ءاليا مولداعۇلوۆانىڭ سۋرەتى عالامتوردا داۋ تۋدىردى - فوتو

باتىردىڭ ءومىرىن زەرتتەۋشى عالىمجان بايدەربەس گيمناستەركا كيگەن سۇڭعاق سۇلۋدىڭ ءاليا ەمەستىگىن العا تارتتى.

KazNet قولدانۋشىلارىنىڭ ءبىر توبى گيمناستەركا كيگەن سۇڭعاق سۇلۋدىڭ ءاليا مولداعۇلوۆا ەكەنىنە بىردەن كۇمانمەن قارادى. ەندى ءبىر توبى ءاليانىڭ باتىر عانا ەمەس، وتە سۇلۋ قىز بولعانىن مۇلدەم بىلمەيتىندەرىن ايتىپ تاڭداي قاعىسىپ جاتتى، دەپ جازادى kerek.info پورتالى.

ونىڭ سەبەبى دە جوق ەمەس. ويتكەنى، سۋرەتتىڭ سيپاتتاماسىنا «سوعىستىڭ العاشقى جىلدارىنداعى ءاليا مولداعۇلوۆا» دەپ جازۋلى تۇر. ول از بولسا، بۇل سۋرەتتى ق ر ۇلتتىق ارحيۆىنە باتىردىڭ ءسىڭلىسى ءالىپ ۇسەنوۆانىڭ ءوز قولىمەن تاپسىرعاندىعى تۋرالى دا جازىلعان.

ال ءاليا مولداعۇلوۆانىڭ ءومىرى مەن ەرلىگىن زەرتتەۋشى عالىمجان بايدەربەس «باتىردىڭ سوعىس جىلدارىندا تۇسىرىلگەن جالعىز عانا سۋرەتى بار» دەيدى. ونىڭ ءوزى فوتوسۋرەت ەمەس.

«قىرىق جىل ءاليانى زەرتتەگەن مەن بىردەڭە بىلەتىن شىعارمىن؟! بۇل سۋرەتتەگى ءاليا ەمەس! ءالىپ اپايلارىڭ جۇرتتى ابدەن شاتاستىرىپ ءبىتتى. ۇيات ەمەس پە؟! قانشاما حالىقتى الداپ. جاۋىنگەر ءاليانىڭ ساقتالىپ قالعان جالعىز عانا سۋرەتى بار. ونى 1944-جىلدىڭ 13- قاڭتارىندا لەيتەنانت گرين ەسىمدى قارۋلاسى قارىنداشپەن سالعان. ەرتەسىنە ءاليا وپات بولادى. جالعىز عانا سۋرەت. ونىڭ ءوزى فوتوسۋرەت ەمەس. قارىنداشپەن سالىنعان. باسقاسىنىڭ ءبارى بولجاممەن سالىنعان سۋرەتتەر»، - دەيدى عالىمجان بايدەربەس.

ال ينتەرنەتتە «سوعىستىڭ العاشقى جىلدارىنداعى ءاليا مولداعۇلوۆا» دەپ سيپاتتالعان سۋرەتتە قازاقستاننىڭ وڭتۇستىگىندەگى جۇمات شانين اتىنداعى تەاتردىڭ اكتريساسى عازيزا قاسەنوۆا ەكەنى بەلگىلى بولدى. بۇل تۋرالى Facebook-تەگى پاراقشاسىندا اكتريسانىڭ قىزى ايگەرىم وتاربايەۆا جازدى. ول باتىردىڭ تۋىستارىنان جۇرتتى الداپ، شاتاستىرماۋدى سۇرايدى.

ينتەرنەتتە تارالىپ كەتكەن سۋرەتتىڭ ءتۇپ نۇسقاسى دا تابىلدى. وندا شىمكەنتتىك اكتريسا عازيزا قاسەنوۆا جۇبايى ارىستان وتاربايەۆپەن بىرگە تۇر.

«ءاليا اپامىزدىڭ ەرلىگىن بالا كەزدەن وقىپ وستىك. قازاقتىڭ باتىر قىزى دەپ ماقتان تۇتامىز. ءبىراق تاريحتىڭ اتى - تاريح. وعان قيانات جاساۋعا بولمايدى. بۇل سۋرەت 1941-جىلى ەمەس، 1983-جىلى شىمكەنتتە رەجيسسەر جاقىپ وماروۆ ساحنالاعان «قىز ماحابباتى» سپەكتاكلى كەزىندە تۇسىرىلگەن. ءاليانىڭ رولىندە عازيزا قاسەنوۆا مەن ونىڭ سەرىگى ەرلاننىڭ ءرولىن ويناعانمىن. سۋرەتتىڭ قىسقاشا تاريحى وسى»، - دەيدى ارىستان وتاربايەۆ.