلىكتەرى مەن يسپان ەلدەرىندەگى كوتتەدجدەرىن جاريا ەتە باستادى

بۇگىنگە دەيىن 40 قا جۋىق جىلجىمايتىن مۇلىكتى زاڭداستىرۋ تۋرالى شەشىم قابىلدانىپتى، دەپ حابارلايدى 31 - ارنا.

2014 - جىلدىڭ قىركۇيەگىندە باستالعان زاڭداستىرۋدىڭ العاشقى 15 ايىندا ازاماتتار بەلسەندىلىك تانىتا قويماعان ەدى. سودان كەيىن جاريا ەتۋ اكسياسى تۋرالى زاڭنامالارعا وزگەرىستەر ەنگىزىلگەن بولاتىن. بۇل جەڭىلدىكتەر تۋرالى قارجى مينيسترلىگى ءارتۇرلى بەينەروليكتەر دە دايىنداپ، كورسەتىپ جاتىر.

وسى اقپاراتتار تۇرتكى بولسا كەرەك، قازىرگە دەيىن شەتەلدەگى مۇلكىن زاڭداستىرعاندار بار ەكەن. بۇگىن ارنايى باسپا ءسوز ءماسليحاتىن وتكىزگەن مەملەكەتتىك كىرىستەر كوميتەتىنىڭ وكىلدەرى ارالىق قورىتىندىلاردى جاريا ەتتى.

"شەتەلدە ورنالاسقان 39 وبەكت بويىنشا شەشىم قابىلداندى. ولاردىڭ سوماسى 1 ميللياردتان استام. كوبىنە مىناۋ اراب امىرلىگى بولسىن، ۆەنگريادا، يسپانيادا، تايلاندتاعى كوتتەدجدار وسى اكسياعا قاتىسىپ، قۇجاتىن الىپ جاتىر. جاقىن ورنالاسقان رەسەيدە، وزبەكستانداعى وبەكتتاردى دا كورسەتىپ جاتىر"، - دەدى قارجى مينيسترلىگى مەملەكەتتىك كىرىستەر كوميتەتىنىڭ دەپارتامەنت ديرەكتورى ەرجان ءبىرجانوۆ.

يسپانياداعى كوتتەدجدەر مەن وزبەكستانداعى پاتەرلەردىڭ ءبىر باعادا بولا قويۋى ەكىتالاي

1 ميللياردتى 39 نىسانعا بولەتىن بولساق، 1  جىلجىمايتىن مۇلىكتىڭ ورتاشا قۇنى 25-30 ميلليون تەڭگە شاماسىندا بولادى ەكەن. الايدا، يسپانياداعى كوتتەدجدەر مەن وزبەكستانداعى پاتەرلەردىڭ ءبىر باعادا بولا قويۋى ەكىتالاي.

"ال قانداي ەڭ جوعارعى سوما تۋرالى ايتۋعا بولمايدى. سەبەبى قازىرگى تاڭدا بۇل زاڭمەن ساقتالادى. مەن دە بۇل مالىمەتتە ايتا المايمىن"، - دەدى دەپارتامەنت ديرەكتورى.

سونداي- اق، مۇلكىن زاڭداستىرعان ازاماتتاردىڭ ىشىندە مەملەكەتتىك قىزمەتكەرلەر بار ما، جوق پا، ول قۇپيا ەكەن. قارجىگەرلەر، باستىسى - شەتتەگى قارجى ەل ەكونوميكاسىنا جۇمىس ىستەسە بولعانى دەيدى. سودان كەيىن، بۇل اكسيانىڭ كىمدەر ءۇشىن ءتيىمدى ەكەنىن دە تۇسىندىرە كەتتى.

«مۇلىكتى جاريا ەتۋ سالىق تولەۋدەن جالتارۋ جانە تاعى سول سياقتى زاڭسىزدىقتاردى جاسىرعىسى كەلەتىن ازاماتتارعا قاجەتىرەك. ال مۇلكىن ءوزىنىڭ ادال تابىسىنا ساتىپ العانىن دالەلدەي الاتىن ادامداردىڭ زاڭداستىرۋعا قاتىسپاۋىنا بولادى»، - دەدى قارجى مينيسترلىگى مەملەكەتتىك كىرىستەر كوميتەتى باسقارما جەتەكشىسىنىڭ ورىنباسارى ەرلان ساعىنايەۆ.

قالاي دەسەك تە، بۇگىنگە دەيىن جاريا ەتىلگەن اكتيۆتەردىڭ سوماسى 700 ميلليارد تەڭگەدەن اسقان. ونىڭ 500 ميللياردقا جۋىعى قازاقستان اۋماعىنداعى مۇلىك. ال جىل سوڭىندا اكسيا اياقتالعاننان كەيىن قاراجاتىن زاڭداستىرا الماعاندارعا ايىپپۇل سالىنباق.