جانجال شىعارىپ ەلدى شۋلاتقان تانىمال تۇلعالار

استانا. قازاقپارات - وتاندىق تانىمال تۇلعالاردىڭ اراسىندا دا ءوزىن ەلدەن ەرەك ۇستاپ، قوعامدىق ءتارتىپتى بۇزىپ جاتاتىندارى بار. بىرەۋلەر مۇنى «جۇلدىز» اۋرۋى دەپ تۇسىنسە، ەندى ءبىرى كەلەڭسىز جايت كەز- كەلگەن ادامنىڭ باسىنان وتەتىنىمەن تۇسىندىرەدى.

NUR. KZ جۇرت الدىندا جانجال شىعارىپ، ەلدى شۋلاتقان تانىمال تۇلعالاردى نازارلارىڭىزعا ۇسىنادى.

ەل ىشىندە «تۋكا» اتالىپ كەتكەن اكتەر نۇرجان تولەنديەۆ ءبىراز جىل بۇرىن قىز زورلادى دەگەن كۇدىكپەن ۇستالىپ، جۇرتتى دۇرلىكتىرگەن ەدى. اكتەردىڭ ءوزى جەكە باسىنا قاتىستى مۇنداي ماسقارانى مويىنداعان جوق جانە ب ا ق بەتتەرىندەگى ماعلۇماتتاردى جوققا شىعاردى.

«ايدالادا جۇرگەن بىرەۋدىڭ الپەشتەپ وتىرعان قارعاداي قىزىن مەنىمەن قوسىپ، اتىن ءبۇلدىرىپ نە كورىندى بۇل ەلگە؟ ويلاسام، كۇيىپ كەتەم. كوپ بولسا، مەنىڭ بالامنان ەكى- ءۇش جاس ۇلكەن قىز عوي. ناقاقتان- ناقاق ادامدى كۇيدىرۋگە بولمايدى»، - دەگەن ەدى نۇرجان سول وقيعا جايىندا.

حالىق ءارتىسى ماقپال ءجۇنىسوۆانىڭ دا ماس كۇيىندە جانجال شىعارعان ەكى ۆيدەوسى عالامتورعا تارالىپ، كوپشىلىكتىڭ تالقىسىنا تۇسكەن ەدى. ءبىر ۆيدەودا ءانشى جاس جىگىتتەرمەن ىشىمدىك ۇرتتاپ، بالاعات ءسوز ايتىپ تۇرسا، ەكىنشىسى ۆيدەودا وقيعا اۋەجايدا ورىن العان. وندا ماقپال ءجۇنىسوۆا بيلەت كورسەتۋىن تالاپ ەتكەن اۋەجاي قىزمەتكەرلەرىمەن كەرىسىپ قالعان.

 بەيبىت قورعان 2010 -جىلدىڭ قازان ايىندا اتىراۋدان الماتىعا كەلە جاتىپ ۇشاق ىشىندە سپورتشى جىگىت ايدار داۋىتوۆپەن ىلىگىسەدى. ونىڭ ايتۋىنشا، ءانشى اردەڭەنى ءبىر ايتىپ، شۋىلداپ، قاسىندا وتىرعان سپورتشىعا مازا بەرمەيدى. سپورتشى ەسكەرتۋ جاساعاندا، ءانشى وعان بوقتىق ءسوز قايىرادى.

 ۇشاقتان تۇسكەن سوڭ، سپورتشىنى قاسىندا بىلەك سىبانعان ونشاقتى جىگىت بار، بەيبىت قورعان كۇتىپ تۇر ەكەن. الگىلەر سوزگە كەلمەي سپورتشىعا جابىلىپ، تەپكىلەپ تاستايدى. بۇل توبەلەس الماتى اۋەجايىنىڭ باقىلاۋ كامەراسىنا جازىلىپ قالعان.

تاعى بىردە اتىراۋعا كونسەرت قويۋعا بارعان بەيبىت قورعان جەرگىلىكتى «اق جايىق» گازەتىنىڭ ءتىلشىسى اينۇر ساپاروۆانى ارتىستەر كيىنىپ- شەشىنەتىن بولمەگە قاماپ، ءزابىر كورسەتكەن. سوققىدان ەرنى گۇپ بولىپ ءىسىپ، تىزەسى جارىلعان جۋرناليست پوليتسياعا شاعىمدانعان. ءبىراق، ناتيجەسىندە تەرگەۋ ءىسى اياقسىز قالعان كورىنەدى.

2013 -جىلدىڭ 31 - تامىزىندا قايرات نۇرتاستىڭ الماتىداعى «پرايم پلازا» ساۋدا ورتالىعىندا بولعان كونسەرتى داۋ- جانجالمەن اياقتالدى. ءانشى ساحنادا پايدا بولىسىمەن كورەرمەندەر قورعانىش زاتتاردى بۇزىپ، ساحناعا قاراي ۇمتىلعان. ءانىن اياقتاماستان ساحنادان كەتىپ قالعان قايراتقا اشۋلانعان كورەرمەن پوليتسەيلەردىڭ پاترۋلدى ماشيناسىن ورتەپ، اپپاراتۋرانى تالقانداعان.

2014 -جىلى "داۋىس International" توبىنىڭ ەكس- مۇشەسى، ءانشى جادىرا قۇتپانوۆا كولىكتى ماس كۇيىندە باسقارعان جەرىنەن پوليتسەيلەردىڭ قولىنا تۇسكەن ەدى. ءانشى بوستاندىق اۋدانى ءى ءى ب عيماراتى الدىندا مىنەزىن كورسەتىپ، ءبىر ءتارتىپ ساقشىسىنىڭ كيىمىن جىرتسا، كەلەسىسىنىڭ قولىنان تىستەپ العان. كەيىننەن ءارتىس ءۇش جىلعا جۇرگىزۋشى كۋالىگىنەن ايىرىلدى.

 بىرەر جىل بۇرىن اسەل ءسادۋاقاسوۆادان اينىمايتىن بويجەتكەننىڭ جالاڭاش سۋرەتتەرى عالامتوردا تەز تارالىپ، ءانشىنى جاعىمسىز جاعدايعا قالدىرعان بولاتىن. اسەل ءسادۋاقاسوۆا كادرداعى قىزدىڭ ءوزى ەمەستىگىن بايانداپ، بۇل ارەكەتتى قاستاندىق ويلاۋشىلاردىڭ تاراپىنان شىققان ارانداتۋشىلىق دەپ اتادى.

ءسادۋاقاسوۆانىڭ باسىنا قاتىستى تاعى ءبىر داۋلى وقيعا، بۇرىنعى كۇيەۋ جىگىتى اسىلجان راقىشيەۆ ءانشىنىڭ سەنىمىنە كىرىپ، جالعان قۇجاتتار جاساۋ ارقىلى ونىڭ ەكى ءۇيى مەن اۆتوكولىگىن وزىنە راسىمدەپ العان كورىنەدى. ال ءسادۋاقاسوۆا ءتورت اي بويى ادىلدىك ءۇشىن كۇرەسىپ، جىلجىمايتىن مۇلىگىن قايتارىپ الۋعا تىرىسقان بولاتىن.

2014 -جىلى وليمپيادا چەمپيونى باقتيار ارتايەۆ قىزعا قول جۇمسادى دەپ كۇدىككە ىلىنگەن ەدى. جابىرلەنۋشى بويجەتكەن ايسۇلۋ ىبىراشيەۆانىڭ ايتۋىنشا، وقيعا استاناداعى Fashion تۇنگى كلۋبىندا بولعان. وقيعا بولعان كوڭىل كوتەرۋ ورنىنىڭ كۇزەتشىلەرى قىزدىڭ ايتقاندارىن جوققا شىعارعان. ولار ارتايەۆتىڭ قىزدى ۇرعانىن كورمەگەن. وسىدان سوڭ، سپورتشىعا قاتىستى قىلمىستىق ءىس توقتاتىلعان ەدى.

وتاندىق ءارتىس باۋىرجان يبراگيموۆ تە وسى جىلى بەيادەپ قىلىعىمەن جۇرتتىڭ نازارىنا ىلىككەن ەدى. الەۋمەتتىك جەلىلەردە تارالىپ كەتكەن ۆيدەودا يبراگيموۆ وزىنە قوناق ۇيدە ورىن جوق ەكەنىن ايتقان قابىلداۋ بولمەسىندەگى بويجەتكەندى اياۋسىز سوزبەن سىباعان. قىز بالاعا بىلاپىت سوزدەردى جاۋدىرعان ءارتىستىڭ ارەكەتىن جەلى قولدانۋشىلارى سىنعا الدى.