الماتىدا قازاق حالقىنا قاتىستى سيرەك قولجازبالار وقىرمان نازارىنا ۇسىنىلدى

الماتى. قازاقپارات- بۇگىن الماتىدا «عىلىم ورداسى» ر م ك عىلىمي كىتاپحاناسىندا قازاق حالقىنىڭ تاريحى، مادەنيەتى، شەجىرەسى، سالت-داستۇرلەرىنە قاتىستى وتە سيرەك كەزدەسەتىن كىتاپتار مەن قولجازبالاردىڭ قازاق تىلىندەگى ءبىرقاتار نۇسقاسىنىڭ تۇساۋى كەسىلدى.

ولار اتالعان عىلىمي كىتاپحانانىڭ سيرەك كىتاپتار جانە قولجازبالار قورىنداعى ماتەريالدار نەگىزىندە دايىندالعان.

ءبىرىنشى كىتاپ: «قازاق جازبالارىنداعى حاندار شەجىرەسى» دەپ اتالادى. وعان سوناۋ 18- عاسىردا شاعاتاي تىلىندە جازىلعان، ۇزىندىعى 3 مەتر، ەنى 45 سانتيمەرلىك قاعازعا باسىلعان حاندار شەجىرەسى، «شىڭعىس حان جانە ونىڭ بيلەرى» قولجازبا گەنەولوگياسى مەن «شىڭعىس حان شەجىرەسى» اتتى 1906-جىلى قازان قالاسىندا باسىلىپ شىققان شىعارما ەنگىزىلگەن.

سونىمەن قاتار، «عىلىم ورداسى» ر م ك عىلىمي كىتاپحاناسىنىڭ سيرەك قورىنداعى پارسى تىلىندەگى كىتاپتاردىڭ كاتالوگى، شەت تىلىندەگى سيرەك كەزدەسەتىن كىتاپتاردىڭ مازمۇندالعان سۋرەتتى بيبليوگرافيالىق كورسەتكىشى جانە عىلىمي كىتاپحانانىڭ قولجازبا قورىندا ساقتاۋلى ماتەريالدار جيناعىنىڭ مازمۇندالعان بيبليوگرافيالىق كورسەتكىشىنىڭ IV، V، VI تومدارى كوپشىلىك نازارىنا ۇسىنىلدى.

«بۇل كىتاپتار قالىڭ كوپشىلىك وقىرمان ءۇشىن، سونداي-اق، فولكلورتانۋشىلار، تاريحشىلار، ەتنولوگتار، مادەنيەتتانۋشىلار، ونەرتانۋشىلار، الەۋمەتتانۋشىلار جانە جۋرناليستەر ءۇشىن تاپتىرمايتىن قۇندى دۇنيەلەر. عىلىمي كىتاپحانانىڭ قورىنداعى اسا سيرەك كەزدەسەتىن بۇل باسىلىمدار - ۇلتتىق بايلىعىمىز، كەزىندە ءبىر عانا دانامەن شىققان تەڭدەسى جوق راريرەتتەر.

ولاردى حالقىمىزدىڭ باعا جەتپەس رۋحاني مول قازىناسى دەۋگە بولادى»، - دەدى «عىلىم ورداسى» ر م ك عىلىمي كىتاپحاناسىنىڭ مەڭگەرۋشىسى قارلىعاش قايماقبايەۆا.

بۇل اتالعان كىتاپتاردىڭ ەلەكتروندى نۇسقاسى «عىلىم ورداسى» ر م ك رەسمي سايتىندا جاريالانادى. كوپشىلىك وقىرمان جانە عالىمدار ەندى كىتاپحاناعا كەلمەي-اق، وسى سايتقا كىرىپ، اتالعان كىتاپتار بويىنشا جۇمىس ىستەي الادى. تەك كوشىرىپ الۋعا بولمايدى.

ايتا كەتەلىك، بۇگىنگى تاڭدا «عىلىم ورداسى» ر م ك عىلىمي كىتاپحاناسىندا 5,5 ميلليون استام كىتاپ قورى بار. سولاردىڭ ىشىندە 300 مىڭعا جۋىق سيرەك كىتاپتار مەن قولجازبالار ساقتالعان. بۇل جەردە قولجازبالارعا قاتىستى بۋمالاردىڭ سانى - 22 مىڭ دانانى قۇرايدى. سونداي-اق، كىتاپحانا قورىندا 10 مىڭنان استام شىعىس تىلدەرىندەگى كىتاپتار، 606 فوتو كوشىرمە، 2200 ميكروفيلم جانە قازاق جانە ورىس تىلدەرىندە 90 مىڭعا جۋىق سيرەك كىتاپتار بار.

اۆتور: جاپپاربەرگەن ايبوتا