08:32, 17 - اقپان 2016 | GMT +5
بۇرىنعى ب ۇ ۇ باس حاتشىسى بۋتروس بۋتروس گالي ومىردەن وزدى
استانا. قازاقپارات - كايردە بىرىككەن ۇلتتار ۇيىمىنىڭ بۇرىنعى باس حاتشىسى بۋتروس بۋتروس گالي 93 جاسىندا قايتىس بولدى.
ول 1992 - جىلى ب ۇ ۇ باس حاتشىسى لاۋزىمىن يەلەندى جانە بۇل قىزمەتتەگى اراب ەلدەرىنىڭ العاشقى (وسى ۋاقىتقا دەيىنگى جالعىز) وكىلى بولدى.
بۇل كەزەڭدە، ياعني پارسى بۇعازىنداعى العاشقى سوعىستان كەيىن ب ۇ ۇ ءرولى حالىقارالىق ارەنادا وسە ءتۇستى. ونىڭ جۇمىس جاساعان ۋاقىتى يۋگوسلاۆيا مەن سوماليدەگى قارۋلى قاقتىعىسقا تۋرا كەلدى، بۇل كەزدە تاياۋ شىعىستا دا جاعداي شيەلەنىسىپ تۇرعان ەدى.
ۆاشينگتون بۋتروس بۋتروس گالي ناتو- نىڭ بوسنياداعى قاقتىعىسقا ارالاسۋىنا قارسىلىق بىلدىرگەنىنە نارازى بولدى. سونداي- اق ونى ب ۇ ۇ رۋانداداعى گەنوتسيدتى توقتاتا الماعانى ءۇشىن دە سىنادى، دەپ حابارلايدى بي- بي- سي.
