فيدجيدى وراسان داۋىل ابىگەرگە سالدى - كەسكىن

21- اقپان كۇنگى تاڭەرتەڭگى ساعاتتاردا كەلىپ تۇسە باستاعان اقپاراتتارعا قاراعاندا، قۇرباندار سانى ارتا ءتۇسۋى مۇمكىن، دەپ حابارلادى ت ا س س.

«اپاتتار اۋقىمى وراسان، الايدا قانشا ادام زارداپ شەگىپ، قانشا ءۇي قيراعانى تۋرالى ازىرگە ايتۋ ەرتەرەك»، - دەپ حابارلادى جاڭازەلانديالىق راديوعا فيدجي استاناسى - سۋۆەدە بولعان حالىقارالىق قىزىل كرەست كوميتەتىنىڭ قىزمەتكەرى.

سيكلوننىڭ وشاعى ەڭ ءىرى فيدجيلىك ۆيتي-ليەۆۋ ارالىنان سولتۇستىككە تامان ءوتتى، بۇل ارالدا ەل حالقىنىڭ 70 پايىزعا جۋىعى تۇراتىن جانە استانا مەن حالىقارالىق نادي اۋەجايى ورنالاسقان.

سيكلونعا ەڭ جوعارى ساناتتاعى قۋاتتىلىق بەرىلدى - مەتەورولوگتاردىڭ مالىمەتتەرىنشە، داۋىل وشاعى ماڭىندا جەلدىڭ جىلدامدىعى ساعاتىنا 230 شاقىرىمعا، ال ۇيتقۋى - ساعاتىنا 325 شاقىرىمعا، ارال جاعالاۋلارىنداعى مۇحيت تولقىنىنىڭ بيىكتىگى 12 مەترگە جەتتى.

وكىمەت ورىندارى حالىقتى قاۋىپ جونىندە الدىن الا ەسكەرتتى جانە 750 دەن استام كوشىرۋ ورتالىقتارى مەن باسپانالار اشتى. اسىرەسە، شالعاي ارالدار مەن ەڭىستە ورنالاسقان اۋدانداردىڭ اۋىلدارىنداعى جاعداي الاڭداۋشىلىق تۋعىزۋدا.

سەنبى كۇنى فيدجي ۇكىمەتى اپاتتى جاعدايعا بايلانىستى كومەندانتتىق ساعات ەنگىزگەن بولاتىن. تاڭەرتەڭ ونىڭ كۇشى كۇندىزگى ۋاقىتتارعا دا ۇزارتىلدى.

قازىرگى كەزدە «ۋينستون» داۋىلى فيدجي ارحيپەلاگىنىڭ باتىس بەتتەگى نەگىزگى ارالدارىنان ساعاتىنا 22 شاقىرىمعا جۋىق جىلدامدىقپەن جىلىستاپ بارادى. ونىڭ جولىندا فيدجيلىك ياساۆا ارالدارى قالىپ وتىر.